3
Tej t-xi xkye taqꞌin Juan, a Jawsil Aꞌ
(Mt. 3:1-12; Mr. 1:1-8; Jn. 1:19-28)
1 Nkawintaq te Poncio Pilat toj txꞌotxꞌ te Judey tojjo jweꞌlajaj abꞌqꞌe tjaqꞌ tkawbꞌiljo nmaq kawil toj Rom, Tiberio tbꞌi. Atzinte Herodes tzuntaq nkawin teꞌ toj Galiley; atziꞌn titzꞌin, a Lip tbꞌi, tzuntaq nkawin teꞌ kyoj txꞌotxꞌ te Iturey ex toj Traconit. Ex kawiltaq teꞌ Lisanias toj Abilinia. 2 Ayetaqtziꞌn kye Anás tukꞌa Caifás nmaq paleqetaq kyeꞌ kyxol aj Judiy. Tojjo ambꞌil anetziꞌn ex tojjo jun txꞌotxꞌ jaꞌ ntiꞌyetaq kynajbꞌilxjal, kubꞌ toqxenin Dios Tyol te Juan, a tkꞌwal Zakariy.
3 Tuꞌnpetziꞌn, ate Juan ikyꞌ teꞌ kyojile jniꞌ najbꞌil, a iteꞌtaq nqayin tkꞌatzjo nim aꞌ Jordán tbꞌi, ex tqꞌma kyexjal qa iltaq tiꞌj tuꞌn tajtz tiꞌj kyanmin toj tkyaqil nya bꞌaꞌn toj kychwinqil, ex tuꞌn kykuꞌx toj aꞌ te jawsbꞌil aꞌ, te jun yekꞌbꞌil qa otaq najsit kyil tuꞌn Dios. 4 Iky bꞌajjo tzeꞌnkuxjo otaq ttzꞌibꞌe qtzan Isaías, a yolil Tyol Dios ojtxe. Chiꞌ kyjaluꞌn:
Ex bꞌijte tqꞌajqꞌojil twiꞌ jun aꞌla kujxix wen toj tzqij txꞌotxꞌ, jaꞌ ntiꞌ kynajbꞌilxjal toj, a xi tqꞌmaꞌn kyjaluꞌn:
Kybꞌinchim kyteꞌn twutz qAjaw; kyqꞌoꞌnx kyanmiꞌn teꞌ jikyinxix wen.
5 Tkyaqiljo a nya bꞌaꞌn toj kychwinqila, il tiꞌj tuꞌn ttxꞌixpit;
ikyxjo tzeꞌnku jun bꞌe, a tuꞌn tjikyimixjo, a ma txlaẍ taꞌye,
ex tuꞌn tnojsitjo jniꞌ jul at toj,
ex tuꞌn tbꞌaj jaw pixkꞌitjo ma tij jawnin, aj tul jun nimx toklin.
Ikytziꞌn, il tiꞌj tuꞌn qbꞌinchinte tkyaqil, tuꞌntzin bꞌantnin qten, aj tul qAjaw.
6 Quꞌn kykyaqilx kyexjal kchi kaꞌyil tiꞌjjo tkolbꞌil qMan Dios, a ktzajil tsmaꞌn.✡Is. 40:3-5.
7 Atzaj teꞌ kyetzxjal tuꞌn kykuꞌx toj aꞌ te jawsbꞌil aꞌ tuꞌn Juan, xi tqꞌmaꞌn kye kyjaluꞌn:
Ntiꞌx kyeꞌ kyajbꞌin, ikyqexjiy tzeꞌnku jun chꞌuq maꞌ kan.✡Mt. 12:34; 23:33. ¿Ma noqtzin tuꞌnjo jawsbꞌil aꞌ, aku chi kleta toj tyabꞌ twiꞌ Dios kujxix wen, a chꞌix tul kanin? 8 Quꞌn ojtzqiꞌn kyuꞌn kykyaqilxjal, qa axjo kybꞌinchbꞌiꞌn nyekꞌinte qa naꞌm tajtz tiꞌj kyanmiꞌn. ¿Tzeꞌntzin tten nkubꞌ kyximiꞌn kyxola, qa aku chi kleta noq tuꞌn Judiyqiꞌy, a tyajil qtzan Abraham,✡Jn. 8:33. ex nya tuꞌn tajtz tiꞌj kyanmiꞌn? Tunpetziꞌn, kxel nqꞌmaꞌn kyeꞌy, noqpetzin at kolbꞌiltz ikyjo, majqexpetla kyeꞌ abꞌj luꞌn, aku chi ok tqꞌoꞌn Dios te tyajil Abraham, tuꞌn kyklet. 9 Tuꞌnpetziꞌn, chꞌix tul tkawbꞌil Dios kujxix kyibꞌaj kykyaqiljo, ayeꞌ kykyꞌeꞌ tuꞌn tajtz tiꞌj kyanmin, ikyxjo tzeꞌnku tajaw jun wiꞌ tze kjawil ttxꞌemin, qa ntiꞌ twutz n-el. Ex a tze, a ntiꞌ tajbꞌin, k-okix toj qꞌaqꞌ; ikyxsin kchi tenbꞌilajiꞌy qa mi s-ajtz tiꞌj kyanmiꞌn.✡Mt. 7:19.
