1 Midhendiyà si Rehoboam te Shekem, su ziyà meburunburun is menge Israilihanen su ibpahayag dan is kedhimuwa zan kandin he hadì dan. 2 Hein nezineg haazà ni Jeroboam he anak ni Nebat, ne midlikù sikandin diyà te Israel. (Su ziyà sikandin meke-ubpà te Ehipto, su mibpeleǥuyan din si Hadì Solomon.) 3 Impetawag te keet-etawan te Israel si Jeroboam, ne pudu zan midhendiyà te ki Rehoboam ne ke sikandan te, 4 “Meveǥat is mibpeveelan kenami te amey nu. Piru emun ebpekemehegkapen nu heini, ne ebpenilbi key kenikew.”

5 Midtavak si Rehoboam te, “Beǥayi a zèpa keniyu te tetelu he andew te ked-isip-isip kayi, egkepasad haazà ne likù kew kayi te kedì.” Umbe mid-ulì haazà is menge etew. 6 Nekid-ahà si Hadì Rehoboam te ebpemendumala he nemenilbi te amey zin he si Solomon hein uuyag pa sikandin. Mid-insà si Rehoboam diyà te kandan te, “Hengkey is igkesambag niw kedì he igketavak ku zuen te menge etew mehitenged te hangyù dan?” 7 Ne midtavak dan te, “Emun ibeǥey nu kandan is hangyù dan, wey ibpeehè nu kandan he andam ka he ebpenilbi kandan, ne ebpenilbi sikandan kenikew taman te taman.”

8 Peru wazà pezumdumahi ni Rehoboam is sambag dan kandin, kekenà, iyan midhinguma zin is menge vetan-en he iring din te kengunguhezi he ebpenilbi kandin. 9 Mid-insaan din sikandan te, “Hengkey is sambag niw kedì te idtavak ku te hangyù kedì dutun te menge etew? Iyan hangyù dan is pekehegkapa ku is meveǥat he mibpeveelan kandan te amey ku.” 10 Midtavak haazà is menge vetan-en te, “Iyan heini itavak nu zutun te menge etew he midhangyù kenikew: ‘Is tindezeisey ku ne zekelè pa te hawak te amey ku. 11 He ke và dà egkegiya, meveǥat pa is ibpetuman ku keniyu kenà is impetuman te amey ku. Emun midlagkut kew te amey ku te letigu, ne iyan idlagkut ku keniyu is iring te venayew he meǥarang he menge putew.’ ”

12 Midlavey is tetelu zutun he andew, ne midlikù dutun si Jeroboam wey is menge etew ziyà te ki Hadì Rehoboam, sumalà te migkaǥi te hadì kandan. 13 Piru wazà pezumdumahi ni Rehoboam is menge sambag kandin dutun te menge ebpemendumala. Kekenà, midrengrengitan din dà haazà is menge etew 14 sumalà te sambag kandin duen te menge vetan-en. Migkeǥiyan din sikandan te, “Meveǥat is impetuman te amey ku keniyu, piru meveǥat pa is ibpetuman ku keniyu. Emun midlagkut kew te amey ku te letigu, ne iyan idlagkut ku keniyu is iring te venayew he memeǥarang he putew.”

15 Umbe wazà pemineǥa zutun te hadì is hangyù dutun te menge etew, su paaǥi te Nengazen he iyan egketuman is migkaǥi zin diyà te ki Jeroboam he anak ni Nebat pinaaǥi ki Ahia he tig-Shilo. 16 Hein neisip-isip te menge Israilihanen he wazè dan pemineǥa te hadì, ne migkeǥiyan dan is hadì te, “Wazè dey lavet kenikew te kevuwazan ni David! Belaǥad ka keniyan te ginhedian nu! Hengkayi kew en is menge Israilihanen, su ebpemen-ulì kiw!” Ne nemen-ulì is menge Israilihanen. 17 Iyan dà is menge Israilihanen he menge meǥinged diyà te Juda pedayun is kedumelaha kandan ni Rehoboam.

