1 Migkaǥi si Amos te, “Neehè ku is Nengazen he midhitindeg diyà te pemuhatà he ke sikandin te, ‘Pukpuka nu is in-ulu keniyan te menge tukud te valey ku su wey merundus is atep din ne wey merundusi is menge etew. Ne is kenà ebpatey kandan ne edhimetayan ku pinaaǥi te tebek. Wazà minsan sevaha kandan he ebpekelikey etawa ebpekepelaǥuy. 2 Minsan med-eles pa sikandan diyà te zizalem te tanà, he ziyà te lugar te menge minatey, egkuwaan ku sikandan dutun. Minsan mebpemenahik pa sikandan diyà te langit, eguyuzen ku sikandan pehendiyà te zizalem. 3 Minsan med-eles pa sikandan diyà te puntur te Buntud he Carmel, ebpen-ahaan ku sikandan dutun ne edekepen ku. Minsan med-eles pa sikandan diyà te zizalem te zaǥat, ne ibpehendutun ku is uled te kegkaǥat kandan. 4 Minsan bihaǥa pa sikandan te menge kuntada zan, ebpenhimetayan ku ǥihapun sikandan. Su utew a disididu te kedezaat kandan ne kenà kedtavang kandan.’ ”

5 Emun egkeviten te Nengazen he MEGBEVAYÀ he Mekeǥeǥehem is tanà, egkehuyung heini ne is langun he menge meǥinged kayi ne ebpemekesineǥew. Is kegkehuyung kayi iring te kedlapey wey kegkemezahi te Wahig he Nilo ziyà te Ehipto.

7 Migkaǥi is Nengazen te, “Is ked-ahaa ku keniyu te menge tig-Israel ne iring dà te menge tig-Etiopia. Tutuu iyan he impeǥawas ku sikiyu ziyà te Ehipto, piru impeǥawas ku zaan is menge Filistihanen diyà te Caftor ne is menge Aramihanen impeǥawas ku ziyà te Kir. 8 Siak, is Nengazen he MEGBEVAYÀ, edtengteng a keniyu te mezaat he ginhedian. Ne edezeetan ku sikiyu taman te egkahanew kew kayi te kelibutan. Piru zuen egkesamà keniyu te menge kevuwazan ni Jacob. Iyan a, is Nengazen, is migkaǥi kayi. 9 Benar iyan, emun iyan a ebmandù, ne ed-eyaǥen ku sikiyu is menge etew te Israel duma te menge etew ziyà te langun he menge nasyun, iring te ked-ayag te trigu. Iring te kenà edlahus diyà te eyagan is nekesahug he menge vatu, ne kenà daan ebpekeliyu te silut is menge lalung keniyu, kekenà, 10 ebpatey te tebek sikandan is langun. Iyan heini sikandan kes egkaǥi he wazè kun mezaat he egkehitavù kandan.”

11 “Egkeuma is andew he ed-umanan ku ebenguna is ginhedian ni David he iring te lawig he nerundus. Su ebpurungan ku heini is nezeetan, ne ibpeuman ku ibpehitindeg iring duen te nehuna. 12 Edhimuwen ku heini su wey mesakup te menge Israilihanen is nesamà he tanà te Edom wey is duma pa he menge nasyun he nesakup dan dengan he mid-isip ku he kediey. Iyan a, is Nengazen, is migkaǥi kayi, ne ebeelan ku heini.”

13 Migkaǥi pa is Nengazen bahin te menge tig-Israel, “Egkeuma is timpu he utew sikandan ed-uzara, ne kenè pa egkepasad is kedreǥuna te menge abut dan ne egkeume en is timpu te ked-eradu. Ne is kegkeres dan te paras ne kenè pa egkepasad ne egkeume en is timpu te ked-uman kebpemula te paras. Emun ed-ahaan ta is utew mahabet he menge paras diyà te menge vuntud ne henduen be heini te edtudà he veǥu he vinu. 14 Ibpeulì ku is menge etew ku he menge tig-Israel ziyà te tanè dan puun te kegkevihaǥa kandan. Ed-umanan dan ebenguna is nevengkag he menge inged dan ne zutun sikandan ed-ubpà. Ebpemula zan te menge paras ne ed-inum dan te vinu kayi. Ebpemula zan diyà te menge pemuleey zan ne egkaan dan te menge veǥas kayi. 15 Ibpeuman ku sikandan ibpeubpà diyà te tanè dan, ne kenè dan en ibpeuman ibpaawà dutun te tanà he imbeǥey ku kandan.” Iyan heini migkaǥi te Nengazen he Megbevayè niw.