1 Me atzin jaꞌlin, ntiꞌx jun kawbꞌil kujxix te jun majx kyibꞌajjo a at kymujbꞌil kyibꞌ tukꞌa Crist, a Jesús, quꞌn mi nchi anqꞌin tzeꞌnku ntqanin tachbꞌil kyxmilil, qalaꞌ tzeꞌnkuxjo taj Xewbꞌaj Xjan. 2 Quꞌn a tumil, a tzajnin tuꞌn Xewbꞌaj Xjan, ntzaj tqꞌoꞌn akꞌaj chwinqil qe, noq tuꞌn qmujbꞌil qibꞌ tukꞌa Crist, a Jesús, ex ma qo tzaqpaj tjaqꞌjo tumil tuꞌn il ex te kyimin. 3 Nlay qo klet tuꞌn ojtxe kawbꞌil, quꞌn ntiꞌ tumil tuꞌn tjapin bꞌaj quꞌn, noq tuꞌn tpajjo ojtxe qten nya bꞌaꞌn. Me atzin jaꞌlin, ma qo tzaqpaj tuꞌn qMan Dios, tuꞌn saj tqꞌoꞌn Tkꞌwal twutz txꞌotxꞌ, tuꞌn tok te xjal tzeꞌnku qe; me mix kubꞌe tiꞌj tuꞌn il; qalaꞌ tej tkyim te chojbꞌil qil, ma kubꞌ tiꞌj tkyaqil il tuꞌn. 4 Tuꞌntzin tjapin bꞌajjo t-xilin tumil ojtxe kawbꞌil, mina nqo bꞌet jaꞌlin tzeꞌnku ntqanin qxmilil, qalaꞌ tzeꞌnku taj Xewbꞌaj Xjan.

5 Quꞌn ayetziꞌn, a nchi bꞌet tzeꞌnkuxjo taj ojtxe kyten, ex oꞌkx nchi ximin tiꞌjjo nya bꞌaꞌn, a ntqanin kyxmilil. Me ayetziꞌn, a nchi bꞌet tzeꞌnkuxjo taj Xewbꞌaj Xjan, n-ok tilil kyuꞌn tzeꞌnku taj Xewbꞌaj Xjan. 6 Quꞌn qa noq oꞌkx s-ok qqꞌoꞌn qanmin tiꞌjjo qxmilil, qo xeꞌl tojjo najin te jun majx. Me qa ma tzꞌok qxoꞌn qanmin tiꞌjjo taj Xewbꞌaj Xjan, ktzajil qꞌoꞌn chwinqil te jun majx ex jun nukꞌbꞌil, a nlay bꞌajx. 7 Ayetziꞌn k-okil kyxoꞌnx kyanmin tiꞌjjo taj ojtxe kyten, ajqꞌojqe tiꞌj qMan Dios, quꞌn kykyꞌeꞌ tuꞌn tkubꞌ kynimin tkawbꞌil, ex nlay japin kyuꞌn. 8 Tuꞌnpetziꞌn, aye nchi bꞌet tzeꞌnkuxjo ntqanin tachbꞌil kyxmilil, mi ntzalaj Dios kyiꞌj.

9 Me ayetzin kyeꞌ mi nchi bꞌeta tzeꞌnkuꞌ ntqanin kyxmilila, qalaꞌ tzeꞌnkuxjo taj Xewbꞌaj Xjan, qa matxixix ten Xewbꞌaj Xjan toj kyanmiꞌn, quꞌn qa ntiꞌ Xewbꞌaj Xjan, a T-xew Jesucrist, toj kyanmiꞌn, nya te Cristqiꞌy. 10 Me qatzin qa najle Crist toj kyanmiꞌn, exla qa ma kyimjo kyxmilila tuꞌn tpaj kyila, me metzin kyanmiꞌn, ok k-anqꞌil te jun majx tukꞌa Dios, quꞌn tuꞌn ma tzꞌok tzꞌaqle twutz. 11 Ex qa najle Xewbꞌaj Xjan toj kyanmiꞌn, kjawil anqꞌin kyxmilila tuꞌn, tzeꞌnku jatz anqꞌin te Crist, a Jesús, juntl majl kyxol kyimnin tuꞌn Xewbꞌaj Xjan, a T-xew qMan Dios.

