1 Atzin jaꞌlin, tkyaqiljo ojtxe nimil ma chi bꞌaj qꞌmet, nchi ajbꞌin te jun yekꞌbꞌil te qe jaꞌlin, tuꞌn tja qiꞌn qibꞌ, tuꞌn tjapin bꞌajjo qnimbꞌil. Tuꞌnpetziꞌn, il tiꞌj tuꞌn tkyij qtzaqpiꞌn tkyaqiljo a ntiꞌ tajbꞌin te qe, ex tkyaqiljo il, a nkubꞌ sbꞌunqe tuꞌn qel txalpaj toj qnimbꞌil tiꞌj qMan Dios. 2 Ex qo ximintzintz tiꞌj Jesús, a nejinel qwutz toj qnimbꞌil, ex ma tzqet-xixjo qnimbꞌil tuꞌn. Quꞌn ma tzikyꞌx tuꞌn twutz cruz, ex ma tzꞌel ttxꞌixewe kyuꞌn xjal, tej tkyim. Me xi ttziyin tuꞌn tikyꞌx tuꞌn, quꞌn bꞌiꞌntaq tuꞌn, aj qa ma tzikyꞌxtaq tuꞌn, attaq jun tzaljbꞌil toj kyaꞌj, jaꞌ tuꞌn tkubꞌe qe toj tman qꞌobꞌ Dios kawil tukꞌa.✡Fil. 2:6-11; Eb. 2:9.

3-4 Tuꞌn ikyjo, kyximinkutziꞌn tiꞌjjo Jesús, a Yekꞌbꞌil te qe, nimxjo nya bꞌaꞌn s-ikyꞌx tuꞌn, kyuꞌnxjal aj il. Tuꞌntzintzjo, mina chi sikytiy, ex mina chi kubꞌ numja toj kynimbꞌila, tuꞌn mi chi kubꞌ tzꞌaqiy toj il. Quꞌn naꞌmx tuꞌn tikyꞌx kyuꞌn tzeꞌnku s-ikyꞌx tuꞌn Jesús, a o kyim, noq tuꞌn tpaj il. 5 Ex ma tzꞌel naj toj kykꞌuꞌja a saj tqꞌmaꞌn Dios kyeꞌy, a ayiꞌy kꞌwalbꞌajqiꞌy te. Quꞌn chitzin Diosjo kyjaluꞌn toj Tuꞌjil Tyol:

7 Tuꞌnpetziꞌn, chi weꞌkuxixa toj tkyaqiljo n-ikyꞌx kyuꞌn, ex tzꞌokxit tilil kyuꞌn tzeꞌnku jun kawbꞌil toj kychwinqila, quꞌn axte qMan Dios ntzaj qꞌoꞌnte tumil kyeꞌy tojjo lo, tuꞌn kybꞌeta jikyin wen, quꞌn tuꞌn kꞌwalbꞌajqiꞌy. Ikytziꞌn tzeꞌnku tkyaqil kꞌwal nkubꞌ jikysin tchwinqil tuꞌn ttata, tuꞌn tbꞌet toj tumil, 8 ikyxsinte Diosjo nkubꞌ tjikysin kychwinqiljo jniꞌ tkꞌwal, tuꞌn tqꞌoꞌn tumil kye. Me mej qa mi xkubꞌ tqꞌoꞌn Dios jun tumil tuꞌn kyoka jikyin wen toj kynimbꞌila, nya kꞌwalbꞌajqetza ikyjo, qalaꞌ nyakuj jun sikyꞌaj.

9 Kaꞌntzinjiy qe tej kꞌwalqoxtaq: Ntzajtaq tqꞌoꞌn jun tumil qe, ex atku nqo kawajtz kyuꞌn qtata tzaluꞌn twutz txꞌotxꞌ, ex nchi kubꞌ qnimin, aj kykawin qiꞌj. Qa ikyjo kyukꞌa qtata twutz txꞌotxꞌ, ¿Me yajtzila teꞌ tjaqꞌ tkawbꞌil qTatatz toj kyaꞌj? Quꞌn qa ma kubꞌ qnimiꞌn tumil, a ntzaj tqꞌoꞌn, at qchwinqil tukꞌa te jun majx.

