1 Ex xi tqꞌmaꞌnl Jesús kye: Twutzxix kxel nqꞌmaꞌn kyeꞌy; at junjun iteꞌ tzaluꞌn wukꞌiy, mi kyli kyimin, tzmaxi aj kylonte nimku tipin Tkawbꞌil Dios tzaluꞌn twutz txꞌotxꞌ.

2 Tbꞌajlinxiꞌ qaq qꞌij, i xi tkleꞌn Jesús oxe t-xnaqꞌtzbꞌin tukꞌa, a Pegr, Santyaw exsin Juan, ex i kanin twiꞌ jun wutz.✡2Pe. 1:17-18. Kywutzx t-xnaqꞌtzbꞌin, txꞌixpitjo kaꞌyin. 3 Ex t-xbꞌalin ox qoptzꞌajx wen, manyor sjaninx tzeꞌnku jun bꞌuꞌẍ, a aꞌkxtaq tbꞌaj txjet. 4 Iwletzin Jesús kyuꞌn t-xnaqꞌtzbꞌin nchi yolintaq kyukꞌa Elías✡1Re. 17—22; 2Re. 1:1—2:12. ex Moisés.✡Ex. 2—4; 18; 33—34. 5-6 Bꞌeꞌx i xobꞌxjo t-xnaqꞌtzbꞌin, teꞌ kylonte ikyjo. Ante Pegr ntiꞌl tumil jyet tuꞌn; oꞌkx xi tqꞌmaꞌn te Jesús:

¡Xnaqꞌtzil! Tbꞌanilx teꞌ otoꞌ tzaluꞌn. Kꞌaꞌ kubꞌ qbꞌinchiꞌn oxe tal pach;✡Lv. 23:39-43. jun te, ex jun te Moisés, ex jun te Elías.

7 Texjo paq, tej tkubꞌ juktzꞌaj jun muj kyibꞌaj. Ex tojjo muj etz yolin jun tqꞌajqꞌojil, ex tqꞌma: Axixpen wejiꞌy Nkꞌwal lo kꞌuꞌjlinxix wuꞌn.✡Mt. 3:17; Mr. 1:11; Lc. 3:22. ¡Kybꞌinkujiꞌy Tyol!

8 Atzaj teꞌ t-xi kykaꞌyin t-xnaqꞌtzbꞌin kyiꞌjile, mix aꞌl kyli, oꞌkxl Jesús.

9 Teꞌ kymeltzꞌaj twiꞌ wutz, xi toqxeninxix Jesús kyeꞌ kyjaluꞌn: Mix alqe kxele kyqꞌmaꞌnjiꞌy a ma kyliy, tzmaxi aj njatz anqꞌin, a ayiꞌn Tkꞌwal Ichin, kyxol kyimnin, chiꞌ.✡Mr. 5:43.

10 Ex mix al qe txi kyqꞌmaꞌne; noq kyij ten kyxolx, me nchi yolintaq tzeꞌn tzꞌelpineꞌ yol, a tuꞌn tjaw anqꞌin juntl majl.

11 Xi kyqanin te Jesús: ¿Tzeꞌntzin ttentz nkyqꞌmaꞌn xnaqꞌtzil tiꞌj ojtxe kawbꞌil, qa ataq Elías tuꞌn tul nej twutza?✡Mal. 4:5; Mt. 11:14. ¿Nyapela tiꞌjjo lo nchi yolinetaq, a ma qliꞌy?

12 I xi ttzaqꞌwin Jesús: Twutzx teꞌ. Ate Elías tuꞌntaq tul nej, tuꞌntzintla noq bꞌinchil kytenxjal, aj wula. Me ntqꞌmaꞌntl Tuꞌjil Tyol Dios qa nimx tuꞌn tikyꞌx tuꞌn Tkꞌwal Ichin, ex qa tuꞌn tel ikyꞌin kyuꞌn xjal.✡Is. 53:3; Sal. 22:1-18; 69:8-11, 20-21; 118:22. 13 Ex kxel nqꞌmaꞌn kyeꞌy, o tzul te Elías, quꞌn ate Juan, a Jawsil Aꞌ, ul te t-xel. Ex kubꞌ kybꞌinchinxjal tiꞌj tzeꞌnkuxtaq kyaj, ikyxjo tzeꞌnku ntqꞌmaꞌn Tyol Dios.✡Mt. 11:13-14; 17:11-13.