12 Tuꞌnpetziꞌn erman, nya bꞌaꞌn tuꞌn qbꞌet tzeꞌnku ntqanin tachbꞌil qxmilil. 13 Quꞌn qa ma kubꞌ qbꞌinchin ikyjo, ok qo xeꞌl toj najin te jun majx. Qalaꞌ il tiꞌj tuꞌn qbꞌet tzeꞌnkuxjo taj Xewbꞌaj Xjan, ex tuꞌn tkubꞌ qbꞌyoꞌn a tajbꞌil ojtxe qteꞌn, tuꞌn mi qox lipel tiꞌj, quꞌn qa ma bꞌantjo ikyjo, ok qo anqꞌil te jun majx. 14 Quꞌn kykyaqiljo nchi bꞌet tzeꞌnku taj Xewbꞌaj Xjan, ayetziꞌn tkꞌwal Diosjo. 15 Quꞌn a Xewbꞌaj Xjan ma txi qkꞌmoꞌn, nya noq tuꞌn qok te aqꞌnil te jun majx, ex tuꞌn qbꞌinchin tzeꞌnku ntqanin qxmilil. Quꞌn qa ikyjo, at qxobꞌil teꞌ kawbꞌil kujxix te Dios. Qalaꞌ, a Xewbꞌaj Xjan tzaj tqꞌoꞌn qoklin te tkꞌwal Dios. Tuꞌntzintzjo, nxi qqꞌmaꞌn te Dios: Ay ntatiꞌy, qo chiꞌ. 16 Quꞌn axjo Xewbꞌaj Xjan nqꞌmante te qanmin qa ma qo ok te tkꞌwal Dios. 17 Quꞌn qa ma qo ok te tkꞌwal Dios, at qoklin tiꞌjjo tkyaqil etzbꞌil o tzaj tqꞌmaꞌn, junx tukꞌa Crist.✡Gal. 4:5-7. Me il tiꞌj nej tuꞌn tikyꞌx quꞌn tzeꞌnku ikyꞌx te Crist tuꞌn. Tbꞌajlinxiꞌ ikyjo, ok qo jawil nimsin junx tukꞌa toj tqoptzꞌajiyil kyaꞌj.

18-19 Atzin jaꞌlin, te weꞌy, tkyaqiljo n-ikyꞌx quꞌn tzaluꞌn twutz txꞌotxꞌ mixla chꞌin aku pon, tzeꞌnku a tqoptzꞌajiyil qMan Dios, a tzul, aj tjapin bꞌajjo qanbꞌil tkubꞌ twutz txꞌotxꞌ, ex aj tyekꞌajtz ankye qe tkꞌwal Dios twutzxix. 20 Quꞌn tkyaqiljo tchꞌiysbꞌin Dios ok tjaqꞌ tqanbꞌil, tuꞌn tqꞌayj, ex tuꞌn tkyim, me nya kyuꞌnx kyibꞌx, qalaꞌ tuꞌn tajbꞌil qMan Dios, noq tuꞌn tpaj il, teꞌ tok twutz txꞌotxꞌ. Me attaq jun qꞌuqbꞌil kꞌuꞌjbꞌaj, 21 tuꞌn tjapin bꞌajjo qanbꞌil lo, ex tuꞌn tok tkyaqil tchꞌiysbꞌin tojxix tzaqpibꞌl manyor tbꞌanilxix te qMan Dios, a saj qꞌoꞌn kye tkꞌwal. 22 Quꞌn bꞌiꞌn quꞌn, qa jaꞌlin tkyaqil tchꞌiysbꞌin Dios ntꞌinin, ex n-ikyꞌx tuꞌn, tzeꞌnku n-ikyꞌx tchyoꞌn kꞌwal tuꞌn jun qya, aj tja qꞌiꞌn. 23 Ex nya oꞌkxjo tchꞌiysbꞌin Dios, qalaꞌ ikyxjo qe, exla qa ma tzaj tqꞌoꞌn Xewbꞌaj Xjan toj qanmin te jun kujsbꞌilte tiꞌj a ktzajil qkꞌmoꞌn toj kyaꞌj, nqo tꞌiꞌnin toj qanmin, ex nqo ayon tiꞌj tqꞌijil, tuꞌn t-xi tqꞌmaꞌn kywutzx tkyaqil xjal, qa o tzaj qꞌoꞌn qoklin te tkꞌwal Dios, ex tuꞌn tkotpit qxmilil tjaqꞌjo qanbꞌil. 24 Tej qklet, bꞌeꞌx qe qkꞌuꞌj tiꞌjjo etzbꞌil toj kyaꞌj, me naꞌm qkꞌmonte, quꞌn noqit oje, mitla nqo ayontltz tiꞌj. Quꞌn ¿Tiquꞌnil tuꞌn qayonl tiꞌjjo a atl? 25 Qalaꞌ a etzbꞌil nqo ayon tiꞌj, naꞌmx qetzinte. Tuꞌnpetziꞌn, il tiꞌj tuꞌn qayon tiꞌj tukꞌa tqꞌuqbꞌil qkꞌuꞌj.