10 Me metzin kye qtata tzaluꞌn twutz txꞌotxꞌ nqo xi kykawin tzeꞌnku n-ele toj kywutz, me noq oꞌkx toj jteꞌbꞌin abꞌqꞌe. Me metzin te qTata Dios nqo tzaj tkawin teꞌ tukꞌa tkyaqil tumil, tuꞌn ttenxix jun bꞌaꞌn te qe, tuꞌntzin qok jikyinxix wen tzeꞌnku te.✡Deu. 8:5; 1Co. 11:31-32.

11 Atziꞌn jaꞌlin, twutzx tetz; ntiꞌ jun te kawbꞌil, a tbꞌanil toj qwutz, aj qtzaj kawin, quꞌn tuꞌn at tkyixkꞌojil. Me nkubꞌ qximinl, at n-ajbꞌine qe, tuꞌn ttzꞌeꞌy qwutz, quꞌn atzin nqꞌoꞌnte qchwinqiljo nikꞌuꞌn ex tbꞌanilx wen.

12 Me ilaꞌ at kyxola tzeꞌnkuꞌ ntzaj nya bꞌaꞌn kyiꞌj, mina nbꞌantl kyjaw weꞌ toj kynimbꞌil. Iky tzꞌelpineꞌ tzeꞌn jun xjal ma qꞌajle tqꞌobꞌ moj qa tqan.✡Is. 35:3. 13 Il tiꞌj tuꞌn tjaw kymojiꞌn, tuꞌn tjaw weꞌ, ex tuꞌn t-xi xket toj jun bꞌe jikyin wen,✡Pr. 4:26. a bꞌinchin kyuꞌn; quꞌn tuꞌntzin mina jaw txalpajeꞌ qanbꞌaj, a qꞌajal, qalaꞌ tuꞌn tqꞌanit.

14 Atzin jaꞌlin, kyqꞌonktziꞌn tilil tuꞌn kynajan tukꞌa jun kymujbꞌil kyibꞌa kyxol kyxjalila, ex tuꞌn kybꞌeta jikyin wen toj kychwinqila, ex tuꞌn tel kypaꞌn kyibꞌa tiꞌj bꞌinchj il. Quꞌn qa mina, nlay chi najaꞌn tukꞌa qMan Dios toj kyaꞌj.

15 Ikytziꞌn, kykaꞌyinktzin kyibꞌa, quꞌn noqtzin kyij kytzaqpiꞌn t-xtalbꞌil qMan Dios. Quꞌn jun xjal ikyjo, a mina tzꞌel tpaꞌn tibꞌ tiꞌj il, iky tzꞌelpineꞌ tzeꞌnku jun tlokꞌ tze xi ttzꞌuꞌbꞌin jun aꞌ kꞌaxix wen. Ex bꞌeꞌx nnajjo tze tkyaqilx.✡Deu. 29:18. Ikyxixsin tzꞌeleꞌ kyxol Ttanim Dios; bꞌeꞌx nchi txalpajjo txqantl nimil tuꞌn jun xjal ikyjo, ex bꞌeꞌx nbꞌaj kyyajin kyibꞌ. 16 Tuꞌnpetziꞌn, kykaꞌyinktzin kyibꞌa tuꞌntzintla ntiꞌ jun twiꞌ kyꞌaꞌjil, a bꞌinchil il, kyxola. Quꞌn kaꞌnpejiy te Esaú toj Tuꞌjil Tyol Dios. Noq tuꞌn tpaj jun twa, el tiꞌjlin a otaq tzaj tqꞌoꞌn Dios te, a nim toklin te tnejil tkꞌwaljo ttata.✡Gen. 25:29-34. 17 Quꞌn bꞌiꞌn kyuꞌn, a tej tjapin bꞌaj ambꞌil te, tuꞌntaq ttzaj tqꞌoꞌn ttata tkyꞌiwbꞌil tibꞌaj, mix xaꞌ tqꞌoꞌntl. Ex ntiꞌtaql tumil tuꞌn tetzinte majl, mixla qa kubꞌsin twutz, ex oqꞌ wen twutz ttata; me ntiꞌtaql tumil tuꞌn tkubꞌ tkꞌuꞌj ttata tuꞌn.✡Gen. 27:30-40.

