15
Ayejo wuq angel tukꞌa wuq kyꞌixsbꞌajil
1 Xi nkaꞌyiꞌn juntl techil nimxix toj kyaꞌj, tuꞌn kyjaw kaꞌylajxjal tiꞌj. Atzin techiljo lo: Wuq angel tukꞌa wuq kyꞌixsbꞌajil, a jaꞌ tuꞌn tjapin bꞌaj tyabꞌ twiꞌ Dios twutz txꞌotxꞌ. 2 Ex xi nkaꞌyiꞌn jun tiꞌ tzeꞌnku ttxuyil aꞌ, a nqoptzꞌaj tzeꞌnku kaꞌybꞌil wutzbꞌaj, ex smoꞌn tukꞌa qꞌaqꞌ. Ex waꞌltaq txqan xjal ttxlaj, aye otaq chi kanbꞌin tiꞌj ma tij txuk ex tiꞌj twutzbꞌiyil, ex tiꞌjjo tajlal tbꞌi. Ex qꞌiꞌn arpa kyuꞌn, a otaq xi tqꞌoꞌn Dios kye. 3 Ex i bꞌitzin tiꞌjjo tbꞌitz tal Tal rit ex te Moisés, a taqꞌnil Dios.✡Ex. 15:1-18. Ex kyqꞌma:
Ay qAjawa Dios nimxix tipiꞌn,
ex te kaꞌybꞌajilxjo tkyaqil tbꞌinchbꞌiꞌn;
ex jikyin ex twutzqexixjo ayejo tumil,
quꞌn Ay, Kawil tibꞌaj tkyaqil tnam.
4 ¿Ankye jun nlay jaw xobꞌ teꞌy, Ay qAjawa?
¿Ex ankye jun nlay jaw nimsin te tbꞌiy?✡Jer. 10:7.
Quꞌn oꞌkx teꞌ xjanxix.
Ex tkyaqil tnam twutz txꞌotxꞌ tzul tkꞌatza kꞌulil teꞌy,
quꞌn tkyaqil taqꞌnbꞌiꞌn tzꞌaqlexix, ex ma qꞌanchaꞌlix.✡Sal. 86:9.
5 Tbꞌajlinxiꞌ ikyjo, xi nkaꞌyiꞌn toj kyaꞌj, xi jaqle ja, a jaꞌ najle Dios.✡Ex. 38:21. 6 Ex tojjo ja, bꞌeꞌx i etz wuq angel, a qꞌintaqjo wuq kyꞌixsbꞌajil kyuꞌn. Ex toktaq kyxbꞌalin tzꞌumin ex tbꞌanilx wen. Ex toktaq tkꞌalbꞌil kykꞌuꞌj bꞌinchin tuꞌn qꞌanpwaq ex japine tzma ttzi kykꞌuꞌj. 7 Ex atzin jun kyxoljo kyaje ajbꞌil twutz tqꞌuqbꞌil Dios, xi tqꞌoꞌn teyile junjun wuq angel jun laq bꞌinchin tuꞌn qꞌanpwaq, nojnin tuꞌn tyabꞌ twiꞌ Dios, a itzꞌx te jun majx. 8 Ex ajo tja Dios toj kyaꞌj, bꞌeꞌx noj tuꞌn sibꞌ, a tzajnin tiꞌjjo tqoptzꞌajiyil tipin Dios.✡Ex. 40:32-35; 1Re. 8:10-11; 2Cr. 5:13-14; Is. 6:4. Ex mix aꞌl jun aku bꞌant tuꞌn tokx, tzmaxiꞌ teꞌ tjapin bꞌaj wuq kyꞌixsbꞌajil, a qꞌiꞌntaq kyuꞌn wuq angel.