14 Kykꞌulinxi twiꞌ wutz kyukꞌa oxe t-xnaqꞌtzbꞌin kykꞌatzjo txqantl, ayeꞌ nchi yolintaql kyukꞌa xnaqꞌtzil tiꞌj ojtxe kawbꞌil, ex attaql txqan xjal kyiꞌjile. 15 Teꞌ tiwle kyuꞌnxjal, chꞌixtaq tkanin kykꞌatz, i jaw kaꞌylaj, ex bꞌeꞌx i el rinin qꞌolbꞌilte Jesús.

16 Xitzin tqanin Jesús kyexjal: ¿Tiꞌtzin nkyyoliꞌn kyukꞌa nxnaqꞌtzbꞌiꞌn?

17 Tzajtzin ttzaqꞌwin jun ichin kyxoljo txqan xjal: Xnaqꞌtzil, ma tzaj wiꞌn nkꞌwala twutza, tuꞌn tkubꞌ tqꞌaniꞌn, quꞌn mina nbꞌant tyolin, tuꞌn tzyuꞌn tuꞌn jun taqꞌnil tajaw il. 18 Noq ja taꞌ, aj ttzaj tiꞌj, ex bꞌeꞌx nkubꞌ tzꞌaq tuꞌn, ex nbꞌaj n-etz plut toj ttzi, tzunx nchi juꞌchꞌin tste, ex bꞌeꞌx n-el ttxꞌiꞌlin tibꞌ. Ma txi ntqꞌmaꞌn kye t-xnaqꞌtzbꞌiꞌn, tuꞌn tex kylajoꞌn taqꞌnil tajaw il toj tanmin, me mina n-ex kyuꞌn.

19 Xi tqꞌmaꞌn Jesús kye t-xnaqꞌtzbꞌin: Ntiꞌxsin kynimbꞌila tiꞌj Dios. ¿Jteꞌxsin qꞌij nkubꞌlin ten kyxola, ex naꞌmxsin tok qeꞌ kykꞌuꞌja wiꞌja? ¿Jteꞌxsila qꞌij kkyꞌelixjo ikyjo wuꞌn? Qꞌintzinjiy qꞌa, chiꞌ.

20 Xitzin kyiꞌntz. Atzin teꞌ tiwle Jesús tuꞌn taqꞌnil tajaw il, tzaj kyimin tiꞌjjo qꞌa ex jaw luꞌlin. Kubꞌ tzꞌaq, ex jaw ttolin tibꞌ twutz txꞌotxꞌ, ex bꞌajetz plut toj ttzi.

21 Xitzin tqanin Jesús teꞌ ttata: ¿Jteꞌxitzin qꞌij ttzyetlin tuꞌn ikyjo? chiꞌ.

Xi ttzaqꞌwiꞌn ttata: Atxixjo te muchꞌxtaq. 22 Ilaꞌ maj o txiꞌxi tzꞌaq toj qꞌaqꞌ ex toj aꞌ tuꞌn tkyim. Qa aku bꞌant jun tiꞌ tuꞌn tiꞌj, qꞌaqꞌintzin tkꞌuꞌja qiꞌja; qꞌaninkutzin chꞌin.

23 Xi tqꞌmaꞌn Jesús te: Atzin ntzaj tqꞌmaꞌn weꞌy, qa aku bꞌant jun tiꞌ wuꞌn tiꞌj tkꞌwala. Kaꞌn. Bꞌinkutziꞌn. Qa at jun xjal at tnimbꞌil wiꞌja, tkyaqilx aku bꞌant wuꞌn tiꞌj.✡Fil. 4:13.

24 Atzin ttata qꞌa jaw ẍchꞌin, ex xi tqꞌmaꞌn: Qꞌuqle weꞌ nkꞌuꞌj tiꞌja. Me chin tmojintza tuꞌn tok qexix wen. 25 Teꞌ tok tkaꞌyin Jesús nimx xjal nbꞌaj rinin tuꞌn kykanin tkꞌatz, xi tqꞌmaꞌn te taqꞌnil tajaw il: Noq tuꞌn tpaja, mina nbꞌant tbꞌiꞌn ex tyolin qꞌa. Kxel nqꞌmaꞌn teꞌy, tuꞌn tetza toj tanmin, ex tuꞌn mina tzꞌokx majla.