18 Ayetziꞌn jaꞌlin erman, o chi pon laqꞌey tkꞌatz Dios tuꞌn kynimbꞌila, me nya tzeꞌnku toj Tuꞌjil Tyol Dios ojtxe. Quꞌn nyolin toj Tuꞌjil Tyol Dios tiꞌj jun wutz tzaluꞌn twutz txꞌotxꞌ, a jaꞌ kutze yoline Dios te Moisés, tej ttzaj tqꞌoꞌn tkawbꞌil. A wutz anetziꞌn, at qꞌaqꞌ njulintaq tibꞌaj, ex kubꞌ qxope wen, ex tinin tzeꞌn qꞌankyaq. 19 Ex qꞌajqꞌojin tzeꞌnku chun, ex nyolintaq Dios antza. Ayetzin xjal, ayeꞌ lipajqetaq tiꞌj Moisés, axsa i kyij tene t-xe wutz. Ex noq tuꞌn kyxobꞌil tiꞌj tkyaqiljo lo, xi kyqꞌmaꞌn te Moisés, tuꞌn mina yolin Dios kyukꞌa.✡Ex. 19:16-22; 20:18-21; Deu. 4:11-12; 5:22-27. 20 Quꞌn nimxtaq kyxobꞌil te, quꞌn attaq jun tqanil bꞌiꞌntaq kyuꞌn, a qa nya wen tuꞌn kyjax bꞌet tiꞌjjo wutz, nixpe jun kyqan tuꞌn t-xi kyqꞌoꞌn tibꞌaj. Ex majqexpe kyeꞌ aluꞌmj, noq tuꞌn kybꞌettaq antza, i kubꞌ bꞌyoꞌn kyeꞌ tuꞌn abꞌj, mo noq nchi ok xyuꞌntaq, quꞌn tuꞌn xjanxixtaqjo wutz anetziꞌn.✡Ex. 19:12-13. 21 Quꞌn te xobꞌajilxtaq teꞌ antza, ax Moisés qꞌmante ikyjo, tej ttzaj ttzyuꞌn tkawbꞌil Dios. Chiꞌ kyjaluꞌn: Tzunx nchin luꞌlinx weꞌ, tuꞌn txqan nxobꞌila.✡Deu. 9:19.

22 Ikyjo tzeꞌnku kye ojtxe xjal ntzajtaq kyxobꞌil tuꞌn tkyij kyiꞌjlin tkawbꞌil Dios; ikytzin jaꞌlin, iltzin tiꞌj tuꞌn tkubꞌ qniminxix, tuꞌn mi kyij qiꞌjlin Tyol. Quꞌn atzin jaꞌlin tuꞌn qnimbꞌil, ma qo pon laqꞌe nqayin tkꞌatz qMan Dios toj kyaꞌj, ex nya noq oꞌkx tzaluꞌn twutz txꞌotxꞌ, tzeꞌnku ojtxe.

