Tuꞌj Pabl kye Nimil aj Galacia
Atzin t-xilin uꞌj luꞌn chꞌime ikyxjo tzeꞌnku uꞌj xi ttzꞌibꞌin Pabl kye aj Rom, quꞌn nxi tkujsin Pabl qa ajo tumil tuꞌn kymeltzꞌajxjal tukꞌa Dios oꞌkxjo kynimbꞌil tiꞌj Jesucrist, ex nya tuꞌn tjapin bꞌaj ojtxe kawbꞌil kyuꞌn. Te tnejil, ayetzin nimil toj Galacia o kꞌmetjo Tbꞌanil Tqanil kyuꞌn tukꞌa tzaljbꞌil, me atzin jaꞌlin attaq junjun xjal nchi xnaqꞌtzin, qa iltaq tiꞌj tuꞌn tjapin tkawbꞌil Moisés kyuꞌn, ex tuꞌn tok qitit kyechil tiꞌj kyxmilil tuꞌn kyklet, quꞌn toj kywutz, bꞌaꞌn tuꞌn tklet jun xjal tuꞌnx tibꞌx, noq tuꞌn tjapin bꞌajjo yol anetziꞌn. Tuꞌnpetziꞌn, nimx yolin Pabl tiꞌjjo Tbꞌanil Tqanil kolbꞌil nya tuꞌn kybꞌinchbꞌinxjal, qalaꞌ noq tuꞌn t-xtalbꞌil qMan, ex tuꞌnjo kynimbꞌil tiꞌj Crist.
Tojjo uꞌj, nxi tchikyꞌbꞌin Pabl tojxix tumil tiꞌjjo xnaqꞌtzbꞌil, a tzaqpibꞌl kye nimil twutzjo ojtxe kawbꞌil, exla qa ntiꞌ tajbꞌin ojtxe kawbꞌil tuꞌn kyklet-xjal, me ntzaj tyekꞌin qa aj ilqe. Tuꞌnpetziꞌn, tzaj tchikyꞌbꞌin Pabl tiꞌ t-xiliꞌn tzaqpibꞌl toj kychwinqil nimil, a nya tuꞌn kybꞌinchin tzeꞌnku kyaj, qalaꞌ tuꞌn kyyekꞌinte tukꞌa kybꞌinchbꞌin ajo kynimbꞌil tiꞌj qAjaw.
Tuꞌnpetziꞌn, tzaj tqꞌoꞌn Pabl jun txokbꞌil te kye aj Galacia, tuꞌntzintla kyanqꞌin tojjo tzaqpibꞌl tukꞌa tumil, ex mi tuꞌn t-xi kyqꞌoꞌn kyibꞌ tjaqꞌ ojtxe kawbꞌil, noq tuꞌn tqe kykꞌuꞌj tiꞌj tuꞌn kyklet tuꞌn, quꞌn tojjo uꞌj lo ntyekꞌin Pabl qa ntiꞌ jun kolbꞌil, a nya tuꞌn Tbꞌanil Tqanil tiꞌj Crist.
1
Jun qꞌolbꞌil
1 Ayiꞌn Pabl jun tsanjil Jesús, ex nya qexjal ma chi jaw skꞌoꞌn weꞌy, ex ma tzꞌok qꞌoꞌn te wokliꞌn, qalaꞌ a qAjaw Jesucrist, junx tukꞌa qMan Dios, axjo jaw anqꞌsinte Jesús kyxol kyimnin. 2 Nxi ntzꞌibꞌinjiꞌy uꞌj luꞌn junx kyukꞌa txqantl nimil iteꞌ wukꞌiy tzaluꞌn, kye kykyaqil Ttanim Dios iteꞌ toj tkyaqil txꞌotxꞌ Galacia.
3 Axit qMan Dios junx tukꞌa qAjaw Jesús, tzaj qꞌoꞌnte t-xtalbꞌil kyibꞌaja, tuꞌn kymujbꞌin te kyibꞌa kyxolxa. 4 Quꞌn oꞌkx te qAjaw Jesús xi tqꞌoꞌn tibꞌ tuꞌn qpaj, tuꞌn qklet te tkyaqil il tzaluꞌn twutz txꞌotxꞌ, tzeꞌnkux taj qMan Dios. 5 Tuꞌnpetziꞌn, nimxit tbꞌi qMan jaꞌlin ex te jun majx.
Junchꞌin Tbꞌanil Tqanil kolbꞌil
6 Werman, nim ma chin jaw kaꞌylaja kyuꞌn, tuꞌn jun paqx ma kyij kytzaqpinjiꞌy Dios, a txkon kyeꞌy tuꞌn t-xtalbꞌil Crist. Ex ma txi kynimiꞌn juntl tqanil nyakuj tbꞌanil kolbꞌil. 7 Twutzxix nya atx juntl tqanil kolbꞌil; qalaꞌ ikytzin at junjun ma jaw najsinte kynabꞌla, quꞌn kyaj tuꞌn kytxꞌixpin teꞌ Tbꞌanil Tqanil kolbꞌil, a aku Crist.
