Tuꞌj Matey
Matey tbꞌi jun xjal peyil pwaq, a ikyꞌin kyuꞌn t-xjalil, aye aj Judiy. Me kyij ttzaqpiꞌn taqꞌin, tuꞌn t-xi lipe tiꞌj Jesús, ex tuꞌn tok te jun t-xnaqꞌtzbꞌin.
Kubꞌ ttzꞌibꞌin Mateyjo uꞌj lo, a tnejil uꞌj toj tkyajin Tbꞌanil Tqanil (evangelios) toj Akꞌaj Tuꞌjil Tyol qMan. Ntzaj tchikyꞌbꞌin t-xnaqꞌtzbꞌil Jesús, exsin ntzaj tyekꞌin qa ate Jesús nmaq kawil kye xjal aj Judiy. Noq tuꞌn Jesús, japin bꞌaj tkyaqil t-xilin Tyol Dios, a tzajnin toj Ojtxe Tuꞌjil.
Ajo Matey, o tzyetjo tuꞌj tukꞌa jun tqanil kyiꞌj t-xeꞌchil Jesús, ex junjun tqanil tiꞌjjo o bꞌaj tiꞌj Jesús toj tqꞌayil. Ex ntzaj tqꞌmaꞌn qe ilaꞌku maj tiꞌjjo tbꞌinchbꞌin ex t-xnaqꞌtzbꞌil Jesús.
Kyojjo capítulos 26-28 nyolin Matey tiꞌjjo tkyimlin Jesús, ex tej tjaw anqꞌin juntl majl kyxol kyimnin, tuꞌn tok te Nmaq Kawil ex Kolil, me nya noq oꞌkx kye aj Judiy, qalaꞌ tkyaqil chꞌuq xjal twutz txꞌotxꞌ. Ex ikyxjo, xi tqꞌmaꞌn kye, a lipcheqektaq tiꞌj, tuꞌn kyxiꞌ qꞌmalte Tbꞌanil Tqanil te tkyaqil xjal twutz txꞌotxꞌ, tuꞌn kyok te t-xnaqꞌtzbꞌin qAjaw.
1
Aye t-xeꞌchil jaꞌ saje Crist
(Lc. 3:23-38)
1 Atzin te luꞌn atzin tajlal t-xeꞌchil Jesucrist, a tzajnin tiꞌj qtzan David ex tiꞌj qtzan Abraham:✡Gen. 12:1-3.
2 Ante Abraham, ttata Isaac, a ttata Jacob, a ttata Judá junx kyukꞌa ttziky ex titzꞌin. 3 Ante Judá tukꞌa Tamar, ayeꞌ kytata Fares tukꞌa Zara. Ante Fares ttata Esrom, a ttata Aram, 4 a ttata Aminadab, a ttata Naasón, a ttata Salmón. 5 Ante Salmón tukꞌa Rahab, ayeꞌ ttata Booz, ex ante Booz tukꞌa Rut, ayeꞌ ttata Obed, a ttata Isaí. 6 Ante Isaí, ttata David, a nmaq kawiltaq. Ante David ttata Salomón, a taljo t-xuꞌjlbꞌin Urías. 7 Ante Salomón ttata Roboam, a ttata Abías, a ttata Asa, 8 a ttata Josafat, a ttata Joram, a ttata Uzías, 9 a ttata Jotam, a ttata Acaz, a ttata Ezequías, 10 a ttata Manasés, a ttata Amón, a ttata Josías, 11 a ttata Jeconías kyukꞌa txqantl titzꞌin, a teꞌ kyxi jtzꞌoꞌn aj Israel tzmax toj txꞌotxꞌ te Babilonia.✡2Re. 24:10-15; 2Cr. 36:10; Jer. 27:19-22.