Me metzin qe jaꞌlin, noq tuꞌn qnimbꞌil, o qo kanin toj kyaꞌj, jaꞌ taꞌyeꞌ wutz, a twutzxix Sion tbꞌi, a jaꞌ nyoline Dios, ex akꞌaj Jerusalén, a Ttanim Dios itzꞌ, ex jaꞌ iteꞌye jniꞌ t-angel Dios, a nchi kꞌulin twutz; 23 ex atzintza kychmomile kyibꞌjo aye tnejil nimil, a aye tkꞌwal qMan Dios, a tzꞌibꞌin kybꞌi tzma toj kyaꞌj. Ex atzintza, najle Dios, a Kawil kyibꞌaj kykyaqiljo qtzan nimil, ayeꞌ tbꞌanilx kubꞌ kybꞌinchin twutz Dios, ex ayeꞌ tzꞌaqleqe wen tuꞌn. 24 Ex ma qo pon tkꞌatz Jesús tej qnimin. Ex noq tuꞌn tchkyꞌel, at qmujbꞌil qibꞌ tukꞌa Dios. Ex noq tuꞌn tchkyꞌel, ma txjet qanmin tuꞌn jun akꞌaj tumil, tuꞌn qkyij toj wen tukꞌa Dios. Quꞌn nya ikyjo tzeꞌnku tchkyꞌel Abel, a bꞌeꞌx qanin tibꞌaj Caín.✡Gen. 4:10. Me metzin te Jesús tchkyꞌel, nya tuꞌn tqanin qibꞌaj, qalaꞌ n-ajbꞌin te qꞌol najsbꞌil qil.

25 Tuꞌnpetzintzjo, kyqꞌonktzintza tilil, noqtzin kyij kyiꞌjliꞌn Tyol Dios. Quꞌn ayetziꞌn, a i kyij iꞌjlin teꞌ Tyol Dios ojtxe tzaluꞌn twutz txꞌotxꞌ, iltaq tiꞌj tuꞌn kykyim. Ikytzin qe jaꞌlin, qa ma kyij qiꞌjlin Tyol, a tzajnin toj kyaꞌj,✡Ex. 20:22. ex nlay qo tzaqpaj te najin toj tqꞌobꞌ Dios, aj qa ma kyij qiꞌjlin qnimbꞌil.

26 Tej tyolin Dios tukꞌa Moisés ojtxe, tzaj luꞌlin txꞌotxꞌ noq tuꞌn Tyol. Me tbꞌajlinxiꞌ ilaꞌ abꞌqꞌe, tqꞌma juntl majl Dios kyjaluꞌn: Juntl majl ok kchi tzajil luꞌlin nya noq oꞌkx txꞌotxꞌ, qalaꞌ majx jniꞌ kyaꞌj.✡Hag. 2:6.

27 Atziꞌn t-xilin yol, a juntl majl, ntqꞌmaꞌn qa il tiꞌj tuꞌn tyuchꞌj tkyaqiljo bꞌaꞌn luꞌlin, a tchꞌiysbꞌin Dios noq tuꞌn Tyol, quꞌn tuꞌn ntiꞌ tqꞌuqil, ex quꞌn tuꞌn kykyij ten tkyaqiljo, ayeꞌ mibꞌin chi luꞌlin. 28 Ex atzin Tkawbꞌil qMan Dios ntzaj tqꞌoꞌn toj qanmin ex toj qchwinqil, nlay tzaj luꞌlin, quꞌn tuꞌn at tqꞌuqil, a Jesús, a Tkꞌwal qMan.

Tuꞌnpetziꞌn, qqꞌoꞌnx chjonte tuꞌn tkyaqiljo luꞌn, ex qo nimsin tbꞌi qMan Dios tukꞌa tkyaqil qanmin ex tukꞌa tchewil Dios qiꞌj, tuꞌntzin ttzalaj Dios qiꞌj. 29 Quꞌn atzin tkawbꞌil qMan Dios ikyjo tzeꞌnku jun nim qꞌaqꞌ, a o kꞌwel bꞌaj tkyaqiljo nya bꞌaꞌn tuꞌn.✡Deu. 4:24; 9:3; Mt. 3:12; 2Tes. 1:7-8.