Ajo Tzaj Tchikyꞌbꞌin Dios te Juan
Atzin uꞌj lo kubꞌ ttzꞌibꞌin Juan, a tsanjil Jesús tiꞌjjo tzaj tchikyꞌbꞌin Dios te, ex ikytzin n-eleꞌ tkyaqil tzeꞌnku ilaꞌ wutzikyꞌ, a tzaj chikyꞌbꞌin te Juan tuꞌn Dios mo qa tuꞌn Jesucrist (1:1-2; 22:6, 16). Atzin uꞌj luꞌn nojnin tukꞌa nim techil ex nim yol nimxix t-xilin. Kyojjo uꞌj tzꞌibꞌin kyuꞌn yolil Tyol Dios toj Ojtxe Tuꞌjil, chqꞌalxix nknet junjun wutzikyꞌ, a tzeꞌnku tojjo uꞌj lo (Ez. 1; 40—48; Dan. 7—12; Zac. 1—6). Nimku maj, aye wiq uꞌj luꞌn ẍi kubꞌ tzꞌibꞌit, teꞌ ttzaj nim yajbꞌil ex bꞌis, noq tuꞌn tkujix kynimbꞌiljo Ttanim Dios, ex tuꞌn tkujsit qa ma kanbꞌin Dios kyiꞌj tajqꞌoj te jun majx, ex tzaj ttziyin qa tbꞌajlinxi jniꞌ yajbꞌil luꞌn, tzul Dios kawil kye jniꞌ tajqꞌoj, ex tuꞌn kykletjo jniꞌ tzꞌaqleqe toj kynimbꞌil, ex tuꞌn ttzaj tqꞌoꞌn jun nukꞌbꞌil ex tzaljbꞌil. Ex ikytziꞌn, ajo uꞌj luꞌn n-ajbꞌin te jun qꞌuqbꞌil kykꞌuꞌjjo nimil, a n-ikyꞌx nim yajbꞌil kyuꞌn, noq kyuꞌnjo aj kawil te Rom, quꞌn kubꞌ kyqꞌmaꞌn aj kawil tuꞌn kykꞌulin tkyaqilxjal twutz nmaq kawil te Rom.
Atzin uꞌj luꞌn o kubꞌ tzꞌibꞌit kye wuq chꞌuq nimil toj Asia, me atzin wuq chꞌuq nimil luꞌn jun techil tiꞌj tkyaqil nimil, quꞌn ajo kyꞌiwbꞌil ex yajbꞌil n-ikyꞌx kyuꞌn, ikyqexjo tzeꞌnku n-ikyꞌx kyuꞌn nimil toj tkyaqil twutz txꞌotxꞌ. Antza, nxi xkyeye tukꞌa wuq uꞌj xi tzꞌiꞌbꞌit kye wuq chꞌuq Ttanim Dios, tuꞌn tnimsit kykꞌuꞌj, ex tuꞌn tkujsit kynimbꞌil, ex tuꞌn t-xi kawitjo a nya wen toj kynimbꞌil ex kybꞌinchbꞌin, ex tuꞌn tkujsit kykꞌuꞌj toj tkyaqil yajbꞌil, a n-ikyꞌx kyuꞌn. Tibꞌajxiꞌ wuq uꞌj xi tzꞌibꞌit kye wuq chꞌuq nimil, axixsin tnejjo nim t-xilin tojjo uꞌj luꞌn; antza tkuꞌxe wuq tnej kawbꞌil kujxix wen, ex teyile junjun antza njapin bꞌaje tiꞌj tulil Jesucrist tkabꞌ majin (4:1—8:1; 8:2—11:19; 12:1—14:20; 15:1—16:21; 17:1—19:10; 19:11-21; 20:1-15).
1
Ajo tzaj tchikyꞌbꞌin Jesucrist
1 Ajo yol lo, kubꞌ tyekꞌin Dios te Jesucrist, tuꞌntzintla tkubꞌ tchikyꞌbꞌin Jesús kye tkyaqil nimil, aye nchi ajbꞌin te, tuꞌn tel kynikyꞌ tiꞌjjo a il tiꞌj tuꞌn tbꞌaj liwey. A Jesucrist tzaj tsmaꞌn jun t-angel qꞌmalte wey, a ayiꞌn Juan, a taqꞌnil Jesucrist. 2 Tuꞌnpetziꞌn, nxi nkujsin Tyol Dios ex tkyaqiljo i ok nkaꞌyiꞌn, ex i ok nbꞌiꞌn; ex ikyxjo nxi nkujsiꞌn tkyaqil, a ma tzaj tyekꞌin Jesucrist. 3 Kyꞌiwlinqexix kyeꞌ, aye nchi uꞌjin ex nchi bꞌin tiꞌjjo Tqanil lo, a tzajnin te Dios, ex nchi ok lipe tiꞌjjo yol tzꞌibꞌin, quꞌn ajo tqꞌijil tuꞌn tjapin bꞌaj tkyaqil laqꞌeqꞌin ttzaj.