12 Axsa toj Babilonia ante Jeconías ok te ttata Salatiel, a ttata Zorobabel, 13 a ttata Abiud, a ttata Eliaquim, a ttata Azor, 14 a ttata Sadoc, a ttata Akim, a ttata Eliud, 15 a ttata Eleazar, a ttata Matán, a ttata Jacob, 16 a ttata Jse, a tchmil Mariy, a tnana Jesús, a ok tbꞌi te Crist, a skꞌoꞌnxix tuꞌn Dios tuꞌn tok te Kolil.
17 Ikytziꞌn, attaq kyajlajaj tyajil tzajnin tiꞌj Abraham tzmaxiꞌ tej tul itzꞌje David; ex kyajlajaj tyajil tzajnin tiꞌj David, tej kyxi jtzꞌoꞌn aj Israel tzmax toj txꞌotxꞌ te Babilonia. Ex attaq kyajlajaj tyajil tzajnin, atxix teꞌ kyxi jtzꞌoꞌnxjal toj Babilonia tzmax tej tul itzꞌje Crist.
Ajo titzꞌjlin Jesús
(Lc. 2:1-7)
18 Atzin titzꞌjlin Jesucrist ikytziꞌn kyjaluꞌn:
Ante Mariy, a tnana, otaq bꞌant tiꞌj, tuꞌn tmeje tukꞌa Jse.✡Lc. 1:26-27. Me tej naꞌmtaqx kykubꞌ kẍe junx, bꞌeꞌx ok tzꞌaq tal Mariy, noq tuꞌn tipin Xewbꞌaj Xjan. 19 Me ante Jse, a tuꞌn toktaq te tchmil, tej tok tkaꞌyin qa otaq tzꞌok tzꞌaq tal Mariy, kubꞌ t-ximin tuꞌn tkubꞌ tpaꞌn tibꞌ tukꞌa, quꞌn jun ichin tzꞌaqle, ex kubꞌ t-ximin qa noq otaq skꞌon Mariy tal. Me tkyꞌeꞌtaq tuꞌn tel tqanil kywutzxjal, tuꞌntzintla mi kubꞌ kybꞌinchinxjal mibꞌin tiꞌj Mariy; qalaꞌ kubꞌ t-ximin tuꞌn chebꞌetaq tuꞌn tkubꞌ tpaꞌn tibꞌ tukꞌa toj ewajil.
20 Ex tzmataq nximin tiꞌjjo lo, ok tyekꞌin jun t-angel qAjaw tibꞌ te toj wutzikyꞌ, ex xi tqꞌmaꞌn te: Jse, ay tyajil qtzan nmaq kawil David. Mi xobꞌa tuꞌn tjaw mejey tukꞌa Mariy, quꞌn atzin tal k-itzꞌjil nya tkꞌwal jun ichin, qalaꞌ tuꞌn Xewbꞌaj Xjan. 21 Quꞌn k-itzꞌjil jun tal qꞌa, ex k-okil tqꞌoꞌn tbꞌi Jesús.✡Lc. 1:31. K-okil tbꞌi ikyjo, quꞌn kchi kletil xjal toj il tuꞌn.✡Sal. 130:8.
22 O bꞌaj tkyaqiljo lo, noq tuꞌn tjapiꞌn yol tzaj tqꞌmaꞌn qAjaw tuꞌn yolil Tyol Dios ojtxe, tej tqꞌma:
23 Jun tal txin, a naꞌmxtaq tlonte ichin,
ex tzul itzꞌje jun tal tal qꞌa.
Ex k-okil juntl tbꞌi Emanuel,✡Is. 7:14.
a ntqꞌmaꞌn qa Dios qukꞌa.
24 Tej tjaw sakꞌpaj Jse toj twatl, kubꞌ tbꞌinchin tzeꞌnkuxjo otaq tqꞌma t-angel qAjaw te, ex bꞌeꞌx xi tkꞌleꞌn Mariy te t-xuꞌjil. 25 Me mix i kubꞌe kẍe junx, tzmaxiꞌ tej tul itzꞌje tnejil tal, a qꞌa, a otaqxi tzꞌok tzꞌaq. Ex ok tqꞌoꞌn tbꞌi Jesús.✡Lc. 2:21.