2 Cronica
1
Mibuyù si Solomon te Ketau
(1 Menge Hadì 3:1-15)
Nehimu he utew melig-en is kedhadì ni Solomon he anak ni David diyà te ginhedian din su miduma kandin is Nengazen he Megbevayè din, wey midhimu zin sikandin he utew gehemanen. Ne mibpekidlalag si Solomon te langun he menge Israilihanen, te menge peremandar te menge linibu wey menge ginatus he menge sundaru, te menge menhuhusey, te langun he menge pengulu te Israel, wey te langun he menge pengulu te menge pemilya. Ne migenat si Solomon wey is tivuuk he keet-etawan pehendiyà te simbahan diyà te metikang he lugar ziyà te Gibeon, su ziyà kes Tulda he Edtelevukaayan te Megbevayà. Heini he Tulda ne mibpeveelan ni Moises he suluǥuen te Nengazen diyà te sibsivayan. Dutun he timpu ne neuwit en ni David kes Kavan te Kebpekid-uyun te Megbevayà he ebpuun te Kiriat Jearim pehendiyà te tulda he inteǥana zin para kayi diyà te Jerusalem. Piru sikan is brunsi he pemuhatà he mibeelan ni Bezalel he anak ni Uri he apù ni Hur, ne ziyè pa te Gibeon dutun te etuvangan te Tulda te Nengazen. Umbe ziyà medtiǥum si Solomon wey is tivuuk he keet-etawan te kebpenginginsà te Nengazen. Ne nemenahik si Solomon diyà te pemuhatà he brunsi ziyà te etuvangan te Nengazen diyà te Tulda he Edtelevukaayan, ne mibpemuhat sikandin te 1,000 he menge pemuhat he edtutungen.
Haazà he kezukileman, mibpaahà is Megbevayà ki Solomon ne migkeǥiyan din sikandin te, “Buyù ka te minsan hengkey he egkesuatan nu su ibeǥey ku kenikew.” Midtavak si Solomon te, “Impeehè nu is dekelà he ǥaǥew nu te amey ku he si David, ne ǥuntaan ne iyan a impuli nu he hadì. Ne ǥuntaan, Nengazen he Megbevayà, tumana nu is impenangdù nu te amey ku he si David, su midhimu a kenikew he hadì te keet-etawan he iring kezakel te pantad. 10 Beǥayi a te ketau wey keuluwanen wey ku mezumala heini he keet-etawan. Su hentei zà buwa etawa is ebpekehimu he edumala kayi te utew mezakel he keet-etawan nu?”
11 Migkeǥiyan te Megbevayà si Solomon te, “Geina te mibuyù ka te ketau wey keuluwanen te kedumala kayi te keet-etawan ku he ebpehedian ku kenikew, ne wazè ka mebuyù te ketiǥeyunan etawa dengeg etawa kegkepetaya te menge kuntada nu etawa meluǥayad he untung, 12 ne ibeǥey ku kenikew is ebuyuen nu. Ne kenà iyan dà heeyan su ed-umanan ku pa sikew te zekelà he ketiǥeyunan wey zengeg he wazè pa maangken te minsan hentei he hadì he nehuna kenikew. Wey kenà daan egkaangken te edsunud pa he menge hadì.”
13 Ne zutun ne mid-awà dutun si Solomon te Tulda he Edtelevukaayan diyà te simbahan he ziyà te metikang he lugar ziyà te Gibeon, ne midlikù sikandin diyà te Jerusalem. Ne midhadì sikandin diyà te Israel.
Is menge Ketiǥeyunan ni Solomon
(1 Menge Hadì 10:26-29)
14 Neketiǥum si Solomon te 1,400 he menge kerwahi wey 12,000 he kudà. Is duma kayi, ziyè din ipelastar te menge inged din he selevukà te menge kerwahi zin, ne is duma pa, ziyà te kandin diyà te Jerusalem. 15 Dutun te timpu te iyan sikandin hadì, henduen dà te vatu is ked-isipa te pelata wey vulawan tenged te kezekelè din, ne is kahabet te mahalen he kayu he sidru ne henduen be te ebpekeiring dà te urdinaryu he kayu he sikemur ziyà te menge mibuntud-buntud diyà te edsenlepan. 16 Is menge kudà ni Solomon diyà ebpuun te Ehipto wey Cilicia. Hustu he vali is impemasa kayi ziyà te Cilicia te menge perepemasa. 17 Dutun he timpu is bali te kerwahi he ebpuun diyà te Ehipto ne 600 he vuuk he pelata, ne is kudà 150 he vuuk he pelata. Ne imbelegyà heini te menge etew ni Solomon diyà te langun he menge hadì te menge Hitihanen wey te menge Aramihanen.