1 Dutun te nehuna he timpu migkeǥiyan ni Elisha sikan is bahi he mibanhew ni Elisha is anak din te, “Dumaha nu is pemilya nu ne ziyè kew upbà te selakew en he lugar, su migkaǥi is Nengazen te egkehitavù is pitu he tuig he vitil kayi te Israel.” 2 Ne mibpezumdumahan dutun te vahi haazà is migkaǥi zuen te suluǥuen te Megbevayà. Migenat sikandin duma is pemilya zin ne ziyà med-ubpà te tanà te menge Filistihanen seled te pitu he tuig.

3 Ne hein midlavey en is pitu he tuig, midlikù sikandin diyà te Israel ne midhendiyà sikandin te hadì su midhangyù he tevangi sikandin he mekelikù diyà te kandin is baley zin wey is tanè din. 4 Ne hein edseled en sikandin, mibpekidlalag sikan is hadì ki Gehazi he suluǥuen ni Elisha. Migkaǥi haazà is hadì te, “Tudtuli a kenikew te langun he egkein-inuwan he menge vaal he mibeelan ni Elisha.” 5 Ne zutun te edtudtulen ni Gehazi zutun te hadì ke mibmenumenu ni Elisha te ed-uyag sikan is batà he minatey, ne mid-uvey zutun te hadì sikan is iney zuen te vatà ne midhangyù he tevangi sikandin he mekelikù diyà te kandin is baley zin wey is tanè din. Migkaǥi si Gehazi te, “Mahal he Hadì, iyan heini sikan is bahi, ne iyan heini sikan is anak din he mid-uyag ni Elisha.” 6 Ne mid-insaan dutun te hadì haazà is bahi mehitenged dutun, ne midtudtulan sikandin duen te vahi. Umbe mibpetawag haazà is hadì te sevaha he upisyal he ebpekeuǥup dutun te vahi. Migkeǥiyan din haazà is upisyal te, “Tevangi nu sikandin he mekelikù diyà te kandin is langun he ǥaked din, ragkes en is langun he netiǥeyunan diyà te vevesukè din puun te kegenat din taman kayi te kebpekelikù din.”

7 Ne midhendiyà si Elisha te Damascus, he iyan kepital te Aram, he zutun mezeruwi si Hadì Ben Hadad he hadì te Aram. Ne hein netudtulan haazà is hadì he zutun sikan is suluǥuen te Megbevayà, 8 migkeǥiyan din si Hazael te, “Uwit ka te gasa ne sinuǥunga nu is suluǥuen te Megbevayà. Ne keǥiyi nu sikandin he insai zin is Nengazen ke egkeulian e pa kayi te zaru ku.”

9 Umbe, migkergahan ni Hazael is 40 he kemilyu te kinemeupiyahan he menge pruduktu ziyà te Damascus ne mid-uwit din diyà te ki Elisha su igasa zin. Ne hein nekeuma sikandin diyà te ki Elisha, ke sikandin te, “Midsuǥù a te suluǥuen nu he si Ben Hadad, he hadì te Aram, te ked-insà diyà te kenikew ke egkeulian pe be sikandin te zaru zin.” 10 Midtavak si Elisha te, “Ulì ke en ne keǥiyi nu sikandin he siguradu he egkeulian sikandin, piru impahayag te Nengazen kayi te kedì he ebpatey sikandin.” 11 Ne mibpemusiǥahan ni Elisha si Hazael taman te neeled heini. Ne midsineǥew si Elisha. 12 Mid-insaan sikandin ni Hazael, “Maan, datù, is midsineǥew ka?” Midtavak si Elisha, “Geina te netuenan ku is mezaat he ebeelan nu te menge Israilihanen. Ebinsulan nu is binerengbeng he menge inged dan, ebpenhimetayan nu is menge vetan-en kandan, edrunteken nu is dezeisey he menge vatà kandan, wey edsirian nu is meǥingey he menge vahi kandan.” 13 Midtavak si Hazael, “Datù, kenè ku heeyan egkehimu. Su wazè ku ǥehem te kebaal keniyan.” Midtavak si Elisha te, “Impahayag te Nengazen kayi te kedì he egkehimu ka he hadì diyà te Aram.”

14 Midlikù si Hazael ziyà te egalen din he si Ben Hadad, ne mid-insaan sikandin ni Ben Hadad te, “Hengkey is migkaǥi te Nengazen diyà te kenikew?” Midtavak si Hazael te, “Migkaǥi sikandin kayi te kedì he siguradu he egkeulian ka.” 15 Piru hein mid-ilis he andew, migkuwa si Hazael te mekepal he manggad ne intereb din ne nesuep heini te wahig ne iyan migamit din haazà te kebpueta zin duen te hadì taman te minatey. Ne si Hazael is mid-ilis kandin te kedhadì.

16 Nehimu he hadì diyà te Juda si Jehoram he anak ni Jehoshafat hein ikelima he tuig te kedhadì ni Joram diyà te Israel te anak ni Ahab. 17 Mibpenuiǥen si Jehoram te 32 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te walu he tuig. 18 Midsunud din is mibeelan te menge hadì te Israel, iring te mibeelan te pemilya ni Ahab, su neesawa zin is anak ni Ahab. Mezaat is ulaula zin diyà te etuvangan te Nengazen. 19 Piru tenged ki David, wazà dèdeeti te Nengazen is Juda, su nenaad is Nengazen diyà te ki David he ebpedayun is kebpekahadì te menge kevuwazan din taman te taman.

20 Hein timpu te kedhadì ni Jehoram, nekidsukulà is Edom te Juda, ne mibpilì dan te keugelingen dan he hadì. 21 Umbe, midhendiyà si Jehoram te Zair he mid-uwit din is langun he kerwahi zin. Midliǥuyan sikandin wey is menge peremandar te menge kerwahi zin te menge Edomanhen. Piru hein mezukilem, midtik-awan dan etekiya is menge Edomanhen, ne nekepelaǥuy zan su nekelawang dan. Ne zutun mid-ulì is menge sundaru ni Jehoram. 22 Taman en guntaan ne kemulu pa ebpekidsukulà is Edom te Juda. Ne zutun daan he timpu nekidsukulà daan is Libna te Juda.

23 Is duma pa he ǥuǥud mehitenged te kedhadì ni Jehoram, wey is langun he mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda. 24 Ne hein minatey en si Jehoram inleveng sikandin diyà te midlevengan te menge kepuun din diyà te Inged ni David. Ne iyan nekeilis kandin te kedhadì is anak din he si Ahazia.

25 Nehimu he hadì diyà te Juda si Ahazia he anak ni Jehoram hein ike-12 he tuig te kedhadì ni Joram, he anak ni Ahab, diyà te Israel. 26 Mibpenuiǥen si Ahazia te 22 he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te senge-tuig. Is iney zin iyan si Atalia he apù ni Hadì Omri he hadì te Israel. 27 Mid-iring sikandin te ulaula te pemilya ni Ahab. Mezaat is ulaula zin diyà te etuvangan te Nengazen iring te vaal te pemilya ni Ahab, su mibpengesawa sikandin te sevaha he sakup te pemilya ni Ahab.

28 Mibpezumahà si Ahazia wey si Joram he anak ni Ahab te kebpekidtebek ki Hadì Hazael he hadì te Aram. Mibpetebekè dan diyà te Ramot Gilead, ne nepelian si Joram. 29 Umbe, mid-ulì si hadì Joram diyà te inged he Jezreel su para meulii is palì din. Ne te zutun sikandin te inged, midlauy sikandin te Hadì Ahazia he hadì te Juda.