1-6 Kedlavey te mahabet he menge tuig, dutun te iyan hadì diyà te Persia si Artaserkses, nekeuma si Ezra ziyà te Jerusalem is ebpuun diyà te Babilonia. Heini si Ezra anak ni Seraya. Si Seraya anak ni Azaria. Si Azaria anak ni Hilkia. Si Hilkia anak ni Shalum. Si Shalum anak ni Zadok. Si Zadok anak ni Ahitub. Si Ahitub anak ni Amaria. Si Amaria anak ni Azaria. Si Azaria anak ni Merayot. Si Merayot anak ni Zerahia. Si Zerahia anak ni Uzi. Si Uzi anak ni Buki. Si Buki anak ni Abishua. Si Abishua anak ni Finehas. Si Finehas anak ni Eleazar. Si Eleazar anak ni Aaron te lavew he memumuhat.

Si Ezra sevaha he menunudlù he nepurungan din metueni is Kesuǥuan ni Moises he imbeǥey te Nengazen he Megbevayà te Israel. Imbeǥey te hadì is langun he mibuyù ni Ezra su ǥeina te edtevangan sikandin te Nengazen he Megbevayè din. 7 Duen daan miduma kandin he menge Israilihanen dutun te ked-ulì din diyà te Jerusalem dutun te ikepitu he tuig te kedhadì ni Artaserkses. Ragkes te miduma kandin is menge memumuhat, menge Levihanen, menge perekanta, menge vantey te menge ǥemawan te valey te Nengazen, wey is menge suluǥuen dutun te valey te Nengazen. 8-9 Mibpuun si Ezra ziyà te Babilonia hein nehuna he andew te nehuna he vulan. Ne tenged te tavang te Megbevayà kandin, nekeuma sikandin diyà te Jerusalem te nehuna he andew te ikelima he vulan dutun te ikepitu he tuig te kedhadì ni Artaserkses. 10 Midtevangan sikandin te Megbevayà su ǥeina te impehinungud din is keugelingen din pinaaǥi te ked-istudyu wey kedtuman te Kesuǥuan te Nengazen, wey kebpenurù te menge sulunuzen wey menge suǥù din diyà te menge Israilihanen.

11 Iyan heini surat he imbeǥey ni Hadì Artaserkses diyà te ki Ezra he memumuhat wey menunudlù he nepurung metau te menge suǥù wey menge sulunuzen he imbeǥey te Nengazen he Megbevayà te Israel:

12 “Iyan a si Hadì Artaserkses he hadì te menge hadì. Ebpengemusta a kenikew Ezra, he memumuhat wey menunudlù te Kesuǥuan te Megbevayà diyà te langit.

13 “Midsuǥù a he minsan hentei te menge Israilihanen kayi te ginhedian ku, ragkes en is menge memumuhat wey menge Levihanen, he egkesuat he eduma kenikew te ked-ulì diyà te Jerusalem egkehimu he eduma kenikew. 14 Siak wey is pitu he menge sumesambag ku, edsuǥuen dey sikew he susiya nu is nengehitavù diyà te Juda wey Jerusalem ke edsunuzen be te menge etew kayi is Kesuǥuan te Megbevayè nu, he nepurungan nu metueni. 15 Edsuǥuen ku zaan sikew he uwita nu is menge vulawan wey menge pelata he keugelingen he suat is kebeǥaya ku zuen wey te menge sumesambag ku ziyà te Megbevayà te Israel he ed-ubpà diyà te Jerusalem. 16 Uwita nu zaan is langun he pelata wey vulawan he egkezawat nu puun te prubinsya he Babilonia, ragkes is ebpuun te keugelingen he suat he tavang te menge etew te Israel wey te menge memumuhat dan he para te valey te Megbevayè dan diyà te Jerusalem. 17 Sigureduwa nu he heini he selapì egkeǥamit te kebpemasa te tudu he menge vaka, meǥurang wey nati he meemahan he menge kerehidu, menge trigu, wey vinu, he ibpemuhat diyà te pemuhatà diyà te valey te Megbevayè niw ziyà te Jerusalem. 18 Is egkesamà he vulawan wey pelata ne egkehimu he egemiten niw te menge zuma nu ziyà te minsan hengkey he egkeǥemitan duen he sungkad te egkesuatan te Megbevayè niw. 19 Piru is menge gelemiten he insarig kenikew he egemiten te kebaal te menge vuluhaten diyà te valey te Megbevayè nu ne pudu nu iveǥey ziyà te Megbevayà te Jerusalem. 20 Emun duen pa zuma he egkinehenglanen nu he para te valey te Megbevayà, ne kuwa ke zà te ekgeǥastu nu ziyà te selapì te ginhedian.

21 “Iyan a, si Hadì Artaserkses, mibmenduan ku sikiyu is langun he menge trisuriru ziyà te prubinsya he ziyan layun te Eufrates he iveǥey niw is minsan hengkey he ebuyuen ni Ezra he memumuhat wey menunudlù te Kesuǥuan te Megbevayà diyà te langit. 22 Beǥayi niw sikandin taman te 3,500 he kilu te pelata, 300 he saku he trigu, 550 he gelun he vinu, 550 he gelun te lana he ulibu, wey minsan sengemenu kezekelà te timus he egkinehenglanen. 23 Iveǥey niw is langun he kinehenglanen diyà te valey te Megbevayà sumalà te inmandù te Megbevayà diyà te langit. Su emun kenà, ne egkepeukan din is ginhedian ku wey is menge anak ku. 24 Ibpehibelu zey zaan diyà te keniyu he kenè niw ipevayad te vuhis wey zuma pa he menge veleyazan is menge memumuhat, menge Levihanen, menge musikiru, menge vantey te menge ǥemawan te valey te Nengazen, menge suluǥuen diyà te valey te Nengazen, wey is duma pa he ebpemenerebahu zutun te valey te Nengazen.

25 “Ne sikew Ezra, sumalà te ketau he imbeǥey kenikew te Megbevayà, ne pilì ka te menge meghuhukum wey menge upisyal he edumala te langun he etew keniyan te prubinsya he ziyan layun te Eufrates. Kinahanglan he netuenan dan is Kesuǥuan te Megbevayè nu. Ne penurua nu is menge etew he wazà metau zutun te Kesuǥuan. 26 Is minsan hentei he kenà edtuman te Kesuǥuan te Megbevayè nu etawa kesuǥuan te hadì, edsilutan te kemetayen, etawa edsegseǥen puun te lugar zin, etawa egkuwaan is menge azen din, etawa ebpirisuwen.”

27 Migkaǥi si Ezra te: Ereg he edeliǥen is Nengazen, he Megbevayà te menge kepuun tew, he midwaleng din is gehinawa te hadì su wey zin meveǥayi te zengeg is baley te Nengazen diyà te Jerusalem. 28 Tenged te kebpurungi kediey te Nengazen, mibpurungan a te hadì wey te menge sumesambag din, ragkes en is langun he mekeǥeǥehem he menge upisyal zin. Ne ǥeina te edtevangan a te Nengazen he Megbevayè ku, neteǥuan a te kevurut te kedtiǥum te menge pengulu te Israel wey zan mekezuma kedì diyà te Jerusalem.