26 Ex axjo Xewbꞌaj Xjan n-onin qiꞌj, tzeꞌn tten tuꞌn qnaꞌn Dios, quꞌn mi n-el qnikyꞌ teꞌ taj. Me atzin Xewbꞌaj Xjan nkubꞌsin twutz qiꞌj twutz qMan Dios tukꞌa tqꞌajqꞌojil twiꞌ, a nlay bꞌant qyolinte. 27 Me ante qMan, a Xpichꞌil qanmin, ex n-el tnikyꞌ te tnabꞌl Xewbꞌaj Xjan, quꞌn kubꞌsin twutz qiꞌj tzeꞌnkuxjo tajbꞌil qMan Dios kyiꞌjjo o chi ok te te.

28 Bꞌiꞌn quꞌn qa ax Dios nkubꞌ bꞌinchinte tkyaqil, tuꞌn tel wen toj kychwinqiljo aye nchi ok kꞌuꞌjlinte, a ayeꞌ o chi ttxok tzeꞌnkuxjo t-xim. 29 Quꞌn tkyaqil nimil noq ojtzqiꞌnl tuꞌn Dios atxix naꞌmtaq tkubꞌ xkye tkyaqil, ex ax jaw skꞌoꞌnkye, tuꞌn kyok te tkꞌwal, ex tuꞌntzin tokjo Tkꞌwal, a Jesús, te tnejil kyxol tkyaqil nimil. 30 Ex ayeꞌ i jaw tskꞌoꞌn t-xe tnejil, ma chi ttxok, tuꞌn kyok te te. Ex ayetzin ẍi ttxok, i ok tqꞌoꞌn te tzꞌaqle twutz. Ex aye ẍi ok tqꞌoꞌn te tzꞌaqle, ma tzaj tqꞌoꞌn kyoklin toj tqoptzꞌajiyil kyaꞌj.

31 ¿Tzeꞌntzila quꞌn? Qa a Dios at qukꞌa, ¿Altzila kye aku tzꞌok meltzꞌajtz qiꞌj? 32 Quꞌn mipe xkubꞌ t-xkꞌaꞌyin te Diostz a Tkꞌwalku, quꞌn ma txi tqꞌoꞌn tuꞌn tkyim tuꞌn qpaj. ¿Nyaꞌpela ktzajil tqꞌoꞌntz tkyaqiljo at tajbꞌin qe junx tukꞌa Tkꞌwal? 33 A Dios o jaw skꞌoꞌnqe tuꞌn qok te tzꞌaqle twutz. ¿Ma atpela jun aku txi patinqe? 34 ¿Altzila kye jun aku ja yasintz qiꞌj? ¡Mix aꞌl! Quꞌn ate Crist o kyim, ex o jaw anqꞌin juntl majl kyxol kyimnin, ex lu at jaꞌlin toj kyaꞌj toj tman qꞌobꞌ qMan Dios, ex nkubꞌsin twutz qiꞌj. 35 ¿Ma atpela jun aku tzꞌel paꞌnqe tiꞌjjo tqꞌaqꞌbꞌil tkꞌuꞌj Crist? ¿Ma apelaꞌ yajbꞌil, a n-ikyꞌx quꞌn, apelaꞌ bꞌis, ayepelaꞌ ajqꞌoj, tuꞌnpelaꞌ waꞌyaj, tuꞌnpelaꞌ ntiꞌ qxbꞌalin, tuꞌnpelaꞌ xobꞌajil, apelaꞌ kyimin? 36 Quꞌn ntqꞌmaꞌn toj Tuꞌjil Tyol Dios:

37 Me tojxix kykyaqiljo lo, ma kubꞌ kyiꞌj quꞌn, noq tuꞌn Crist, a kꞌuꞌjlinqo tuꞌn. 38 Tuꞌnpetziꞌn, qꞌuqle nkꞌuꞌja qa mix aꞌl jun aku tzꞌel paꞌnqe tiꞌj tqꞌaqꞌbꞌil tkꞌuꞌj qMan Dios: Exla qa ma qo kyim, exla qa itzꞌqo; exla qa kyuꞌn angel, exla qa kye taqꞌnil tajaw il; exla qa a at tzaluꞌn twutz txꞌotxꞌ jaꞌlin, exla qa a tzul kanin; exla qa tkyaqil wiq kyipin aꞌla. 39 Ex ikyxjo, mixla aꞌlx aku tzꞌel paꞌnqe tiꞌj Dios, jaꞌchaqxla otoꞌtz: Exla qa jawl, exla qa kubꞌl. Ntiꞌxla juntl tbꞌinchbꞌin Dios aku tzꞌel paꞌnqe tiꞌjjo tqꞌaqꞌbꞌil tkꞌuꞌj, a ma tzaj tqꞌoꞌn tuꞌn qAjaw Crist, a Jesús.