7
Aye kyechiljo kabꞌlajaj chꞌuq kyyajil aj Israel
1 Tbꞌajlinxiꞌ ikyjo, xi nkaꞌyiꞌn kyaje angel waꞌlqetaq toj kyaje tumil txꞌotxꞌ, a tzyuꞌntaq kyaje kyqꞌiqꞌ kyuꞌn,✡Dan. 7:2; 11:4; Zac. 2:6; 6:5. tuꞌntzintla mi xupin kyqꞌiqꞌ tibꞌaj txꞌotxꞌ, ex tibꞌaj ttxuyil aꞌ, mixpe tibꞌaj jun tze. 2 Ex nliy juntl angel, a tzajnin toj tjawitz qꞌij, a qꞌiꞌntaq tuꞌn, ajo jupbꞌilte uꞌj tuꞌn Dios, a itzꞌ te jun majx. 3 Atzin angel jaw ẍchꞌin tukꞌa tqꞌajqꞌojil twiꞌ kujxix wen. Xi tqꞌmaꞌn kye angel, ayeꞌ otaq xi qꞌoꞌn kyoklin tuꞌn tkubꞌ kybꞌinchin mibꞌin tiꞌj txꞌotxꞌ ex tiꞌj ttxuyil aꞌ. Ex chiꞌ kyjaluꞌn: Mi kubꞌ kybꞌinchiꞌn mibꞌin tiꞌj txꞌotxꞌ, ex tiꞌj ttxuyil aꞌ, ex kyiꞌj tze, a naꞌmxtaq tok kyechiljo nimil quꞌn tiꞌj kyplaj, ayeꞌ aqꞌnil te qDios, qa te teqe.✡Ef. 4:30.
4 Ex nbꞌiy kyajlaljo a otaq tzꞌok kyechil: 144,000 kyxoljo kyyajil aj Israel.
5 Kyxoljo tyajil Judá, kabꞌlajaj mil; ex kyxoljo tyajil Rubén, kabꞌlajaj mil; ex kyxoljo tyajil Gad, kabꞌlajaj mil. 6 Ex kyxoljo tyajil Aser, kabꞌlajaj mil; ex kyxoljo tyajil Neftalí, kabꞌlajaj mil; ex kyxoljo tyajil Manasés, kabꞌlajaj mil. 7 Ex kyxoljo tyajil Simeón, kabꞌlajaj mil; ex kyxoljo tyajil Leví, kabꞌlajaj mil; ex kyxoljo tyajil Isacar, kabꞌlajaj mil. 8 Ex kyxoljo tyajil Zabulón, kabꞌlajaj mil; ex kyxoljo tyajil Jse, kabꞌlajaj mil; ex kyxoljo tyajil Benjamín, kabꞌlajaj mil.
Nimku xjal ok kyxbꞌalin sjanin
9 Tbꞌajlinxiꞌ ikyjo, xi nkaꞌyiꞌn nimku xjal te tkyaqil twutz txꞌotxꞌ, aꞌlchaqx kye kyxeꞌchiltz, kyyol ex kytanim. Ex waꞌlqetaq twutzjo qꞌuqbꞌil ex twutzjo tal Tal rit. Ma nintz kybꞌaj; mix aꞌl jun aku bꞌant tajlankye. Toktaq kyxbꞌalin sjanin wen, ex qꞌiꞌn t-xaq palma toj kyqꞌobꞌ. 10 Ex kykyaqilxtaq nchi ẍchꞌin tukꞌa tqꞌajqꞌojil kywiꞌ kujxix wen:
Ajo kolbꞌil tzajnin te qMan Dios, a qꞌuqle tibꞌajjo qꞌuqbꞌil tzaluꞌn toj kyaꞌj, ex tejo tal Tal rit.
11 Ex kykyaqiljo angel waꞌlqetaq tiꞌjile qꞌuqbꞌil, ex kyiꞌjile nejinel ex kyiꞌjile kyaje ajbꞌil, ex i kubꞌ meje twutzjo qꞌuqbꞌil, ex kupin kyplaj twutz txꞌotxꞌ; i kꞌulin te Dios, 12 ex kyqꞌma:
¡Ikyxitjo! Qqꞌonx bꞌitz te nimsbꞌil tbꞌi Dios, ex jniꞌ qnabꞌl, ex tkyaqil aqꞌbꞌil chjonte, junx tukꞌa nim qoklin, qipin ex qkujil, jaꞌlin ex te jun majx. ¡Ikyxitjo!
13 Ex tzaj tqanin jun nejinel weꞌy: ¿Ankyeqe luꞌn, a tok kyxbꞌalin sjanin, ex jaꞌtzin ẍi tzaje?
14 Ex xi ntzaqꞌwiꞌn: Ojtzqiꞌn te tuꞌn, tata, nchijiꞌy.
Ex tzaj tqꞌmaꞌn weꞌy:
Ayetziꞌn, a o chi etz toj nim bꞌisbꞌajil twutz txꞌotxꞌ.✡Dan. 12:1; Mt. 24:21; Mr. 13:19.
Noq tuꞌn tchkyꞌeljo Jesús, ajo tal Tal rit, ma saqix kychwinqil,
ikyx tzeꞌnku jun xbꞌalin sjaninxix, a ma tzꞌel txjet tiꞌj.
15 Tuꞌnpetziꞌn, loqe iteꞌ twutz tqꞌuqbꞌil Dios qꞌijl ex qnikyꞌin.
Nchi ajbꞌin toj tja te kꞌulbꞌil.
Ex atzin te a qꞌuqle toj qꞌuqbꞌil, ok kchi kletil tuꞌn,
quꞌn ktenbꞌil kyukꞌa te jun majx.
16 Ex nlay tzikyꞌx waꞌyaj kyuꞌn ex kꞌwaj,
ex nlay chi tzꞌeꞌy tuꞌn tqan qꞌij, ex nlay kynaꞌn kyaq.✡Is. 49:10.
17 Quꞌn a teꞌ tal Tal rit, a qꞌuqle toj tkꞌuꞌj qꞌuqbꞌil,
kchi okil tkyikꞌleꞌn tzeꞌnku rit.
Ex kchi xel ttxkoꞌn tojjo xlokꞌ aꞌ,
tuꞌn kyten kychwinqil te jun majx.
Ex aku Dios k-elil suꞌnte taꞌl kywutz.✡Sal. 23:1; Ez. 34:23; Jn. 10:1-16.