8 Me kykaꞌyinktziꞌn, qa at juntl s-ul qꞌmal juntl tqanil kolbꞌil, a mikyxi tzeꞌnku o bꞌaj qqꞌmaꞌn, kꞌwel tzꞌaq tjaqꞌ tqanbꞌil Dios te jun majx, expe qa ayinku weꞌ, mo qa jun angelj nyakuj tzaj toj kyaꞌj. 9 O txi nqꞌmaꞌnjiꞌy luꞌn, me kxel nqꞌmaꞌn juntl majla: Qa at juntl s-ul qꞌmal juntl tqanil kolbꞌil, a mikyxi tzeꞌnku ma txi kykꞌmoꞌn, kꞌwel tzꞌaq tjaqꞌ tqanbꞌil Dios, a kujxix wen, te jun majx. 10 ¿Me tin quꞌn waja tuꞌn tkubꞌ ntzꞌibꞌinjiꞌy luꞌn? ¿Ma tuꞌnpela kyyolin xjal bꞌaꞌn wiꞌja? ¡Mina! Qalaꞌ a wajiꞌy tuꞌn ttzalaj Dios wiꞌja. Quꞌn noqit noq tuꞌn nnimsin wibꞌa kywutzxjal, mitla xi ntziyiꞌn tuꞌn woka te taqꞌnil Crist.
Tej tyolin Pabl te kolbꞌil tibꞌ
11 Erman, waja tuꞌn kybꞌintiꞌy jaꞌ ntzaje Tbꞌanil Tqanil kolbꞌil, a nyoliꞌn: Nya noq toj kynabꞌlxjal, 12 quꞌn nya noq jun tyol xjal, ex nya noq el nxnaqꞌtziꞌn kyiꞌjxjal, qalaꞌ aku Jesucrist tzaj qꞌonte weꞌy.
13 Me ola chin ok kybꞌiꞌn chꞌin, tej intintaqa kyxol aj Judiy ojtxe. Nim in qꞌojliꞌy tiꞌj tkyaqil Ttanim Dios, ex nim ok tilil wuꞌn tuꞌn tkubꞌ yuchꞌj.✡Kybꞌi. 8:3; 22:4-5; 26:9-11. 14 Ex bꞌiꞌn kyuꞌn, qa toj kynimbꞌil aj Judiy, nimxtaq otaq tzꞌel nnikyꞌa te, kywutzjo txqantl nxjalila, ayeꞌ junxtaq qabꞌqꞌiꞌy kyukꞌa. Quꞌn ayiꞌn nimxtaq ipbꞌil intinkiꞌy tuꞌn tjapin bꞌajjo jniꞌ tumil kyij qꞌoꞌn kyuꞌn qtzan nxjalila ojtxe.✡Kybꞌi. 22:3.
15 Me ax te Dios xjaw skꞌoꞌn weꞌy; teꞌ naꞌmxtaq witzꞌjiꞌy, ex noq tuꞌn t-xtalbꞌil wiꞌja, ma chin tzaj ttxkoꞌn, a tzeꞌnkuxjo taj. 16 Ex ma taqꞌ, tuꞌn tel nnikyꞌa te Tkꞌwal, ex tuꞌn t-xi nqꞌmaꞌn Tbꞌanil Tqanil kolbꞌil kye tkyaqil xjal.✡Kybꞌi. 9:3-6; 22:6-10; 26:13-18. Tej ttzaj tqꞌoꞌn wokliꞌn anetziꞌn, mix ja in xtaꞌjiꞌy qanil jun tumil kyexjal. 17 Ex mix in xtaꞌjiꞌy Jerusalén qanil jun tumil kyeꞌ txqantl, ayeꞌ otaq chi ok te tsanjil Jesús. Qalaꞌ liweyx in xiꞌy toj txꞌotxꞌ te Arabia, ex tbꞌajlinxiꞌ ikyjo, in xiꞌy toj tnam Damasco. 18 Tbꞌajlinxiꞌ oxe abꞌqꞌe, in xiꞌy Jerusalén tuꞌn tok wojtzqintiꞌy Pegr;✡Kybꞌi. 9:26-30. in teꞌn jweꞌlajaj qꞌij tukꞌa. 19 Ex mix aꞌl juntl tsanjil Jesús nliꞌy, oꞌkx Santyaw, a titzꞌin qAjaw.
20 Kxel nqꞌmaꞌnjiꞌy luꞌn twutz qMan Dios: Tkyaqiljo ma txi ntzꞌibꞌiꞌn kyeꞌy, twutzxix. 21 Tbꞌajlinxiꞌ ikyjo, in xiꞌy tojjo txꞌotxꞌ te Siria ex Cilicia. 22 Ex tkyaqil nimil kyojjo Ttanim Crist, a iteꞌ toj txꞌotxꞌ Judey, naꞌmtaq wok kyojtzqiꞌn. 23 Noq tqaniltaq at wiꞌja kyxol nimil antza: Atzaj Pabl nqꞌojletaq qiꞌj, ex nimtaq taj tuꞌn qel xitj; me atzin jaꞌlin, lu nyolin tiꞌjjo Tbꞌanil Tqanil kolbꞌil, chi chiꞌ. 24 Ex noq tuꞌn ikyjo, nimx jaw kynimsin tbꞌi qMan Dios.