1 Ayiꞌy werman, nimxix nqꞌaqꞌin tkꞌuꞌj qMan Dios kyiꞌja. Tuꞌnpetziꞌn, nchin kubꞌsin nwutza kyeꞌy, tuꞌn t-xi kyqꞌonjiꞌy kyxmilila te tzeꞌnku jun oyaj itzꞌ, xjanxix ex tbꞌanilx twutz qMan Dios. Quꞌn atziꞌn tumil kykꞌulbꞌiljiꞌy luꞌn, twutzxix ex tojxix tumil. 2 Ikytziꞌn, mi chi ok lipeꞌy tiꞌjjo kynabꞌlxjal tzaluꞌn twutz txꞌotxꞌ; qalaꞌ kytxꞌixpinks kynabꞌla, tuꞌntzin ttxꞌixpitjo kychwinqila, tuꞌn tokjo kynabꞌla saqxix wen. Quꞌn ikytzin k-elile kynikyꞌjiꞌy te tajbꞌil qMan Dios, a tbꞌanilx, a tzꞌaqlexix, a ntzalaj Dios tiꞌj.

3 Noq tuꞌn t-xtalbꞌil qMan Dios, ma tzaj qꞌoꞌn wokliꞌn tuꞌn t-xi nqꞌmaꞌn kyeꞌy, tuꞌn mix aꞌl jun, jaw tnimsin tibꞌ kywutzjo txqantl; qalaꞌ teyilex te junjun tuꞌn tkubꞌ t-ximin tojxix tumil, tzeꞌnkuxjo tnimbꞌil o tzaj tqꞌoꞌn Dios. 4 Quꞌn ikytziꞌn tzeꞌnku qe, at jun qxmilil, ilaꞌ elnin; ex nya ax toklin junjun.✡1Co. 12:12. 5 Ikytzin qteꞌn, ma nintz qbꞌaj, me ma tzaj qꞌoꞌn qoklin tuꞌn qok te junxchꞌin qxmilil, a t-xmilil Crist. 6 Quꞌn teyilex te junjun toklin ma tzaj qꞌoꞌn tzeꞌnkuxjo taj qMan Dios, tuꞌn t-xtalbꞌil.✡1Co. 12:4-11. Tuꞌnpetziꞌn, qa ma tzaj tqꞌoꞌn Dios qoklin tuꞌn qyolin Tyol, qbꞌinchinku tzeꞌnkuxjo qnimbꞌil ma tzaj tqꞌoꞌn. 7 Ex qa ma tzaj tqꞌoꞌn tuꞌn qajbꞌin kye txqantl, qo okin bꞌaꞌnxix; ex qa ma tzaj tqꞌoꞌn tuꞌn qxnaqꞌtzin, qqꞌonk tilil, tuꞌn qxnaqꞌtzin wen. 8 Qa ma tzaj qꞌoꞌn tuꞌn qoksin kykꞌuꞌj txqantl, bꞌaꞌn tuꞌn tok tilil quꞌn; qa ma tzaj qꞌoꞌn qoklin tuꞌn qsipin chꞌin tiꞌjjo at qe, qqꞌonx tukꞌa tkyaqil qanmin. Ex qa ma tzaj qꞌoꞌn qoklin te nejinel, bꞌaꞌn tuꞌn tjapin bꞌajx quꞌn toj tumil; ex qa ma tzaj qꞌoꞌn qoklin tuꞌn tqꞌaqꞌin qkꞌuꞌj tiꞌj jun qukꞌa, qꞌaqꞌinx qkꞌuꞌj tukꞌa tzaljbꞌil.

9 Kykꞌuꞌjlink kyibꞌa kyxolxa, nya tukꞌa kabꞌe kykꞌuꞌja. Kyiꞌjlemiljiꞌy tkyaqiljo nya wen, ex chi lipeka tiꞌjjo wen. 10 Qꞌaqꞌinx kykꞌuꞌja kyxolxa nyakuj kyitzꞌin kyibꞌa, ex kyqꞌonxa ambꞌil te juntl, tuꞌn tkubꞌ kynimin kyibꞌa kyxolxa. 11 Kyqꞌonka tilil tiꞌj kynimbꞌila, ex mi chi kubꞌ numja. Qalaꞌ chi ajbꞌinxita te qAjaw tukꞌa tkyaqil kyanmiꞌn. 12 Chi tenxita toj tzaljbꞌil, tuꞌn qꞌuqbꞌil kykꞌuꞌja at; ex chi ayonxita tajbꞌil qMan, qa ma tzaj jun tiꞌ kyiꞌja. Ex kukxit chi naꞌnjiꞌy Dios. 13 Chi oniꞌn kyiꞌjjo nimil, ayeꞌ atx taj kye. Ex kyxkꞌaminqekujiꞌy toj kyjaꞌy aye nchi kanin qꞌolbꞌil kyeꞌy. 14 Mi txiꞌ kyqaniꞌn qanbꞌil kyibꞌajjo nchi bꞌinchin mibꞌin kyiꞌja, qalaꞌ kyqaninxa tkyꞌiwbꞌil Dios kyibꞌaj.✡Lc. 6:28. 15 Chi tzalajxa kyukꞌa nchi tzalaj; ex chi oqꞌa kyukꞌa nchi oqꞌ. 16 Chi tenxixa tukꞌa nukꞌbꞌil kyxolxa. Mi jaw kynimsin kyibꞌa,✡Pr. 3:7. ex mi chi tzaj txꞌixwiꞌy tuꞌn tok kymujbꞌin kyibꞌa kyukꞌa tal mutxin xjal. 17 Mi kubꞌ kybꞌinchiꞌn nya wen kyiꞌjjo aye nchi bꞌinchin nya wen kyiꞌja; qalaꞌ kyqꞌonka tilil, tuꞌn kybꞌinchintejiꞌy wen twutz tkyaqil. 18 Kyqꞌonka tilil, tuꞌn kyjyon tumil tuꞌn kyanqꞌiꞌn tukꞌa jun nukꞌbꞌil kyukꞌa kykyaqil xjal. 19 Ayiꞌy werman, kꞌuꞌjlinqiꞌy wuꞌn; mi txi kyqꞌoꞌn t-xeljo nya wen tukꞌa nya wen; qalaꞌ kyqꞌonkja tukꞌa Dios, quꞌn ate Dios kkawil. Quꞌn ikytziꞌn ntqꞌmaꞌn toj Tuꞌjil Tyol Dios:

20 Quꞌn ikyxjo ntqꞌmaꞌn:

21 Mi txi kyqꞌoꞌn kyibꞌa tuꞌn tkubꞌ kyiꞌja tuꞌn nya bꞌaꞌn; qalaꞌ ate nya bꞌaꞌn tuꞌn tkubꞌ tiꞌj, tuꞌn wen nkubꞌ kybꞌinchiꞌn.