18 Duen timpu he impehendiyà ni Hadì Rehoboam te menge Israilihanen si Adoram, kes edumala te menge etew he ebpeǥesen te kedterebahu. Iyan inhendiyè din is ebpekidhusayà pezem kandan. Piru mibpenuleng dan te vatu si Adoniram taman te minatey. Ne zutun migaanggaan si Rehoboam med-untud te kerwahi zin ne mibpelaǥuy pehendiyà te Jerusalem. 19 Ne minsan guntaan edribildiyan te menge Israilihanen is menge kevuwazan ni David.

20 Ne si Jeroboam mulà, hein netuenan te langun he menge Israilihanen he nekeulì en sikandin, impetawag dan sikandin diyà te ketiǥuman dan, ne midhimu zan sikandin he hadì te tivuuk he Israel. Iyan dà is tribu ni Juda pedayun he nekid-uunungen te menge kevuwazan ni David.

21 Ne hein nekeuma si Rehoboam diyà te Jerusalem, midtiǥum din is memetau he menge sundaru ziyà te tribu ni Juda wey ni Benjamin. Neketiǥum sikandin te 180,000 he menge sundaru he id-asdang din te menge Israilihanen su edhewien din is ginhedian din. 22 Piru migkeǥiyan te Megbevayà si Shemaya he suluǥuen din te, 23 “Keǥiyi nu si Hadì Rehoboam he hadì te Juda, he anak ni Solomon, wey is langun he menge etew ziyà te Juda wey menge kevuwazan ni Benjamin wey is duma zan he menge meǥinged 24 he iyan a, is Nengazen migkaǥi te, ‘Kenè kew pekidtebek te menge kezuzumahi niw he menge Israilihanen. Ulì kew, su kediey he suat he mahadì si Jeroboam.’ ” Mibpezumazuma sikandan te Nengazen ne nemen-ulì dan, su iyan haazà insuǥù te Nengazen kandan.

25 Mibpeveelan ni Jeroboam te verengbeng is inged he Shekem diyà te vuvungan te Efraim, ne zutun sikandin med-ubpà. Dutun te huziyan he timpu, midhendiyà sikandin te Penuel ne midlig-enan din daan heini. 26 Kesikandin diyà te isip din te, “Kela ke mekelikù heini is ginhedian ku ziyà te menge kevuwazan ni David 27 emun ebpedayun is layun kedhendiyà te menge etew te Jerusalem te kebpemuhat diyà te valey te Nengazen. Egkehimu ke ed-uman dan ebpekid-uunungen te egalen dan diyà te Juda he si Hadì Rehoboam. Ne emun egkeulaula heeyan, ne edhimetayan e zan ne edlikù dan diyà te ki Rehoboam.”

28 Umbe, hein nepasad is kebpesambag ni Jeroboam mehitenged kayi te neisip din, ne mibpevaal sikandin te zezuwa he vulawan he vaka. Ne migkeǥiyan din is menge etew te, “Sikiyu is menge Israilihanen, egkereǥenan kew en te layun kedhendiyà te Jerusalem. Ne heini zed is menge ed-ezapen he mibpeǥawas keniyu ziyà te Ehipto.” 29 Is sevaha zutun te vulawan he vaka impesavuk din diyà te Betel ne is sevaha pa, ziyè din ipesavuk te Dan. 30 Heini is mibeelan ni Jeroboam nehimu he hinungdan te kebpekesalà te menge tig-Israel. Ebpekeumauma sikandan diyà te Dan is ed-azap.

31 Mibpevaal pa si Jeroboam te menge simbahan diyà te metikang he menge lugar, ne zuen menge etew he midhimu zin he menge memumuhat, minsan kenà sikandan kevuwazan ni Levi. 32 Midtukud daan sikandin te pista emun ike-15 he andew te ikewalu he vulan te iring te pista ziyà te Juda. Dutun he andew, ebpemuhat sikandin diyà te Betel te menge pemuhat diyà te pemuhatà he para zuen te menge vulawan he vaka he impeveelan din. Ne mibpilì sikandin te menge memumuhat he idsavuk din diyà te menge simbahan he mibpeveelan din diyà te metikang he menge lugar. 33 Dutun he andew te kebpemuhat din diyà te pemuhatà he impeveelan din diyà te Betel, mibpuunan din is pista he para te menge Israilihanen. Iyan mismu sikandin midtail te ike-15 he andew te ikewalu he vulan para kayi he pista.