1 Dutun te ikezuwa he tuig te kedhadì ni Nebucadnezar, kepipira sikandin meketeǥeinep. Nekepeliveg kandin haazà is menge teǥeinep din, umbe kenà sikandin ebpekelipezeng. 2 Impetawag din is menge sakup din he menge selemengkiru, menge keteuwanen, menge veyilan, menge menenagnà, su wey zan ikeseysey is kehuluǥan duen te teǥeinep din. 3 Ne te kebpekeuma zan migkaǥi haazà is hadì diyà te kandan te, “Neketeǥeinep a ne utew nekepeliveg kedì heini, umbe impetawag ku sikiyu su egkesuat a he metueni ku ke hengkey is kehuluǥan kayi he teǥeinep.”

4 Ne midtavak duen te menge menenagnà haazà is hadì te kineǥiyan he Aramico te, “Mebmeluǥayad is untung nu, Mahal he Hadì! Tudtula nu ziyà te kenami te menge suluǥuen nu is teǥeinep nu, ne idseysey zey ziyà te kenikew is kehuluǥan din.”

5 Piru egkesuatan dutun te hadì he egezaman din sikandan, umbe ke sikandin te, “Nekedisisyun a he emun kenè niw egketagna sikan is teǥeinep ku wey is kehuluǥan din, ibpepemisang ku is menge lawa niw wey ibperundus ku is menge valey niw. 6 Piru emun egketagnè niw sikan is teǥeinep ku wey igkeseysey niw is kehuluǥan kayi, ebeǥayan ku sikiyu te meupiya he menge gasa wey zengeg. Na, tegnaa niw en wey iseysey is kehuluǥan din.”

7 Mid-uman sikandan medtavak te, “Mahal he Hadì, keǥiya nu kenami is teǥeinep nu ne idseysey zey ziyà te kenikew is kehuluǥan din.”

8 Migkaǥi haazà is hadì te, “Netuenan ku he edlanganlangan kew su netuenan niw he siguradu edtumanen ku is migkaǥi ku keniyu, 9 he emun kenè niw egketagnà wey egkeseysey sikan is teǥeinep ku, ne idsilut ku ziyà te keniyu sikan is nekaǥi ku. Neuyun kew he edterteruan a keniyu su edtinguhè kew he mahalin is isip ku. Keǥiya niw en ke hengkey is teǥeinep ku su wey a meketuu he egketuenan niw te edseysey is kehuluǥan kayi.”

10 Midtavak dan haazà is hadì te, “Wazà etew kayi te tivuuk he kelibutan he ebpekehimu keniyan te mibuyù nu. Wey wazà daan hadì, minsan utew pa sikandin mekeǥeǥehem, he nekesuǥù te menge selemengkiru, menge veyilan, etawa menge menenagnà te kebaal te iring keniyan. 11 Utew mereǥen is ebpeveelan nu kenami, Mahal he Hadì. Menge ed-ezapen dà is ebpekehimu keniyan, piru wazè man sikandan med-amur te menge etew.”

12 Tenged dutun te tavak dan, utew nepauk sikan is hadì. Ne mibmandar sikandin he penhimetayi is langun he uluwanen he menge etew ziyà te Babilonia. 13 Hein kedsuǥua zutun te midsuǥù he ebpenhimetayan is menge uluwanen, duen nen-ahà ki Daniel wey zuen te menge zuma zin su wey mehimetayi zaan sikandan.

14-15 Ne zutun, mid-uvey si Daniel ziyà te ki Arioc he kepitan te menge vantey zuen te hadì. Heini si Arioc iyan midsuǥù duen te hadì te kebpenhimatey te menge uluwanen he menge etew ziyà te Babilonia. Ne mevinentayen si Daniel he mid-insà diyà te kandin ke hengkey is hinungdan kayi te utew meveǥat he suǥù te hadì. Umbe midtudtul ni Arioc diyà te kandin is nehitavù.

