1 Ne mid-uman mebpengesawa si Abraham te vahi he migngezanan ki Ketura. 2 Is menge anak dan iyan ensi Zimran, Jokshan, Medan, Midian, Ishbak, wey si Shua. 3 Si Jokshan ne iyan anak din si Sheba wey si Dedan. Is menge kevuwazan ni Dedan ne iyan is menge Ashurnen, menge Litushnen, wey Liumnen. 4 Is menge anak ni Midian ne iyan si Efa, si Efer, si Hanoc, si Abida, wey si Eldaa. Iyan heini sikandan menge kevuwazan ni Ketura.

5 Iyan si Isaac ibpepengevilin te langun he menge azen ni Abraham. 6 Piru te wazè pa mebpatey si Abraham, duen daan impemeǥey zin diyà te menge anak din he maama he anak te zuma he menge esawa zin, ne ziyè din sikandan ipeubpà te tanà he zapit te edsilaan, he meziyù te anak din si Isaac.

7 Is keluǥayad te untung ni Abraham 175 he tuig. 8 Utew en meǥurang sikandin dutun te kebpatey zin, ne in-amur sikandin te menge kepuun din he nemematey en. 9 Inleveng sikandin te menge anak din he si Isaac wey si Ishmael ziyà te surung he Macpela, he uvey te Mamre, he vevesukà dengan ni Efron he anak ni Zohar he Hitihanen. 10 Haazà is tanà, ne mibpemasa ni Abraham dutun te menge Hitihanen. Diyà si Abraham ileveng wey is esawa zin he si Sara. 11 Ne hein minatey en si Abraham, midtuvazan te Megbevayà is anak din he si Isaac, ne ziyà si Isaac med-ubpà te Beer Lahai Roi.

12 Iyan heini guǥud mehitenged te pemilya ni Ishmael he anak ni Abraham diyà te ki Hagar he Ehiptohanen, he uripen ni Sara.

13 Iyan heini menge ngazan te menge anak ni Ishmael he maama, puun te kinikekayan: si Nebayot, Kedar, Adbeel, Mibsam, 14 Mishma, Duma, Masa, 15 Hadad, Tema, Jetur, Nafish, wey Kedema. 16 Iyan heini sikandan menge anak ni Ishmael, ne nehimu sikandan he pengulu te 12 he tribu he kevuwazan ni Ishmael. Ne is menge ngazan dan, ne iyan daan inngazan te menge inged he mid-ubpaan dan.

17 Is keluǥayad te untung ni Ishmael 137 he tuig. Minatey sikandin ne in-amur sikandin te menge kepuun din he nemematey en. 18 Diyà med-ubpà is menge kevuwazan din te menge inged he ebpuun te Havila pehendiyà te Shur, he zapit te edsilaan te Ehipto pehendiyà te Asiria. Ne migkuntada zan is langun he menge kezuzumahi zan he kevuwazan ni Ishmael.

19 Iyan heini guǥud mehitenged te pemilya ni Isaac he anak ni Abraham.

20 Menge 40 en is penuiǥen ni Isaac dutun te kebpekeesawa zin ki Rebeka he anak ni Betuel he Aramihanen he tig-Padan Aram. Etevey si Rebeka ni Laban he Aramihanen daan. 21 Tenged te kenà ed-anak si Rebeka, mid-ampù si Isaac diyà te Nengazen he med-anak ded is esawa zin. Midtavak te Nengazen is ked-ampù din, umbe mibmeǥingey zutun si Rebeka. 22 Egkeǥezam din is henduen be te ebpezumuǥà haazà is sereping he menge vatà diyà te ǥetek din. Migkaǥi si Rebeka te, “Emun iyan bes heini egkeulaula kandan te huziyan he timpu, deyzey nasì ke mebpatey ad.” Umbe mid-insà sikandin diyà te Nengazen mehitenged kayi. Migkaǥi is Nengazen diyà te kandin te,

24 Ne hein mid-anak en si Rebeka, sereping iyan haazà is in-anak din. 25 Haazà is kakey, ne meriǥàriǥà wey vulvulen is tivuuk he lawa zin, umbe migngezanan dan ki Esau, he ke và dà egkeǥiya, “Bulvulen.” 26 Ne hein edlepew en haazà is ikezuwa, ne migewezan din is palu te sereping din, umbe migngezanan dan haazà ki Jacob, he ke và dà egkeǥiya, “Egawed diyà te palu.” Mibpenuiǥen en dutun si Isaac te 60 he tuig te ked-enaka ni Rebeka kayi te sereping.

27 Ne hein midekelè en haazà is menge vatà, utew metau si Esau he ebpenuǥes, ne layun sikandin egketalus. Ne si Jacob mulà ne mevented, diyè dà sikandin te menge tulda ed-ubpàubpà su perevantey te uyaǥen. 28 Pelanggà ni Isaac si Esau su egkesuat layun sikandin he egkaan te egkengepenganup ni Esau, piru si Jacob ne iyan mulà pinelanggà ni Rebeka.

29 Ne sevaha he andew, te kemulu en edhilutù si Jacob te menge tilas he meriǥà, ne nekeulì si Esau is nenuǥes ne utew sikandin nevitil. 30 Ne migkeǥiyan din si Jacob te, “Beǥayi e en kun, ipekaan ad keniyan te sinuba nu he meriǥàriǥà su utew ad egkevitil.” (Ne tenged dutun, egngezanan daan si Esau ki Edom, he ke và dà egkeǥiya, “Meriǥà”.)

31 Ne midtavak si Jacob te, “Wey ku sikew ebeǥayi kayi emun ibeǥey nu kedì is ketenged nu te kegkekakey.” 32 Ne midtavak si Esau te, “Uya, su hengkey is pulus te ketenged ku emun ebpatey a te kegkeumes.” 33 Piru midtavak si Jacob te, “Penangdù ka zèpa kedì.” Ne zutun nenangdù si Esau he ibeǥey zin en ki Jacob is ketenged din te kegkekakey.

34 Ne zutun mibeǥayan sikandin ni Jacob te sinevawan he tilas. Nekepasad sikandin he egkaan wey ed-inum, ne zutun migenat sikandin. Ne pinaaǥi zutun mid-engkezan ni Esau is ketenged din, he kegkekakey.