10 Ayetzin kyej xjaltz antza xi kyqanin te kyjaluꞌn: ¿Tiꞌtzin aku kubꞌ qbꞌinchintza?
11 Xitzin ttzaqꞌwin Juantz: Ankye teꞌ at kabꞌe t-xbꞌalin, il tiꞌj tuꞌn t-xi tqꞌoꞌn jun teꞌ a ntiꞌ at te; ex ankye teꞌ at twa, il tiꞌj tuꞌn t-xi tqꞌoꞌn chꞌin teꞌ a ntiꞌ.
12 Ex i tzaj laqꞌe junjun kyej xjal, tuꞌn kykuꞌx toj aꞌ te jawsbꞌil aꞌ. Ayetzin xjal anetziꞌn, a peyil pwaqqetaq toj tkawbꞌil Rom.✡Lc. 7:29. Me nej xi kyqanin te Juan kyjaluꞌn: Ay xnaqꞌtzil, ¿Yajtzin qeꞌ? ¿Tiꞌn qeꞌ kꞌwel qbꞌinchin?
13 Xitzin ttzaqꞌwin Juan: Mi tzꞌel kypeyin chꞌintla tibꞌajjo qꞌmaꞌntz kyeꞌy, chiꞌ.
14 Ex iteꞌ junjuntl xoꞌl qꞌaqꞌ i xi qaninte te kyjaluꞌn: ¿Yajtzin qetza? ¿Tiꞌn qeꞌ kꞌwel qbꞌinchin?
Xi tqꞌmaꞌn kye kyjaluꞌn: Ikyxjo kyeꞌ, mina tzꞌok kyxobꞌtzin jun aꞌla, ex mina txi kypatiꞌn jun aꞌla, a ntiꞌ tbꞌinchbꞌin nya bꞌaꞌn, ex mina tzꞌel kyiꞌn jun tiꞌ te jun aꞌla; qalaꞌ qe kykꞌuꞌja tiꞌjjo twiꞌ kykꞌuꞌja n-etz.
15 Jotqex kyej xjal tzuntaq chi ayon kyeꞌ, ex tzuntaq chi ximin kyeꞌ toj kynabꞌl, qa ataq te Juan a Crist, a Kolil, a otaq tzaj qꞌoꞌn toklin tuꞌnx Dios. 16 Me atzin te Juan xi qꞌmante kye kyjaluꞌn: Me metzin weꞌ, nchi kux nqꞌoꞌn xjol toj aꞌ te jawsbꞌil aꞌ, te jun yekꞌbꞌil qa ma tzꞌajtz tiꞌj kyanmin. Me ante tzul wiꞌjxiy nya noq oꞌkx tuꞌn kykuꞌxxjal tuꞌn toj aꞌ, qalaꞌ kxel tqꞌoꞌn Xewbꞌaj Xjan toj kyanmin te jun majx te patbꞌil jniꞌ il toj. Quꞌn at nimxixtl tipin tzeꞌnku weꞌ, ex ntiꞌ we woklin nipe tuꞌn woka te taqꞌnil. 17 Quꞌn luꞌ Kawil kkawil kyibꞌaj xjal tzeꞌnku jun aj triyil, a qꞌiꞌn ma nim tze toj tqꞌobꞌ te xtulbꞌil triy. Ex k-elix tpaꞌn kykyaqilxjal wen kyxoljo nya wen, ikyxjo tzeꞌnku jun xjal, aj t-xtulin triy, ex k-elil tpaꞌn paj tiꞌj. Ex kchi xel tkꞌleꞌn nimil toj kyaꞌj tzeꞌnku tuꞌn tkux tkꞌuꞌn triy toj ttxꞌutxꞌ. Me ayetzin nya nimil, ikyxjo tzeꞌnku paj, ok kchi kꞌwel tpatin tukꞌa qꞌaqꞌ, a mixla k-yupjilx.
18 Nimku tumil bꞌaj tqꞌmaꞌn Juan kyexjal, tej tqꞌmetj Tbꞌanil Tqanil. 19 Ex majxpe teꞌ aj kawil, Herodes tbꞌi, xi tmiyoꞌn Juan, a Jawsil Aꞌ, quꞌn tuꞌn otaq tzꞌok t-xuꞌjlin Herodías, a t-xuꞌjil Lip, a titzꞌin. 20 Nya wen ele ikyjo toj twutz Herodes; bꞌeꞌx xi tqꞌmaꞌn tuꞌn tkux jpet Juan toj tze.✡Mt. 14:3-4; Mr. 6:17-18. Tuꞌntzin ikyjo, bꞌeꞌx chmet nim til twutz Dios.
