1 Ex xi nkaꞌyiꞌn jun angel nimxix tipin kyjaꞌtaq tkuꞌtz toj kyaꞌj bꞌaltzꞌin toj muj. Attaq jun t-xew kan tibꞌaj twiꞌ; atziꞌn twutz nqoptzꞌaj wen tzeꞌnku qꞌij, ex ayetziꞌn tkux, tzeꞌnku tqan qꞌaqꞌ njulin wen. 2 Ex qꞌiꞌntaq jun tal netzꞌ uꞌj jqoꞌntaq toj tqꞌobꞌ. Ex xi tqꞌoꞌn jun tqan toj tman qꞌobꞌ tibꞌaj ttxuyil aꞌ, ex atzin juntl tqan tibꞌaj txꞌotxꞌ. 3 Ex jaw ẍchꞌin tukꞌa tqꞌajqꞌojil twiꞌ kujxix wen, tzeꞌnku jun bꞌalun nweqj. Tej tjaw ẍchꞌin angel, bꞌeꞌx bꞌijte kywiꞌ wuq qꞌankyaq. 4 Tej t-xi nbꞌinjiꞌy kywiꞌ wuq qꞌankyaq, tuꞌntaq tkubꞌ ntzꞌibꞌiꞌn, me xi nbꞌiꞌn juntl yol toj kyaꞌj, a tqꞌma weꞌy: Kꞌuꞌnkuy toj tnabꞌla a xkyij kyqꞌmaꞌn wuq qꞌankyaq, ex mi kubꞌ ttzꞌibꞌiꞌn.

Tuꞌn ikyjo, mix kubꞌe ntzꞌibꞌiniꞌy jun tiꞌ kyiꞌj.

5 Atziꞌn angel, a xi nkaꞌyin waꞌltaq tibꞌaj ttxuyil aꞌ ex tibꞌaj txꞌotxꞌ, jaw tiꞌn tman qꞌobꞌ toj kyaꞌj. 6 Ex kubꞌ tkꞌluꞌn twutzjo a itzꞌ te jun majx, aku bꞌinchinte kyaꞌj, ex txꞌotxꞌ, ex ttxuyil aꞌ, ex tkyaqiljo at kyoj, ex tqꞌma: Nlay txi laqꞌel tqꞌijil qAjaw. 7 Quꞌn aj tkanin tqꞌijiljo twuqin angel, tuꞌn toqꞌsin tchun, atzin qꞌijjo tuꞌn tjapin t-xim Dios, a ewintaq te tnejil, ikyxjo tzeꞌnku kyqꞌma yolil Tyol Dios ojtxe.✡Dan. 12:7; Am. 3:7.

8 Atziꞌn tqꞌajqꞌojil twiꞌ, a otaq nbꞌiꞌy, a etz toj kyaꞌj, tzaj tqꞌmaꞌn juntl majl weꞌy, ex tqꞌma: Ku txiꞌy. Ex qꞌinxjiy tal uꞌj, a jqoꞌn toj tqꞌobꞌ angel, a waꞌl tibꞌaj ttxuyil aꞌ ex tibꞌaj txꞌotxꞌ.

9 Bꞌeꞌx in xiꞌy tkꞌatz angel, ex xi nqaniꞌn tuꞌn ttzaj tqꞌoꞌn tal uꞌj. Ex tzaj ttzaqꞌwin: Qꞌiꞌnxa, ex waꞌnxa. Ex manyor chiꞌxla toj ttziy tzeꞌnku taꞌl onin, me toj tkꞌuꞌja, bꞌeꞌxla kkꞌayixil wen.

10 Xi ntzyunjiꞌy tal uꞌj toj tqꞌobꞌ angel, ex tzaj nwaꞌn. Ex manyor chiꞌx toj ntziꞌy tzeꞌnku taꞌl onin.✡Ez. 2:8—3:3. Me atzaj teꞌ tbꞌaj nwaꞌn, bꞌeꞌx kꞌayix toj nkꞌuꞌja. 11 Tbꞌajlinxiꞌ ikyjo, tzaj qꞌmaꞌn weꞌy: Il tiꞌj tuꞌn t-xi tqꞌmaꞌn juntl majl ajo ntqꞌmaꞌn Dios teꞌy kyiꞌjjo nimku tnam, nimku txꞌotxꞌ, ex yol ex nmaq kawil.