1 Tuꞌnpetziꞌn, ntiꞌx jun kolbꞌil teꞌy, qa nyolbꞌiꞌn tiꞌj jun bꞌinchil il, ex qa ikyxl tejiy nbꞌant tuꞌn.✡Mt. 7:1; Lc. 6:37. Quꞌn tibꞌajxa kꞌwele tzꞌaqjo tyola. 2 Quꞌn bꞌin quꞌn, qa a Dios kkawil kyibꞌajjo jniꞌ bꞌinchil il. 3 ¿Ma oktzin ktzaqpajila toj twutza te najin, a tzul tuꞌn Dios, a ay nyolbꞌin kyiꞌjjo nchi bꞌinchin il? Quꞌn tuꞌn ikyjo, axl nbꞌantjo tuꞌn. 4 Quꞌn kxel nqꞌmaꞌn qa nimxix twenil Dios tiꞌja. Ex nimx n-ikyꞌx tuꞌn Dios noq tuꞌn tbꞌinchbꞌiꞌn, ex n-ayoꞌn Dios tiꞌja, tuꞌn tajtz tiꞌj tanmiꞌn. Exsin ante ntiꞌx nximiꞌn tiꞌj tuꞌn tnimin tiꞌj Dios. Ex noq tuꞌn tbꞌinchbꞌin nya bꞌaꞌn, n-ele tikyꞌiꞌn Dios. Quꞌn tukꞌa tkyaqil twenil Dios, taj tuꞌn tajtz tiꞌj tanmiꞌn, ex tuꞌn tnimiꞌn tiꞌj. 5 Ex noq tuꞌn tchꞌuẍil tanmiꞌn, ma txi tkujsin tibꞌa. Me tuꞌn ikyjo, njax ttilinjiꞌy tila tibꞌajxa. Oktzin ktlabꞌila, aj tul tqꞌijiljo tkawbꞌil Dios kujxix wen, ex aj tjapin kanin tqꞌijil, jaꞌ tuꞌn tokiꞌy toj paꞌbꞌin twutz Dios toj tumilxix. 6 Quꞌn tojjo qꞌij anetziꞌn, kxel tqꞌoꞌn Dios chojbꞌil teyile junjun, tzeꞌnkuxjo ntqanin tbꞌinchbꞌin.✡Sal. 62:12. 7 Kxel tqꞌoꞌn jun chwinqil te jun majx toj kyaꞌj, exsin jun kyoklin tbꞌanilxix tiꞌjjo tqoptzꞌajiyil qMan Dios, aye nchi jyon tiꞌj, ex tok tilil kyuꞌn, tuꞌn kybꞌinchin teꞌ bꞌaꞌn tzaluꞌn twutz txꞌotxꞌ. 8 Me metziꞌn kyiꞌjjo xjal nchi nimsin kyibꞌ, ex kykyꞌeꞌ tuꞌn tkubꞌ kynimin yol, a twutzxix; qalaꞌ oꞌkx kyajjo tuꞌn kyxi lipe tiꞌj tkyaqil il, ktzajil tqꞌoj Dios kyibꞌaj, a kujxix wen. 9 Ktzajil tqꞌoꞌn Dios nimx yajbꞌil ex bꞌis kyibꞌajjo a nchi bꞌinchin il; tnejilxix kye Judiy, ex ikyxjo kye nya Judiyqe. 10 Me meqetzin kyeꞌ xjal, a nchi bꞌinchin bꞌaꞌn, kchi jawil nimsin tuꞌn Dios, ex ktzajil qꞌoꞌn kyoklin ex jun nukꞌbꞌil toj kyaꞌj te jun majx; tnejilxix kye Judiy, ex ikyxjo kye nya Judiyqe.

11 Ikytziꞌn, ntiꞌ n-ok tkaꞌyin Dios kyxeꞌchilxjal, quꞌn tkyaqilxjal junx toklin twutz.✡Deu. 10:17. 12 Tuꞌnpetziꞌn, kykyaqilxjo nchi bꞌinchin il, aye nya Judiyqe, a mi bꞌiꞌn tkawbꞌil Moisés kyuꞌn, ok kchi kyimil tuꞌnx kypaj. Ex ayetzin kye Judiy, a nchi bꞌinchin il tiꞌjlbꞌinxiꞌ tkawbꞌil Moisés, ex ok kchi kyimil tuꞌnxjo kawbꞌil.

13 Qo ximin chꞌin tiꞌj tkyaqiljo kawbꞌil. Quꞌn nya noq oꞌkx tuꞌn tok qbꞌiꞌn, qalaꞌ il tiꞌj tuꞌn tjapin bꞌaj quꞌn; ex tuꞌn ikyjo, ma qo el wen. 14-15 Ex ikyxjo tukꞌa tkawbꞌil qMan Dios. Quꞌn aye xjal nya Judiyqe, a ntiꞌ bꞌiꞌn tkawbꞌil Moisés kyuꞌn; iꞌchaqxla nya bꞌiꞌntz kyuꞌn, me atku maj nkubꞌ kybꞌinchin wen, tzeꞌnkuxjo ntqꞌmaꞌn kawbꞌil, ex at maj qa mina. Quꞌn ax kynabꞌl nqꞌmante alkye wen tuꞌn kybꞌinchinte, ex alkye nya wen. Atzintzjo luꞌn nyekꞌinte qa at jun kawbꞌil kyukꞌa toj kyanmin. 16 Tuꞌn ikyjo, tkyaqil kybꞌinchbꞌin xjal toj ewajil, ok k-yekꞌil noq tuꞌn Jesucrist, toj tqꞌijil aj tkawin Dios, a tzeꞌnkuxjo Tbꞌanil Tqanil kolbꞌil, a ma txi nqꞌmaꞌn kyeꞌy.

