Xi³ ti¹tjon² xon⁴xi³ pa²stro⁴Juan qui³squi³-le⁴nca³tsˀi³
1
Je² en¹ xi³ tsjoa¹ cjoa⁴vi³jna³chon³
Je² xi³ ti¹jna³ sa³ˀnta³ nca³ to²tsˀin³-le⁴ cjoa⁴, xi³ qui³no²ˀyai²⁴-jin⁴, xi³ xcoin³⁴-jin⁴ tsa³ˀya³-ni³jin⁴, xi³ qui³cho²tsen³-lai⁴jin⁴, xi³ ntsai⁴-jin⁴ qui³ni²cao⁴-ni³jin⁴, xi³ tˀa³tsˀe⁴ je² en¹ xi³ tsjoa¹ cjoa⁴vi³jna³chon³ nca³ntsjai². (Je² cjoa⁴vi³jna³chon³-ve⁴ coan³tsen³-ni¹. Tsa³ˀyai³⁴-jin⁴. Jin⁴ ni¹⁴-jin⁴ testigo, vˀai²⁴-jin⁴ en¹, cˀoa⁴ vˀai²⁴-jin⁴ cjoa⁴qui²xi⁴ xi³ tˀa³tsˀe⁴ je² cjoa⁴vi³jna³chon³ nca³ntsjai²-ve⁴ xi³ ti¹jna³tˀa³-le⁴ Nˀai³-na¹, xi³ coan³tsen³-na³jin⁴.) Je² xi³ tsa³ˀyai³⁴-jin⁴ xi³ qui³no²ˀyai²⁴-jin⁴, je²-vi⁴ xi³ cˀoa⁴-ti⁴sˀin² no²cjoa⁴ya³jin³-lai²⁴jin⁴, jme¹-ni³ nca³ cˀoa⁴-ti⁴ jon² coi⁴yo³cjao³-si¹nio³ cao⁴ jin⁴-jin⁴. Xi³ ña³qui³ cjoa⁴qui²xi⁴ jin⁴-jin⁴ ti³yo³cjoai³⁴-jin⁴ Nˀai³-na¹ cao⁴ ˀnti¹-le⁴ Jesucristo. Je² cjoa⁴-vi⁴ cˀoa⁴-sˀin² chji³-lai²⁴jin⁴, jme¹-ni³ nca³ coan⁴tse³ya³-si¹ni³ cjoa⁴tsjoa³-no³.
Je² Ni³na¹ xi³ si¹ˀi³sen³
Je² cjoa⁴qui²xi⁴ je²-vi⁴ xi³ qui³no²ˀya²-lai⁴jin⁴, xi³ no²cjoa⁴ya³jin³-lai²⁴jin⁴ nca³ jon². Je² Ni³na¹ xi³ si¹ˀi³sen³, tsin² cjoa⁴njion²-jin² xi³ tsˀe⁴ ni⁴ˀi⁴tse¹-jin². Tsa² ña¹ xi³ cˀoa⁴coi⁴xoan¹ nca³ ti³yo³cjoa³² cao⁴ je², cˀoa⁴ to⁴ya⁴-ni¹ jña³ nca³ njion² ma³nquian¹, to⁴vˀe²nti³soa³². Li²coi³-ni³ cjoa⁴qui²xi⁴ xi³ nˀian². Cˀia⁴ tsa² jña³ nca³ i³sen³ ma³nquian¹, jo³-sˀin² jña³ nca³ i³sen³ ti¹jna³ nca³ je², cˀoa⁴-sˀin² ti³yo³cjoa³² xi²nquia⁴², cˀoa⁴ njin¹-le⁴ Jesucristo ˀnti¹-le⁴ Ni³na¹ si¹tsje³ya³-na¹ nca³yi³je³ je¹-na¹. Tsa² cˀoa⁴coi⁴xoan¹ nca³ tsin²-na¹ je¹, ti⁴ña¹ chˀa²na⁴cha⁴-ni³le⁴² yao³-na¹. Tsin²-na¹ xi³ cjoa⁴qui²xi⁴. Tsa² ni²qui²xi⁴ya³nta³² je¹-na¹, Ni³na¹ nˀion¹tˀa³con³, cˀoa⁴ tjin¹-le⁴ cjoa⁴qui²xi⁴, si¹cha³tˀa³ je¹-na¹, cˀoa⁴ si¹tsje³-na¹ nca³yi³je³ xi³ li²coi³ nta³ tjin¹. 10 Tsa² cˀoa⁴coi⁴xoan¹ nca³ li²coi³ tsa³qui³jncha³² je¹, Ni³na¹ chˀa³sje³nti³soa³². Je² en¹-le⁴ li²coi³ vˀe²jin³ta³coan³².