1 Ne hein 99 en is penuiǥen ni Abram, mibpaahà kandin is Nengazen ne migkaǥi kandin te, “Siak, iyan a Megbevayà he Mekeǥeǥehem. Sunuza nu is menge penurù ku ne kinahanglan he wazà igkesewayi kenikew. 2 Edtukuzen ku is kebpekid-uyun ku kenikew: ne edhimuwen ku he utew medmezakel is menge kevuwazan nu.” 3 Ne zutun midlangkeb si Abram diyà te tanà ne migkaǥi en maan kandin is Megbevayà te, 4 “Iyan kebpekid-uyun ku kenikew is: Egkehimu ka he amey te langun he menge nasyun. 5 Kenè ke en egngezanan ki Abram, kekenà, egngezanan ku en sikew ki Abraham, su edhimuwen ku sikew he kepuun te medmezakel he menge nasyun. 6 Edhimuwen ku he mepurung mevuwad is menge kevuwazan nu, ne egkehimu sikandan he zekelà he nasyun, ne is duma kandan ne egkehimu he menge hadì. 7 Edtumanen ku is kebpekid-uyun ku kenikew wey te menge kevuwazan nu te peleebuten he lapis te kevuwazan, ne pedayun a he Megbevayè niw. Heini he kebpekid-uyun ku ne taman te taman. 8 Ne is tivuuk kayi he tanà te Canaan he mid-ubpaan nu ǥuntaan te lumelengyawà, ibeǥey ku heini kenikew wey ziyà te menge kevuwazan nu. Egkeangken niw heini te taman te taman, ne pedayun he iyan a Megbevayè niw.”

9 Ne migkaǥi en maan is Megbevayà diyà te ki Abraham te, “Kenè nu lipati is kebpekid-uyun ku kenikew. Iyan daan heini meupiya he ed-ul-ulahan te menge kevuwazan nu te peleebuten he lapis te kevuwazan nu. 10 Ne mehitenged keniyan he kebpekid-uyun, kinahanglan he ebpesirkunsidar is langun he menge maama ziyan te keniyu. 11 Kinahanglan he edsirkunsidaren is langun he menge maama, ne iyan haazà tuus te kebpekid-uyun ku keniyu. 12-13 Puun guntaan taman te peleebuten he lapis te kevuwazan, kinahanglan he sirkunsidara niw is menge vatà he menge maama zutun te ikewalu he andew puun te ked-enaka kandin. Sirkunsidara niw zaan is menge uripen niw he maama he neetew ziyà te valey niw ragkes is nengepemasa niw he ziyà ebpuun te zuma he menge inged. Heeyan he tuus te lawa niw, iyan tistiǥus he tutuu is kebpekid-uyun ku keniyu, ne kenà heini egkahanew taman te taman. 14 Ne ke zuen minsan hentei he maama he zuma niw he kenà ebpesirkunsidar, kenè niw en isipa he zuma niw sikandin, su wazè din ilelenged is kebpekid-uyun ku.”

15 Ne elin daan migkaǥi te Megbevayà diyà te ki Abraham is: “Ne haazà is esawa nu he si Sarai, kenè nu en ngezani ki Sarai, kekenà, iyan nu en ingazan kandin si Sara, he ke và dà egkeǥiya, ‘Bai’. 16 Edtuvazan ku sikandin ne ebmeǥingey ne pinaaǥi kandin ibeǥey ku kenikew is anak he maama. Egkehimu sikandin he kepuun te mezakel he menge nasyun, ne is duma he menge kevuwazan din ne egkehimu he hadì.”

17 Ne zutun midlangkeb en maan si Abraham diyà te tanà, ne mid-engit su ke sikandin diyà te ǥehinawa zin te, “Egkehimu ves he egkevuwad a, is maama he 100 en is penuiǥen din? Ne egkehimu ves daan he ed-anak si Sara is 90 en is penuiǥen din?” 18 Ne ke sikandin diyà te Megbevayà te, “Emun iyan heeyan egkehitavù, edhengyuen ku he ikeǥaǥew nu zaan is anak ku he si Ishmael.” 19 Ne midtavak is Megbevayà te, “Iyan heini tutuu: Si Sara is esawa nu, ed-anak te maama, ne iyan ingazan nu kandin si Isaac, he ke và dà egkeǥiya, ‘Ked-engit’. Ibpelaus ku ziyà te kandin wey ziyà te menge kevuwazan din te wazà pidtemanan sikan is kebpekid-uyun ku kenikew taman te taman. 20 Ne si Ishmael zaan, ebpemineǥen ku is hangyù nu mehitenged kandin. Edtuvazan ku zaan sikandin ne edhimuwen ku he mezakel is menge kevuwazan din. Egkehimu sikandin he amey te 12 he menge pengulu, ne is menge kevuwazan din egkehimu he utew egkevantug he menge etew. 21 Piru haazà is kebpekid-uyun ku kenikew, ibpelaus ku zaan diyà te anak nu he si Isaac he id-anak ni Sara seled te senge tuig pa ǥuntaan.” 22 Ne hein nekeipus he edlalag is Megbevayà diyà te ki Abraham, nahanew sikandin dutun te ked-ahà ni Abraham.

23 Ne zutun dà he andew, midtuman ni Abraham is insuǥù kandin te Megbevayà. Midsirkunsidar zin is anak din he si Ishmael wey is langun he maama he ziyà te valey zin: is menge uripen he ziyà ianak te valey zin wey is menge uripen he mibpemasa zin. 24 Ne 99 he tuig is penuiǥen ni Abraham dutun te andew he mibpesirkunsidar sikandin. 25 Ne 13 he tuig is penuiǥen ni Ishmael zutun te kedsirkunsidara kandin. 26 Dutun he andew nesirkunsidar si Abraham, is anak din he si Ishmael, 27 wey is langun he menge uripen din he maama he ziyà ianak te valey zin, wey menge uripen he maama he mibpemasa zin diyà te menge lumelengyawà.