Jun qꞌolbꞌil tuꞌn Juan kye wuq Ttanim Dios toj txꞌotxꞌ Asia
4 Ayiꞌn Juan, nxi ntzꞌibꞌinjiꞌy uꞌj luꞌn te kyeꞌy, ayiꞌy wuq Ttanim Dios toj txꞌotxꞌ Asia. Noqit xtalbꞌil ex jun nukꞌbꞌil kyukꞌiy, aye tzajnin te qMan Dios, a itzꞌ te jun majx, a attaq, ex tzul kanin;✡Ex. 3:14. ex tuꞌn Xewbꞌaj Xjan,✡Is. 11:2. a tzꞌaqlexix;*Toj griego, wuq xewbꞌaj ntqꞌmaꞌn. Me atzin tajlabꞌl, a wuq, atziꞌn tzꞌaqle n-ele; ex ikyxjo toj 4:5. 5 ex tuꞌn Jesucrist, a twutzxix yolin tiꞌj tkyaqil a ma tli,✡Is. 55:4. a tnejil xjatz anqꞌin te jun majx kyxol kyimnin,✡Kybꞌi. 26:23; Col. 1:18. ex at tipin kyibꞌaj tkyaqil kawil te twutz txꞌotxꞌ.✡Sal. 89:27. Ate Jesucrist nkꞌuꞌjlinqe, ex ma qo kotpaj tuꞌn toj il, noq tuꞌn tchkyꞌel. 6 Ex o tzaj tqꞌoꞌn qoklin, tuꞌn qok te Ttanim, ex tuꞌn qok te pale toj taqꞌin qMan Dios, a Ttata.✡Ex. 19:6; Tchi. 5:10. Nimxit tbꞌi ex te teꞌ tkyaqil tipin jaꞌlin, ex te jun majx. Ikyxitjo.
7 Ikyxjo tzeꞌnku nqꞌumle:
Kykaꞌyinxa. Tzul Crist toj muj.✡Dan. 7:13; Mt. 24:30; Mr. 13:26; Lc. 21:27; 1Tes. 4:17. Ex tkyaqilx klolte, majqexpeꞌ aye i ok xyunte.✡Zac. 12:10; Jn. 19:34, 37.
Ex tkyaqiljo xjal twutz txꞌotxꞌ tzulx toj kykꞌuꞌj tukꞌa bꞌisbꞌajil, tuꞌn mi ẍi nimin, ex kchi oqꞌil tiꞌj.✡Zac. 12:10-14; Mt. 24:30.
Ikytzin kbꞌajileꞌ. Ikyxitjo.
8 Ayin weꞌ ẍin kubꞌ bꞌinchinte ojtxe, ex kbꞌajil tkyaqil wuꞌn,✡Tchi. 22:13. a itzꞌ te jun majx, a attaq ex tzul kanin,✡Ex. 3:14. chi qAjaw, a Dios nimxix tipin.
Jun twutzikyꞌ Juan tiꞌj Crist
9 Ayiꞌn, a Juan, kyermanqiꞌn, ex noq tuꞌn qmujbꞌil qibꞌ tukꞌa Jesús, at wokliꞌn junx kyukꞌiy tiꞌj Tbꞌanil Tkawbꞌil qMan Dios, ex tiꞌj jniꞌ yajbꞌil ma tzikyꞌx quꞌn tuꞌn tpaj, ex tiꞌj tqꞌuqbꞌil qkꞌuꞌj tuꞌn tikyꞌx quꞌn toj tkyaqil, tuꞌntzintla qok tjaqꞌ Tkawbꞌil qMan. Atzin jaꞌlin, ma chin ex lajoꞌn kyuꞌn kawil aj Rom tzma tojjo netzꞌ txꞌotxꞌ, Patmos tbꞌi, toj ttxuyil aꞌ, noq tuꞌn tpaj Tyol Dios ex tuꞌn nyoliꞌn Tbꞌanil Tqanil tiꞌj Jesús.
10 Toj jun qꞌij domink, a tqꞌijil qAjaw, tzaj tipin Xewbꞌaj Xjan wibꞌaja, ex xi nbꞌiꞌn wiꞌjxiy jun tqꞌajqꞌojil kuj wen tzeꞌnku jun chun. 11 Chiꞌ kyjaluꞌn: Tzꞌibꞌinkujiy luꞌn twutz jun uꞌj, a ktlaꞌbꞌila, exsin smaꞌnxa kye wuq Ttanim Dios tzmax toj tnam Éfeso, Esmirna, Pérgamo, Tiatira, Sardis, Filadelfia ex Laodicey.