16 Ne kegkezineg dutun ni Daniel, midhendiyà sikandin te hadì ne midhangyù he veǥayi sikandin te timpu para ikeseysey zin is kehuluǥan duen te teǥeinep te hadì. 17 Ne mibpezumazuma haazà is hadì, umbe mid-ulì si Daniel ne midtudtulan din sikan is menge zuma zin he si Hanania, si Mishael, wey si Azaria vahin te neulaula. 18 Migkeǥiyan sikandan ni Daniel he mebpengemuyù dan su para mehizuwi sikandan te Megbevayà diyà te langit ne metueni zan is kehuluǥan duen te teǥeinep te hadì, su para kenà sikandan mehimetayi duma te zuma he uluwanen he menge etew ziyà te Babilonia.

19 Dutun he kezukileman impezayag te Megbevayà diyà te ki Daniel sikan is teǥeinep duen te hadì wey is kehuluǥan din pinaaǥi te kebpekelawas. Ne midalig ni Daniel is Megbevayà diyà te langit. 20 Ke sikandin te,

24 Ne zutun midlikù si Daniel ziyà te ki Arioc he iyan kes midseriǥan duen te hadì te kebpenhimatey te uluwanen he menge etew ziyà te Babilonia. Migkaǥi si Daniel ziyà te kandin te, “Kenè nu zep-a penhimetayi is uluwanen he menge etew, kekenà, dumahi a zep-a kenikew ziyà te hadì su idseysey ku ziyà te kandin is kehuluǥan duen te teǥeinep din.”

25 Umbe, migègaanan dumaha ni Arioc si Daniel ziyà te hadì. Migkaǥi si Arioc te, “Mahal he Hadì, duen neehè ku he vinihag puun te Juda he ebpekeseysey ke hengkey is kehuluǥan duen te teǥeinep nu.” 26 Mid-insaan dutun te hadì si Daniel he migngezanan daan te Belteshazar, “Egkekaǥi nu ve kediey ke hengkey is teǥeinep ku wey igkeseysey nu ve is kehuluǥan din?” 27 Midtavak si Daniel te, “Mahal he Hadì, wazà minsan hentei he uluwanen, menge veyilan, selemengkiru, etawa metau he ebpeǥingkuris he ebpekeseysey te teǥeinep nu. 28 Piru zuen Megbevayà diyà te langit he ebpezayag te menge nekeeles he ketutuanan. Mahal he Hadì, pinaaǥi te teǥeinep nu, ibpetuenan te Megbevayà kenikew ke hengkey is huziyan he egkehitavù. Guntaan, idseysey ku kenikew is nelewasan nu pinaaǥi te teǥeinep nu.

29 “Mahal he Hadì, sikan is teǥeinep nu, mehitenged heini te huziyan he egkehitavù, ne ibpetuenan heeyan kenikew te Megbevayà he ebpezayag te menge nekeeles he ketutuanan. 30 Ne sikan is teǥeinep, impezayag te Megbevayà kayi te kedì, kenà tenged te edhuna a he metau te zuma he menge etew, kekenà, para mesavut nu ke hengkey is kehuluǥan te neseled diyà te isip nu pinaaǥi te kedseysey ku.

31 “Is teǥeinep nu ne iyan heini: Duen dekelà he ledawan he neehè nu he nekehitindeg diyà te etuvangan nu. Utew heini ed-ilak-ilak wey mekahandekhandek heini he ed-ahaan. 32 Is ulu kayi, ne pudu vulawan ne pelata is kumeng din wey menge velad din, ne puun te getek pehendiyà te menge vuvun din ne brunsi. 33 Ne putew is menge lisen din, ne is menge paa zin putew wey brik. 34 Ne zutun te kedtengtengi nu zuen te ledawan, duen sevaha he vatu he midtipak, piru kenà etew is midtipak duen. Ne nekezakdak heini he vatu zuen te putew wey brik he menge paa zuen te ledawan, ne nevekvek haazà is menge paa zin. 35 Ne nelaus en mevekbek haazà is tivuuk he ledawan he putew, brik, brunsi, pelata, wey vulawan. Ne neiring heini te ukap te ginunas he ibpenlayap te keramag diyà te minsan hendei. Piru haazà is batu he nekevekbek duen te paa te ledawan, midekelà ne nehimu he vuntud he nekeeneb te tivuuk he kelibutan.