17 Me atzin te, a ntqꞌmaꞌn qa Judiy xjala, ex qa qꞌuqle tkꞌuꞌja tiꞌj tkawbꞌil Moisés, ex njaw tnimsin tibꞌa noq tiꞌjjo tbꞌi Dios, 18 ex qa ojtzqiꞌn tajbꞌil tuꞌn, exsiꞌn tkawbꞌil, a ntzaj xnaqꞌtzintiy, ex qꞌuqle tkꞌuꞌja tiꞌj, qa kukx nkubꞌ tbꞌinchinjiꞌy wen. 19 Ex ikyxjo qꞌuqle tkꞌuꞌja tiꞌj, qa ma tzꞌoka nejinel kye mi n-el kynikyꞌ te Dios, tzeꞌnku jun tzaj kyeꞌ nchi bꞌet toj qnikyꞌin. 20 Nkubꞌ t-ximiꞌn qa ma tzꞌoka te xnaqꞌtzil kyeꞌ mi ojtzqiꞌn Dios kyuꞌn, ex kyeꞌ kꞌwal, a mi nkybꞌiꞌn. Tkyaqiljo lo qꞌuqle tkꞌuꞌja tiꞌj, quꞌn qꞌuqle tkꞌuꞌja qa tojjo ojtxe kawbꞌil antza taꞌye ttxuyiljo tkyaqil ojtzqibꞌl, a twutzxix. 21 Me atzin te, a nxnaqꞌtziꞌn kye txqantl, ¿Tiquꞌn mi nkubꞌ t-xnaqꞌtziꞌn tibꞌa nej? Ex atzin te, a nyoliꞌn qa nya wen tuꞌn qelqꞌin, ¿Tiquꞌn akul te n-elqꞌin? 22 Ex ay, a nqꞌmaꞌnte qa nya wen tuꞌn qkyꞌaꞌjin, ¿Tiquꞌn akul te nkubꞌ bꞌinchinte nej? Ex ay, a nqꞌmaꞌnte qa nya wen tuꞌn qkꞌulin kywutzjo twutzbꞌiyil juntl dios, ¿Me akupe te ma tzꞌokx elqꞌil toj tja kydiosxjal? 23 Me noq njaw tnimsin tbꞌiy tibꞌajjo ojtxe kawbꞌil, ex n-el tiꞌjliꞌn Dios, noq tuꞌn mi nkubꞌ tbꞌinchiꞌn a tzeꞌnkuxjo ntqꞌmaꞌn ojtxe kawbꞌil. 24 Bꞌisbꞌajilxla ayiꞌy Judiyqiy. Noq tuꞌn kyxmiletzꞌila ikyjo, kyij tzꞌibꞌit toj Tuꞌjil Tyol Dios, qa noq tuꞌn kypaja nchi yolin aye nya Judiy, qa ntiꞌ tajbꞌin Dios.✡Is. 52:5.

25 Twutzx teꞌ qa alkye taj tuꞌn tjapin bꞌaj ojtxe kawbꞌil tuꞌn, at tajbꞌin te te, tuꞌn tel qitit techil tiꞌj tchibꞌjil, tzeꞌnku kubꞌ tzꞌibꞌit toj Tuꞌjil Tyol Dios. Me qa mix japin tuꞌn, exla qa tok techil, ikyx tzꞌeleꞌ tzeꞌnku ntiꞌ techil tok twutz qMan Dios. 26 Ex qa ma japin kawbꞌil kyuꞌn xjal nya Judiyqe, aye nya qitin kyechil, ikyx tzꞌeleꞌ tzeꞌnqeku qitin kyechil twutz Dios. 27 Ex a xjal nya qitin techil tiꞌj tchibꞌjil, me qa ma japin tkyaqil Tyol Dios tuꞌn, kjawil weꞌ toj tqꞌijil kawbꞌil twutz Dios, tuꞌn tkubꞌ tzꞌaqa tuꞌn toj tila, a mi njapin tajbꞌil qMan tuꞌn, exla qa bꞌiꞌn ojtxe kawbꞌil tuꞌn, ex qitin techila. 28 Quꞌn nyaqeku kye Ttanim Diosjo, a Judiy, a at kyechil tiꞌjtzaqtz kychibꞌjil, quꞌn nya te qechiljo twutzxix, a n-ok tiꞌjtzaqtz qchibꞌjil. 29 Qalaꞌ atzin te xjaljo, a twutzxix Ttanim Dios, a Judiyxix, a tok techil tojxi tanmin, ex atzin te qechiljo twutzxix, a tok tojxi qanmin,*Ayejo yol, tuꞌn qitit techil tiꞌj tchibꞌjil, circuncisión n-ele toj kastiy. Deu. 10:16; Jer. 4:4; Gal. 6:14-15; Fil. 3:3; Col. 2:11-13. a mi qꞌanchaꞌl, nya noq jun nukꞌbꞌil tzꞌibꞌin kyuꞌnxjal, qalaꞌ tuꞌn Xewbꞌaj Xjan. Qatzin qa ikyjo, nya kywutzxjal qo elil wen, noq tuꞌn jun tiꞌ toj qxmilil; qalaꞌ twutz Dios, a ojtzqilte qanmin.