26 Atzin taqꞌnil tajaw il jaw ẍchꞌin wen, ex tbꞌinche tuꞌn ttzaj junl majl kyimin tiꞌjjo qꞌa, ex bꞌeꞌx etzkux toj tanmin, ex kyij tqꞌoꞌn tzeꞌnku jun kyimnin. Nimxl xjal qꞌmante qa otaq tzꞌel kyim te jun majx. 27 Me ante Jesús jaw t-xkoꞌn ex kubꞌ twaꞌbꞌin.

28 Tetziꞌn tokx Jesús kyukꞌa t-xnaqꞌtzbꞌin toj jun ja kyjunalx, xi kyqanin t-xnaqꞌtzbꞌin te: ¿Tzeꞌntzin tten mi xbꞌant qe qlajon teꞌ taqꞌnil tajaw il toj tanminjo qꞌa? chi chiꞌ.

29 I xi ttzaqꞌwin Jesús: Atzin taqꞌnil tajaw il ikyjo, nbꞌant tlajet noq tukꞌa naꞌj Dios.

30 Kyikyꞌlinxi antza, i ikyꞌku toj Galiley. Tkyꞌeꞌtaq Jesús tuꞌn tel tqanil, 31 quꞌn nchex t-xnaqꞌtzintaqjo t-xnaqꞌtzbꞌin. Ex nxitaq tqꞌmaꞌn kye: Ayintziꞌn Tkꞌwal Ichin, skꞌoꞌnqiꞌn tuꞌn Dios, kchin xel qꞌoꞌn kyeꞌ xjal, tuꞌn nkubꞌ kybꞌyoꞌn, chiꞌ. Aj nkyima, me toj toxin qꞌij, kchin jawitz anqꞌin juntl majl.

32 Minataq n-el kynikyꞌ te tiꞌtaq tzꞌelpine yol ikyjo, quꞌn nchi xobꞌtaq tuꞌn t-xi kyqanin.

33 Kykaninxitzin toj Capernaum; i okx toj jun ja, ex xi tqanin Jesús kye: ¿Titziꞌn nkyyolintaqa toj bꞌe?

34 Me noq i bꞌaj kubꞌ mutxe tuꞌn kytxꞌixew, quꞌn otaq bꞌaj kubꞌ kyyolintaq alkye nimxtaq toklin kyxol.✡Lc. 22:24.

35 Kubꞌ qe Jesús, ex i xi ttxkoꞌn t-xnaqꞌtzbꞌin tkꞌatz, exsin xi tqꞌmaꞌn kye: Alkye taj tuꞌn tok te tnejil kyxol xjal, ilx tiꞌj tuꞌn tok te tchꞌibꞌil, ex tuꞌn tajbꞌin kye txqantl.✡Mt. 20:26-27; 23:11; Mr. 10:43-44; Lc. 22:26.

36 Tzaj ttxkoꞌn Jesús jun tal kꞌwal, ex kubꞌ twaꞌbꞌin kyxolx, ex jaw tchleꞌn. Xi tqꞌmaꞌn kye: 37 Alkye kxel kꞌmonte jun tal kꞌwal tzeꞌnku lo, noq tuꞌn tnimbꞌil tiꞌj nbꞌiꞌy, nya noq oꞌkxjo kꞌwal kxel tkꞌmoꞌn, qalaꞌ majqinxa; ex atziꞌn xjal kxel kꞌmon weꞌy, nya noq oꞌkqinxa kchin xel tkꞌmoꞌn, qalaꞌ majxjo Dios, a tzaj chqꞌoꞌn weꞌy.✡Mt. 10:40; Lc. 10:16; Jn. 13:20.

38 Xi tqꞌmaꞌn Juan te Jesús: Xnaqꞌtzil, o qli qeꞌ jun xjal, a nchi etzjo jniꞌ taqꞌnil tajaw il toj kyanminxjal tuꞌn, noq toj tumil tbꞌiy, me nya jun qukꞌa. Tuꞌnpetzintzjo, kyij qqꞌmaꞌn teꞌ, tuꞌn mina kubꞌ tbꞌinchintaqljo ikyjo.

