1 Utew en meǥurang si Isaac ne kenè en utew ebpekaahà. Ne mid-umew zin is anak din he kakey he si Esau. Ke sikandin te, “Mama.” Ne midtavak si Esau te, “Hengkey, amà?” 2 Migkaǥi si Isaac te, “Meǥurang e en utew, ne kenè en egkeuǥet ne ebpatey a. 3 Kuwaa nu is panè nu, ne hendiyè ka te unayan ne penuǥesi a ziyà. 4 Ne hilutua nu kedì is utew ku egkesuati he keenen ne uwita nu kayi te kedì su egkeenen ku. Egkepasad dutun ne ebpenubtuvazan ku sikew te kenè e pa ebpatey.”

5 Mibpemineg bes dutun si Rebeka te kemulu edlelaǥi ni Isaac si Esau. Umbe hein migenat en si Esau is ebpenuǥes diyà te unayan dan, 6 migkeǥiyan ni Rebeka is anak din he si Jacob te, “Nezineg ku ǥeina he migkeǥiyan te amey nu is kakey nu he si Esau te, 7 ‘Penuǥesi a ne hilutui a te utew ku egkesuati he linutuan. Su ebpenubtuvazan ku sikew kayi te etuvangan te Nengazen te kenè e pa ebpatey.’ 8 Umbe mama, pemineg ka te idsuǥù ku kenikew: 9 Hendiyè ka te uyaǥen tew ne kuwa ka te zezuwa he nati he kambing he utew melambeg su edhilutuen ku heini te egkesuatan te amey nu te egkaan he linutuan. 10 Ne uwita nu heini ziyà te kandin su wey iyan ke zin mepenubtuvazi te kenè pa sikandin ebpatey.”

11 Ne midtavak si Jacob diyà te iney zin te, “Kenà buwa egkehimu, su vulvulen utew si Esau ne siak kenà mulà. 12 Kela ke ǥewezi a ni amà ne egketuenan din he mid-ilad ku sikandin, ne kenè e zin en ebpenubtuvazan kekenà, nasì e zin dà edrewaki.” 13 Midtavak si Rebeka te, “Mama, kediey en he televaken emun edrewakan ke zin. Beeli nu is ebpeelan ku kenikew. Genat ke en ne kuwai a te menge kambing.”

14 Ne migenat si Jacob is egkuwa te kambing, ne mid-uwit din diyà te iney zin, ne midhilutù haazà ni Rebeka te utew egkesuati ni Isaac te egkaan he linutuan. 15 Ne zutun migkuwa zin is utew meupiya he visti ni Esau ziyà te valey zan, ne inseluub din heini ki Jacob. 16 Midsevukan din te lundis dutun te kambing is beklawan ni Jacob wey lieg din. 17 Ne imbeǥey zin ki Jacob haazà is keenen wey supas he midhilutù din.

18 Mid-uwit haazà ni Jacob diyà te amey zin, ke sikandin te, “Amà!” Midtavak si Isaac te, “Hentei ka he anak ku?” 19 Ne midtavak si Jacob te, “Iyan a si Esau, kes kakey he anak nu. Midtuman ku en is insuǥù nu kedì. Enew ka wey ka mekekaan duen te neutel ku su wey a kenikew mepenubtuvazi.” 20 Ne mid-insà si Isaac te, “Mama, maan is utew ka meǥaan nekeutel?” Midtavak si Jacob te, “Mid-uǥupan a te Nengazen he Megbevayè nu.” 21 Migkaǥi si Isaac te, “Uvey ka, mama, su wey ku sikew meǥewezi wey ku mesusi ke tutuu ve iyan he iyan ka si Esau he anak ku.” 22 Ne mid-uvey zutun si Jacob, ne mibpanamsam sikandin te amey zin he egkaǥi te, “Is laǥeng nu ne laǥeng ni Jacob, piru is menge velad nu ne ki Esau iyan.” 23 Wazà ni Isaac mekilala si Jacob, su is menge velad din bulvulen iring te velad ni Esau.