36 “Ne iyan heeyan sikan is teǥeinep nu, ne iyan heini kehuluǥan din: 37 Mahal he Hadì, iyan ka hadì te menge hadì. Iyan midhimu kenikew he hadì is Megbevayà diyà te langit, ne mibeǥayan ke zin te ǥehem, desen, wey zengeg. 38 Mibpeveyveyaan din kenikew is menge etew, menge langgam, menge tagbis, diyà te minsan hendei. Ne iyan ka impetug-iring duen te vulawan he ulu zuen te ledawan.

39 “Is ebpekesunud te kenikew he ginhedian ne meluya te kenikew he ginhedian. Is iketelu he ginhedian ne iyan is impetug-iring te brunsi he kevahin dutun te ledawan, ne egkezizalem te ǥehem kayi he ginhedian is tivuuk he kelibutan. 40 Is ebpeketinundug, iyan is ikeepat he ginhedian he iring te putew. Is putew ebpekevekvek te langun, ne heini he ginhedian, ebpekevekvek te zuma he menge ginhedian. 41 Ne ǥeina te is menge paa zutun te ledawan putew wey brik, ne heini he ginhedian egkevahin. Piru ebpedayun is kelig-en kayi, su neehè nu man he nesahug te putew is menge paa zutun te ledawan. 42 Is putew wey brik he menge tezù te paa, ebpesavut he zuen bahin dutun te ginhedian he melig-en, ne zuen daan bahin he melemu egkezeeti. 43 Is kebpekedsahug duen te putew wey brik, ebpesavut he edsevaha is menge pengulu kayi he ginhedian pinaaǥi te kebpees-eseweey. Piru kenà egkeuǥet is kegkesevaha zan, su iring heini iyan te putew wey brik he kenà egkehimu he ibpedsahug.

44 “Dutun te timpu te kedhadì kayi te menge pengulu, edtukud is Megbevayà diyà te langit te sevaha he ginhedian he kenà egkezeetan te minsan keenu. Ne kenà heini egkezaag te zuma he ginhedian, su edèdeetan din pa ganì is langun he ginhedian ne ebpedayun heini he ginhedian taman te taman. 45 Iring duen te neehè nu he vatu he midtipak puun te vuntud (piru kenà etew is midtipak duen) he nekevekbek duen te ledawan he putew, brunsi, brik, pelata, wey vulawan.

“Mahal he Hadì, mibpezayag is mekeǥeǥehem he Megbevayà diyà te kenikew ke hengkey is huziyan he egkehitavù. Ne iyan heeyan kes teǥeinep nu wey kehuluǥan din. Ne tutuu heini is langun he migkaǥi ku.”

46 Ne segugunà midluhud si Hadì Nebucadnezar te kebeǥey te zengeg ki Daniel. Ne kegkepasad dutun ne mibmandar sikandin te kebpemuhat wey kedtutung te veyewà diyà te etuvangan ni Daniel. 47 Migkaǥi sikandin diyà te ki Daniel te, “Tenged te kedtudtula nu zuen te teǥeinep ku wey kedseysaya nu te kehuluǥan din, ne tutuu iyan he is Megbevayà he ed-ezapen nu ne lavew he mekeǥeǥehem te langun he ebpen-ezapen te menge etew. Iyan sikandin ereg he egkilelaan he Egalen te menge hadì. Ne iyan dà sikandin ebpekepezayag te nekeeles he menge ketutuanan.”

48 Ne zutun mibeǥayan duen te hadì si Daniel te mahabet wey mekempet he menge gasa. Wey mibeǥayan din daan sikandin te metikang he ketengdanan su iyan din impezumala te tivuuk he prubinsya te Babilonia wey impepenguluwan kandin is langun he uluwanen he etew zutun. 49 Midhangyù ni Daniel zuen te hadì he himuwa zin si Shadrac, si Meshac, wey si Abednego he menge timbang din te kedumala te prubinsya he Babilonia. Ne midtuǥut haazà is hadì. Ne si Daniel wazà mulà med-awà diyà te turuǥan te hadì.