39 Me ante Jesús xi tqꞌmaꞌn kye: ¡Mina txi kyqꞌmaꞌn kye ikyjo! Quꞌn alkyeꞌ nkubꞌ tbꞌinchin jun tiꞌ wen nimx toklin tiꞌj nbꞌiꞌy, nya ajqꞌoj wiꞌja, ex nlay jaw yolbꞌin wiꞌja. 40 Quꞌn atziꞌn luꞌn nya qiꞌjbꞌinxi taꞌ, qukꞌa taꞌ teꞌ.✡Mt. 12:30; Lc. 11:23. 41 Aꞌlchaqx kye jun xjaltz tzaj qꞌoꞌnte chꞌin tiꞌ kyeꞌy, iꞌchaqx noq jun tal pulbꞌil aꞌ, quꞌn tuꞌn weqiꞌy, twutzxix kxel nqꞌmaꞌn, ok ktzajil chjon teꞌ tuꞌn Dios.✡Mt. 10:42.

42 Alkye jun xjal tjoy ttxolil tzeꞌn tten, tuꞌn tkubꞌ tzꞌaq jun muchꞌ kꞌwal tiꞌj tnimbꞌil wiꞌja, wenpetla te te, tuꞌn tok tkꞌloꞌn jun abꞌj te chebꞌl triy tiꞌj tqul, exsintla xi t-xoꞌn tibꞌ toj aꞌ, tuꞌn tkyim. 43 Qa noq tuꞌn tpaj jun tqꞌobꞌa mo jun tqan, aku kubꞌ tzꞌaqiy toj il, bꞌantla tuꞌn tel ttxꞌemin, exsin tuꞌn tokxa toj kyaꞌj tukꞌa junchꞌin tqꞌobꞌa, tzeꞌnkuljo tuꞌn t-xiꞌy toj qꞌaqꞌ tukꞌa kykabꞌil.✡Mt. 5:30. 44 Toj qꞌaqꞌ, aye ẍchuqꞌ mina nchi kyim, ex mina nyupjjo qꞌaqꞌ.*Nya toj tkyaqil Tuꞌjil Tyol qMan jaꞌ taꞌye v. 44. 45 Ikyxjo qa tuꞌn tpaj tqan, aku kubꞌ tzꞌaqiy toj il, bꞌantla tuꞌn tel ttxꞌemin, exsin tuꞌn tokxa toj kyaꞌj noq tukꞌa junchꞌin tqan, tzeꞌnkuljo tuꞌn t-xiꞌy toj qꞌaqꞌ tukꞌa kykabꞌilx, 46 quꞌn toj qꞌaqꞌ, aye ẍchuqꞌ mina nchi kyim ex mina nyupjjo qꞌaqꞌ.†Nya toj tkyaqil Tuꞌjil Tyol qMan jaꞌ taꞌye v. 46. 47 Ikyxjo qa noq tuꞌn tpaj twutza, aku kubꞌ tzꞌaqiy toj il, wenitla tuꞌn tetz tiꞌn, exsin tuꞌn tokxa toj kyaꞌj jaꞌ nkawine Dios, tukꞌa junchꞌin twutza, tzeꞌnkuljo tuꞌn t-xiꞌy toj qꞌaqꞌ tukꞌa kykabꞌilx,✡Mt. 5:29. 48 quꞌn toj qꞌaqꞌ, aye ẍchuqꞌ mina nchi kyim, ex mina nyupjjo qꞌaqꞌ.✡Is. 66:24.

49 N-ajbꞌin te atzꞌin tiꞌj chibꞌj, tuꞌn mi junxiyixe.✡Lv. 2:13. Ikyqexsin qeꞌ, kkyꞌelix tiꞌchaqku tiꞌ quꞌn, tuꞌn mina qox toj il. 50 Nimx n-ajbꞌine atzꞌin te aqꞌbꞌil ttxutxjil qchiꞌ. Me tzꞌelit naj tpitzꞌmejil, ntiꞌ aku tzꞌajbꞌine qe.✡Mt. 5:13; Lc. 14:34-35. Tzꞌelit tnaj tpitzꞌmejil, ikyxjo tzeꞌnku jun xjal tzꞌel naj twenil kywutzx xjal ex twutz Dios.

Tuꞌnpetzintzjo, tentzin kywenila kykyaqilxa, tuꞌntzin tten tzaljbꞌil kyxola.