Umbe te wazè din pa penubtuvazi, 24 mid-insè pa maan si Isaac te, “Tutuu ve iyan he iyan ka si Esau?” Ne ke si Jacob te, “Tutuu iyan su si Esau a.” 25 Migkaǥi zutun si Isaac te, “Na, uwita nu en kayi heeyan is midhilutù nu he netuǥesan nu, ne emun ebpekekaan ad ne epenubtuvazan ku sikew.” Ne zutun imbeǥey ni Jacob haazà is egkeenen wey vinu, ne migkaan sikandin wey mid-inum. 26 Ne migkeǥiyan ni Isaac sikandin te, “Uvey ke kun kayi, mama, ne hezeki a.” 27 Ne mid-uvey si Jacob diyà te kandin ne midhezekan din. Ne hein nahazek ni Isaac is ngazeg te visti zin, ne mibpenubtuvazan din si Jacob he egkaǥi te,

30 Ne hein neipus ni Isaac is kebpenubtuvazi zin ki Jacob, ne migenat si Jacob. Beǥu pa utew zutun mid-awà si Jacob, ne iyan daan kebpekeulì ni Esau te nenuǥes. 31 Midhilutù daan sikandin te metaam he idsezà ne mid-uwit din diyà te amey zin. Ke sikandin diyà te amey zin te, “Amà, enew ka wey ka mekekaan kayi te netuǥesan ku su wey a kenikew mepenubtuvazi.” 32 Mid-insà si Isaac kandin te, “Hentei ka?” Midtavak sikandin te, “Si Esau a, is kakey he anak nu.” 33 Hein nezineg haazà ni Isaac, migkerker sikandin ne nemensag, “Hentei ves haazà is neketuǥes duen te mid-uwit kayi te kedì he keenen? Beǥu e pa nekepasad he egkaan kayi te kebpekeuma nu. Mibpenubtuvazan ku en sikandin ne kenè ku en egkehimu te edhawì.” 34 Hein nezineg haazà ni Esau, nekelelendag is edsineǥew ne migkeǥiyan din is amey zin te, “Amà, penubtuvazi a zaan!” 35 Midtavak si Isaac te, “Mid-ekalan a te hazi nu ne mid-eǥawan ke zin te ibpenuvadtuvad ku pezem kenikew.” 36 Ne migkaǥi si Esau te, “Ikezuwe en heini te kebinuangi zin kedì. Umba ves Jacob is inngazan kandin. Mid-eǥawan e zin te ketenged te kegkekakey ku, ne ǥuntaan migkuwa zin pa is kebpenubtuvad he para kedì.” Ne zutun mid-isaan din is amey zin te, “Ama, wazè nu en be igkepenuvadtuvad kediey?” 37 Ne midtavak si Isaac te, “Midhimu ku en he iyan sikandin egalen nu ne is langun he menge kezuzumahi zin ne midhimu ku en he menge suluǥuen din. Impenuvadtuvad ku en diyà te kandin is idsegkayà he egkekaan wey egkeinum. Umbe wazè en egkehimu ku para kenikew?” 38 Ne mibpehizuhizu pa utew si Esau te amey zin te, “Amà, wazè en be iyan minsan sevaha zà he igkepenuvadtuvad nu? Penubtuvazi a zaan.” Ne zutun midsineǥew en maan sikandin.

39 Midtavak si Isaac te,

41 Ne midumutan ni Esau si Jacob tenged te kebpenubtuvazi ki Jacob te amey zin. Nekekaǥi si Esau ziyà te ǥehinawa zin te, “Kenè en utew egkeuǥet ne ebpatey si amà; emun ebpatey en sikandin, edhimetayan ku si Jacob.” 42 Piru netudtulan si Rebeka te egkeisip ni Esau, umbe mid-umew zin si Jacob ne migkeǥiyan din te, “Is kakey nu he si Esau, iyan ebpekepayùpayù te ǥehinawa zin is egkeisip din he edhimetayan ke zin. 43 Umbe, mama, pemineǥa nu is egkeǥiyen ku: Pelaǥuy ka ziyà te Haran, diyà te meemahan ku he si Laban. 44 Ne ziyè ka ubpà dèpa taman te egkaawà is pauk kenikew te kakey nu, 45 ne egkelipatan din en is mibeelan nu kandin. Ebpeveyaan ku zà sikew ziyan emun egkaaween is rerangit din kenikew. Kenè ku egkesuatan he egkaawè kew is dezuwa kayi te kedì te senga andew zà.”

46 Ne migkeǥiyan dutun ni Rebeka si Isaac te, “Utew ku en igkerasey te ed-isip-isip is tenged kayi te menge esawa ni Esau he menge Hitihanen. Emun iyan ed-esewaan ni Jacob is tig-kayi zed he vahi he Hitihanen, deyzey pa ke ebpatey e en nasì.”