12 In aj meltzꞌaja wiꞌjxiy, tuꞌn nlontejiꞌy ankyetaqjo nyolin wukꞌiy. Atzaj teꞌ t-xi nkaꞌyiꞌn, nliꞌy wuq xtankoꞌl, bꞌinchin tuꞌn qꞌanpwaq. 13 Ex kyxoljo xtankoꞌl xi nkaꞌyiꞌn jun aꞌla nyakuj akuxix ele Tkꞌwal Ichin toj nwutza.✡Dan. 7:13. Tok jun t-xbꞌalin xqer wen, ex tukꞌa jun tkꞌalbꞌil tkꞌuꞌj bꞌinchin tuꞌn qꞌanpwaq,✡Dan. 10:5. ex tok tzma ttzi tkꞌuꞌj tzeꞌnku tnejilxix pale. 14 Ex atzin twiꞌ exsin tsmal twiꞌ sjaninxix wen tzeꞌnku noqꞌ ex tzeꞌnku ttxa cheꞌw, exqetziꞌn twutz, ikyjo tzeꞌnku taqꞌ qꞌaqꞌ.✡Dan. 7:9. 15 Ayetzin tqan nchi tilkꞌaj tzeꞌnku jun kxbꞌil ntzꞌiltzꞌin wen, aj tetz toj qꞌaqꞌ.✡Dan. 10:6. Ex atzin tqꞌajqꞌojil twiꞌ kujxix tzeꞌnku tqꞌajqꞌojil jun nim aꞌ njulinxix wen.✡Ez. 1:24. 16 Ex toj tman qꞌobꞌ tzyuꞌntaq wuq cheꞌw tuꞌn, ex toj ttzi n-etztaq jun kxbꞌil tzeꞌnku machet te kabꞌe tste, ex juchꞌ twiꞌ. Exsin twutz ikyjo tzeꞌnku tqan qꞌij nkubꞌ qopin wen.
17 Atzaj teꞌ nlontiꞌy, bꞌeꞌx in kubꞌ tzꞌaqa t-xe tqan, nyakuj jun kyimnin. Me bꞌeꞌx kubꞌ tqꞌoꞌn tman qꞌobꞌ wibꞌaja, ex tzaj tqꞌmaꞌn weꞌy kyjaluꞌn: Mi tzaj xobꞌa. Ayin wejiꞌy intiꞌn te tnejil, ex kbꞌajil tkyaqil wuꞌn.✡Is. 44:6; 48:12; Tchi. 2:8; 22:13. 18 Ayin wejiꞌy, itzꞌqiꞌn; bꞌaꞌnxi in kyima, me atziꞌn jaꞌlin, itzꞌqin weꞌ te jun majx. Ayin weꞌ at wokliꞌn, tuꞌn kyjatz kyimnin te chwinqil, mo tuꞌn kyxiꞌ toj kynajbꞌil kyimnin te jun majx.
19 Tuꞌnpetziꞌn, tzꞌibꞌinkujiy a jniꞌ ma tliy, a n-ok tkaꞌyiꞌn, ex a ktlabꞌila yajxi. 20 Atzin t-xilin a wuq cheꞌw, a qꞌiꞌn toj nman qꞌobꞌa, nkyyekꞌin kyejo wuq nejinel xqꞌuqil kye Ttanim Dios kyojjo wuq tnam qꞌumle. Ex atziꞌn t-xilin wuq xtankoꞌl bꞌinchin tuꞌn qꞌanpwaq nkyyekꞌin kyiꞌjjo wuq chꞌuq Ttanim Dios.
✡1:4 Ex. 3:14.
✡1:4 Is. 11:2.
*1:4 Toj griego, wuq xewbꞌaj ntqꞌmaꞌn. Me atzin tajlabꞌl, a wuq, atziꞌn tzꞌaqle n-ele; ex ikyxjo toj 4:5.
✡1:5 Is. 55:4.
✡1:5 Kybꞌi. 26:23; Col. 1:18.
✡1:5 Sal. 89:27.
✡1:6 Ex. 19:6; Tchi. 5:10.
✡1:7 Dan. 7:13; Mt. 24:30; Mr. 13:26; Lc. 21:27; 1Tes. 4:17.
✡1:7 Zac. 12:10; Jn. 19:34, 37.
✡1:7 Zac. 12:10-14; Mt. 24:30.
✡1:8 Tchi. 22:13.
✡1:8 Ex. 3:14.
✡1:13 Dan. 7:13.
✡1:13 Dan. 10:5.
✡1:14 Dan. 7:9.
✡1:15 Dan. 10:6.
✡1:15 Ez. 1:24.
✡1:17 Is. 44:6; 48:12; Tchi. 2:8; 22:13.