Tej tkuꞌx Jesús toj aꞌ te jawsbꞌil aꞌ
(Mt. 3:13-17; Mr. 1:9-11)
21 Ikytzin bꞌajjo, tej naꞌmxtaq tuꞌn tkuꞌx Juan toj tze. Tej nchi kuꞌxtaq tqꞌoꞌn Juan xjal toj aꞌ te jawsbꞌil aꞌ, ikyxl te Jesús bꞌeꞌx kuꞌx toj aꞌ tuꞌn, te jawsbꞌil aꞌ. Ex tzuntaqtzin nnaꞌnxi Jesús Dios, jun paqx xi jaqpajjo kyaꞌj, 22 ex atziꞌn Xewbꞌaj Xjan kꞌul kanin tibꞌaj, ex iky kaꞌyiꞌn tzeꞌnku jun palom. Ex qꞌajqꞌojin jun yol toj kyaꞌj, ex tqꞌma: Axixpen te nkꞌwala, kꞌuꞌjlinxix wuꞌn, a o jaw nskꞌoꞌn.✡Is. 42:1; Mt. 12:18; 17:5; Mr. 9:7; Lc. 9:35.
Aye t-xeꞌchil jaꞌ saja Crist
(Mt. 1:1-17)
23 Bꞌalaqa lajaj toj kaꞌwnaq*Lajaj toj kaꞌwnaq, 30 n-ele. te Jesús tabꞌqꞌe, tej t-xi t-xikybꞌiꞌn tkyaqil taqꞌin. Qꞌumlaj qa kꞌwalbꞌaj te Jse, tzeꞌnkuxtaqjo tqanil kyxolxjal. Atzin te Jse kꞌwalbꞌajtaqpen teꞌ te Elí. 24 Ataqtzin teꞌ Elí, kꞌwalbꞌajtaq teꞌ te Matat, a tkꞌwaltaq Leví, a tkꞌwaltaq Melkí, a tkꞌwaltaq Jana, a tkꞌwaltaq Jse. 25 Atzin te Jse tkꞌwaltaql te Matatías, a tkꞌwaltaq Amós, a tkꞌwaltaq Nahum, a tkꞌwaltaq Esli, a tkꞌwaltaq Nagai. 26 Ataqtzin te Nagai kꞌwalbꞌajtaq teꞌ te Maat, a tkꞌwaltaq Matatías, a tkꞌwaltaq Semei, a tkꞌwaltaq Josec, a tkꞌwaltaq Judá. 27 Ataqtzin te Judá kꞌwalbꞌajtaq teꞌ te Joanán, a tkꞌwaltaq Resa, a tkꞌwaltaq Zorobabel, a tkꞌwaltaq Salatiel, a tkꞌwaltaq Neri. 28 Ataqtzin te Neri kꞌwalbꞌajtaql teꞌ te Melkí, a tkꞌwaltaq Adi, a tkꞌwaltaq Cosam, a tkꞌwaltaq Elmadam, a tkꞌwaltaq Er. 29 Ataqtzin te Er kꞌwalbꞌajtaqtzinl teꞌ te Josué, a tkꞌwaltaq Eliezer, a tkꞌwaltaq Jorim, a tkꞌwaltaq Matat, 30 a tkꞌwaltaq Leví, a tkꞌwaltaq Simeón, a tkꞌwaltaq Judá, a tkꞌwaltaq Jse, a tkꞌwaltaq Jonam, a tkꞌwaltaq Eliaquim. 31 Ataqtzin te Eliaquim kꞌwalbꞌajtaql teꞌ te Melea, a tkꞌwaltaq Mena, a tkꞌwaltaq Matata, a tkꞌwaltaq Natán. 32 Ataqtzin te Natán kꞌwalbꞌajtaql teꞌ te David, a tkꞌwaltaq Isaí, a tkꞌwaltaq Obed, a tkꞌwaltaq Booz, a tkꞌwaltaq Sala, a tkꞌwaltaq Naasón. 33 Ataqtzin te Naasón kꞌwalbꞌajtaql teꞌ te Aminadab, a tkꞌwaltaq Admin, a tkꞌwaltaq Arni, a tkꞌwaltaq Esrom, a tkꞌwaltaq Fares, a tkꞌwaltaq Judá. 34 Ataqtzin te Judá kꞌwalbꞌajtaqtzin teꞌ te Jacob, a tkꞌwaltaq Isaac, a tkꞌwaltaq Abraham, a tkꞌwaltaq Taré, a tkꞌwaltaq Nacor, 35 a tkꞌwaltaq Serug, a tkꞌwaltaq Ragau, a tkꞌwaltaq Peleg, a tkꞌwaltaq Heber, a tkꞌwaltaq Sala. 36 Ataqtzin te Sala kꞌwalbꞌajtaqtzin teꞌ te Cainán, a tkꞌwaltaq Arfaxad, a tkꞌwaltaq Sem, a tkꞌwaltaq Noé, a tkꞌwaltaq Lamec, 37 a tkꞌwaltaq Matusalén, a tkꞌwaltaq Enoc, a tkꞌwaltaq Jared, a tkꞌwaltaq Mahalaleel, a tkꞌwaltaq Cainán. 38 Ataqtzin te Cainán kꞌwalbꞌajtaqtzin teꞌ te Enós, a tkꞌwaltaq Set, a tkꞌwaltaq Adán. Ataqtzin te Adán tzajnin te Dios.