1 Hein minatey en si Ahab, is nasyun he Moab wazè en mebpezizalem te keǥehem te Israel.

2 Ne sevaha he andew, neulug si Hadì Ahazia ziyà te rihas-rihas puun diyà te zivavew he endana te turuǥan din diyà te Samaria, ne nepurung sikandin meruuǥi. Tenged dutun duen menge etew he midsuǥù din he ibpehendiyà te simbahan he zutun ed-ezapa si Baal Zebub, he ed-ezapen diyà te Ekron, su wey zan mekeinsa ke egkeulian ded be sikandin.

3 Piru migkeǥiyan te velinsuǥuen te Nengazen si Elias he tig-Tishbe te, “Genat ka ne hingumaa nu sikan is menge etew he midsuǥù duen te hadì te Samaria ne keǥiyi nu te, ‘Maan is edhendiyè kew te ki Baal Zebub, he ed-ezapen diyà te Ekron? Wazè be Megbevayà te Israel? 4 Ne tenged keniyan heini zed is egkeǥiyen te Nengazen diyà te hadì. Kenè ke en egkaawà keniyan te edhizeǥaan nu, su siguradu he ebpatey ka!’ ” Umbe migenat si Elias te kegkaǥi zutun te ibpekaǥi kandin.

5 Ne hein nelelaǥan en ni Elias sikan is menge menunudtulà, midlikù dan duen te hadì. Umbe mid-insaan sikandan dutun te hadì, “Maan is utew kew meǥaan he nekelikù?” 6 Ne midtavak dan te, “Duen etew he midhinguma kenami he ke sikandin te, ‘Likù kew ziyà te hadì ne tudtula niw heini is lalag te Nengazen diyà te kandin: Maan is midsuǥù ka te ibpehendiyà te ki Baal Zebub he ed-ezapen diyà te Ekron, te ked-insà ke egkeulian ke zed be? Wazè be Megbevayà te Israel? Ne ǥeina te mibeelan nu heini, ne kenè ke en ebpekeenew keniyan te edhizeǥaan nu, su siguradu he ebpatey ka!’ ”

7 Mid-insà haazà is hadì te, “Hentei heini etawa? Memenumenu sikandin?” 8 Midtavak dan te, “Mibivisti sikandin te hinavel he vulvul te uyaǥen wey bevakes te lundis.” Ne migkaǥi haazà is hadì te, “Iyan sikandin si Elias he tig-Tishbe.” 9 Ne midsuǥù is hadì te sevaha he upisyal duma te 50 he menge etew te kedakep ki Elias. Hein neturedu zuen te upisyal si Elias he ebpimpinuu ziyà te puntur te vuvungan, migkeǥiyan dutun te upisyal te, “Sikew is suluǥuen te Megbevayà, midsuǥù a te hadì he ibpehendiyè ka te kandin.” 10 Ne midtavak ni Elias haazà is upisyal te, “Geina te suluǥuen a te Megbevayà ne meulug guntaan is hapuy he ebpuun te langit he edezaat kenikew wey te 50 he menge etew nu!” Ne neulug is hapuy he ebpuun te langit he nekepatey zuen te kepitan wey te 50 he menge etew zin.

11 Ne mid-uman medsuǥù is hadì te sevaha he pa upisyal duma te 50 he menge etew te kedakep ki Elias. Migkeǥiyan duen te upisyal si Elias te, “Sikew is suluǥuen te Megbevayà, migkaǥi is hadì te kinahanglan he pehendiyà guntaan te kandin!” 12 Ne midtavak si Elias te, “Geina te suluǥuen a te Megbevayà ne meulug guntaan is hapuy he ebpuun te langit he edezaat kenikew wey te 50 he menge etew nu!” Ne neulug en maan is hapuy te Megbevayà he ebpuun te langit he nekepatey kandan.

13 Mid-uman en maan medsuǥù haazà is hadì te iketelu he upisyal duma te 50 he etew. Ne hein nekeuma haazà is upisyal ziyà te ki Elias midluhud sikandin diyà te ki Elias su edtahud, wey ebpehizuhizu, “Sikew is suluǥuen te Megbevayà, ikehizu a kenikew wey is menge etew ku. Kenè key kenikew himetayi is menge suluǥuen nu. 14 Su emun kenà, ne egkeiring key zuen te zezuwa he grupu he nezeetan pinaaǥi te hapuy he ebpuun diyà te langit. Piru sikami mulà, ne ikehizu key!”

15 Ne zutun mid-umanan keǥiyi si Elias te velinsuǥuen te Nengazen te, “Kenè ka mahandek. Duma ka kandin.” Ne midhitindeg si Elias ne miduma pehendiyà te hadì.

16 Ne migkeǥiyan ni Elias haazà is hadì te, “Iyan heini egkeǥiyen te Nengazen: ‘Maan is duen midsuǥù nu he menge etew he ibpehendiyà te ki Baal Zebub, he ed-ezapen diyà te Ekron, te ked-insà ke egkeulian ke zed be? Wazè be Megbevayà te Israel? Ne ǥeina te mibeelan nu heini, ne kenè ke en egkaawà keniyan te edhizeǥaan nu, su siguradu he ebpatey ka!’ ”

17 Umbe, minatey si Ahazia sumalà is nekaǥi te Nengazen pinaaǥi ki Elias. Ne ǥeina te wazè din anak he maama he ebpekeilis kandin, ne iyan si Joram he suled din nekeilis kandin te kedhadì. Mibpuun sikandin medhadì hein ikezuwa he tuig te kedhadì ni Jehoram he anak he maama ni Hadì Jehoshafat he hadì te Juda. 18 Is duma pa he ǥuǥud mehitenged te kedhadì ni Ahazia, wey is menge mibeelan din, ne ingkesurat diyà te Libru he Midsuratan te menge Keguǥuza te menge Hadì te Israel.