5
1 Kykyaqil kynejilxix pale skꞌoꞌnqe kyxol ichin, tuꞌn kyyolin kyiꞌjxjal twutz qMan Dios, ex tuꞌn kyqꞌoꞌn oyaj te Dios, ex tuꞌn kybꞌyoꞌn aluꞌmj te chojbꞌil kyilxjal. 2 Ayetziꞌn kynejilxix pale, attaq tqꞌaqꞌbꞌil kykꞌuꞌj kyukꞌaꞌ ayeꞌ mix ele kynikyꞌ tiꞌjjo tbꞌeyil bꞌaꞌn, ex kyukꞌa i el txalpaj tiꞌj kynimbꞌil, quꞌn ojtzqiꞌntaq kyuꞌn tkyaqiljo n-ikyꞌx kyiꞌj, quꞌn tuꞌn xjalqe tzeꞌnku txqantl. 3 Ex tuꞌn xjalqe, iltaq tiꞌj, tuꞌn t-xi kyqꞌoꞌn chojbꞌil tnejil tiꞌjjo kyilku, exsin tkabꞌ, tuꞌn t-xi kyqꞌoꞌn chojbꞌil tiꞌj kyiljo txqantl xjal.✡Lv. 9:7.
4 Mix aꞌl junte aku tzꞌok tqꞌoꞌn tibꞌ te tnejilxix pale, qalaꞌ ikytziꞌn, ate Dios k-okil qꞌoꞌnte toklin, tzeꞌnku xi tqꞌoꞌn Dios toklin Aarón tuꞌn tok te tnejilxix pale ojtxe.✡Ex. 28:1. 5 Exsin ikyxjo te Crist, nya ax ok qꞌoꞌnte tibꞌ te tnejilxix qpale, qalaꞌ ax qMan Dios ok qꞌoꞌnte toklin ikyjo, quꞌn ax Dios qꞌmante toj Tuꞌjil Tyol Dios kyjaluꞌn:
Ma tzꞌoka te Nkꞌwala jaꞌlin.
Ex ayiꞌn ma chin ok te Ttatiy.✡Sal. 2:7.
6 Ex ikyxjo ntqꞌmaꞌn toj juntl tumil: A te pale te jun majx, ikyxjo tzeꞌn te Melquisedec.✡Sal. 110:4.
7 Tej attaq Crist tzaluꞌn twutz txꞌotxꞌ, jaw tqꞌajqꞌojil twiꞌ toj tnaꞌj Dios, ex atku maj etz taꞌl twutz, tuꞌn tqꞌaqꞌbꞌil tkꞌuꞌj. Kubꞌsin twutz, ex bꞌijte tuꞌn Dios,✡Mt. 26:36-46; Mr. 14:32-42; Lc. 22:39-46. quꞌn ate Dios at tipin tiꞌj tkyaqilx, expe akutaq klet Jesús tuꞌn toj kyimin. 8 Exsin tuꞌnpaj kꞌwalbꞌaj te Crist te qMan Dios, me iltaq tiꞌj tuꞌn tikyꞌx tuꞌn, tzeꞌnku n-ikyꞌx quꞌn, noq tuꞌn tbꞌant tnimitjo Tyol tMan.
9 Me atzaj tej tjapin bꞌaj tkyaqiljo luꞌn tuꞌn, bꞌeꞌx ok te Kolil te jun majx kyiꞌj kykyaqiljo ayeꞌ kchi kꞌwel niminte. 10 Ex ate Dios ok qꞌoꞌnte te tnejilxix qpale, ikyxjo tzeꞌnku te Melquisedec.
Juntl xobꞌtzbꞌil tuꞌn mi kyij qiꞌjlin qnimbꞌil
11 Ayiꞌy werman, tiꞌjtziꞌn luꞌn, nimxixtl tetz tuꞌn qyolin tiꞌj, ex nim chꞌin t-xilin, tuꞌn t-xi qchikyꞌbꞌiꞌn kyeꞌy, quꞌn kuj chꞌin tuꞌn tel kynikyꞌa te. 12 Ayetzinkyetza, ayiꞌy ojtxe nimilqiꞌy, opetla chi ok kyeꞌ te xnaqꞌtzil jaꞌlin; qalaꞌ ayepel kyeꞌ tuꞌn kyxi xnaqꞌtzit juntl maj tiꞌjjo tnejil xnaqꞌtzbꞌil, a kybꞌiꞌy ojtxe. Qalatziꞌn, ma chi oka tzeꞌn jun tal neꞌẍ, a oꞌkx tajjo tuꞌn tmiꞌẍin, ex ntiꞌ tumil toj twutz, tuꞌn tbꞌant twaꞌn. 13 Ex ayetzinjiꞌy tzeꞌnku neꞌẍ, me toj kynimbꞌila, quꞌn mi nbꞌant kyximiꞌn tzeꞌnku jun tij xjal, a n-el tnikyꞌ te alkye wen ex alkye nya wen.✡1Co. 3:2. 14 Quꞌn atzin xnaqꞌtzbꞌil nim t-xilin, ikyjo tzeꞌnku wabꞌj, a n-ajbꞌin kye xjal, a ma chi tijin, ex te kyeꞌ, at tumil toj kywutz, quꞌn n-el kynikyꞌ te alkye wen ex alkye nya wen.