1 Nehimu he hadì diyà te Juda si Ahaz he anak ni Jotam hein ike-17 he tuig te kedhadì ni Peka, he anak ni Remalia, diyà te Israel. 2 Mibpenuiǥen si Ahaz te 20 hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 16 he tuig. Mezaat is ulaula zin diyà te etuvangan te Nengazen he Megbevayè din, kenà iring te mibeelan te kepuun din he si David. 3 Mid-iringan din is ulaula te menge hadì te Israel, minsan ganì is anak din impemuhat din pinaaǥi te kedtutunga zin duen. Mid-iringan din is utew mezaat he menge vaal te menge etew ziyà te menge nasyun he impesegseg te Nengazen te menge Israilihanen. 4 Nemuhat sikandin te menge pemuhat wey midtutung te menge veyewà diyà te menge simbahan diyà te metikang he menge lugar, diyà te puntur te menge vuvungan wey ziyà te sihung te kada merapung he kayu.

5 Dutun te kedhadì ni Ahaz diyà te Juda, midsurung diyà te Jerusalem si Hadì Rezin he hadì te Aram wey si Hadì Peka he hadì te Israel, he anak ni Remalia, ne midliǥuyan dan is Jerusalem. Piru wazè dan mezaag si Ahaz. 6 Dutun he timpu, nahawì ni Hadì Rezin he hadì te Aram is Elat pinaaǥi te kedsegseǥa zin te menge etew ziyà te Juda. Ne midhalin med-ubpà diyà te Elat is duma he menge Aramihanen ne zutun pa sikandan taman en guntaan.

7 Midsuǥù si Ahaz te menge menunudtulà te kedtudtul ziyà te ki Hadì Tiglat Piliser he hadì te Asiria kayi he menge lalag: “Libriya a kenikew is suluǥuen nu su para kenà a mezezeeti te hadì te Aram wey hadì te Israel he midsurung kedì.” 8 Migkuwa ni Ahaz is pelata wey vulawan diyà te valey te Nengazen wey is diyà te budiga ziyà te turuǥan, ne impeuwit din diyà te hadì te Asiria su inggasa zin. 9 Mibpezumazuma haazà is hadì te Asiria te hangyù ni Ahaz, umbe midsurung din is Damascus ne mid-aǥew zin heini. Miduma zin is menge meǥinged dutun diyà te Kir su mibihag din, ne midhimetayan din si Rezin.

10 Ne midhendiyà si Hadì Ahaz te Damascus su ebpekidhinguma ki Hadì Tiglat Piliser he hadì te Asiria. Ne hein diyè en sikandin duen neehè din he pemuhatà. Umbe mibpeuwitan din is memumuhat he si Uria te mudilu zutun te pemuhatà ragkes en is menge paaǥi te kebeeli zuen. 11 Ne mibaal si Uria te pemuhatà he iring duen te mudilu he impeuwit ni Ahaz, ne nepasad din haazà is pemuhatà hein wazè pa mekelikù si Ahaz. 12-13 Ne hein nekeuma si Hadì Ahaz is ebpuun diyà te Damascus, neehè din haazà is pemuhatà. Mid-uvey sikandin dutun te pemuhatà ne nemuhat te pemuhat he edtutungen wey pemuhat he para gasa. Ne mid-itisan din te pemuhat he inumen haazà is pemuhatà wey mibpirikan din te lengesa zuen te ayam he impemuhat din he pemuhat para te meupiya he kedepità. 14 Ne impaawè din is daan he pemuhatà he brunsi he ziyà te etuvangan te Nengazen he nekepelastar ziyà te pid-elangan te veǥu he pemuhatà wey te valey te Nengazen, ne impesavuk din diyà te egkezizaya kayi te veǥu he pemuhatà. 15 Ne mibmenduan din si Uria he memumuhat te, “Gemita nu heini is beǥu he pemuhatà emun ebpemuhat ka te menge pemuhat he edtutungen kada meselem wey te menge pemuhat he para gasa kada mezukilem. Gemita nu zaan heini emun ebpemuhat ka te menge pemuhat he edtutungen wey menge pemuhat he para gasa he pemuhat te hadì wey te menge etew, ragkes en is pemuhat he inumen kada mezukilem. Ipirik nu kayi te veǥu he pemuhatà is lengesa te pemuhat he edtutungen wey zuma pa he klasi te menge pemuhat. Ne heeyan is brunsi he pemuhatà edhimuwen ku he kedì he empuey.” 16 Ne mibeelan ni Uria he memumuhat is insuǥù kandin ni Hadì Ahaz.

17 Ne migkuwa ni Hadì Ahaz is menge elavat wey is menge visin duen te untuzà he para te kedhakut te wahig diyà te valey te Nengazen. Migkuwa zin daan sikan is dekelà he teleǥuey te wahig he egngezanan te Daǥat he ziyà te peka te menge tudu he vaka he brunsi, ne insavuk din heini ziyà te selevukà he vatu. 18 Ne para melipey sikan is hadì te Asiria, migkuwa ni Ahaz diyà te turuǥan is iring te atep he egemiten emun Andew te Kedhimeley wey midlekevan din is beyeey te menge hadì te Juda emun edseled dan diyà te valey te Nengazen.

19 Is duma pa he ǥuǥud mehitenged te kedhadì ni Ahaz, wey is menge mibeelan din, ne ingkesurat diyà te Libru he Midsuratan te menge Keguǥuza te menge Hadì te Juda. 20 Hein minatey en si Ahaz, inleveng sikandin diyà te midlevengan te menge kepuun din diyà te Inged ni David. Ne si Hezekia he anak din iyan nekeilis kandin te kedhadì.