1 Iyan heini guǥud mehitenged te pemilya ni Esau (he egngenazan daan te Edom).

2 Nengesawa si Esau te menge vahi he tig-Canaan. Iyan sikandan si Ada he anak ni Elon te Hitihanen, si Oholibama he anak ni Ana wey apù ni Zibeon te Hivihanen, 3 wey si Basemat he suled ni Nebayot te anak ni Ishmael. 4 Is anak ni Esau ziyà te ki Ada ne iyan si Elifaz. Is anak din diyà te ki Basemat ne iyan si Reuel. 5 Ne is menge anak din diyà te ki Oholibama ne iyan si Jeush, Jalam, wey Kora. Iyan sikandan menge anak ni Esau he neetew ziyà te Canaan.

6 Miduma ni Esau is menge esawa zin, menge anak din, wey is langun he sakup te pemilya zin, wey mid-uwit din is menge azen din wey menge uyaǥen din he nekuwa zin diyà te Canaan, ne midhalin sikandin te sevaha he lugar, he meziyù te mid-ubpaan te suled din he si Jacob. 7 Su kenà sikandan egkehimu he ebpeemurà diyà te sevaha zà he lugar su mahabet is menge azen dan; ne kenà ereg kandan haazà is lugar he mid-ubpaan dan tenged te kahabet te menge uyaǥen dan. 8 Umbe, si Esau (he egngenazan daan ki Edom) diyà med-ubpà te menge vuvungan he Seir.

9 Iyan heini guǥud mehitenged te pemilya ni Esau he iyan kepuun te menge Edomanhen he meǥinged diyà te menge vuvungan he Seir.

10 Is maama he anak ni Esau ziyà te ki Basemat ne iyan si Reuel, ne is anak din he maama ziyà te ki Ada ne iyan si Elifaz.

11 Is menge anak ni Elifaz he menge maama ne iyan ensi Teman, Omar, Zefo, Gatam, wey Kenaz. 12 Ne zuen daan anak din diyà te esawa zin he si Timna he si Amalek. Iyan sikandan menge apù ni Esau ziyà te esawa zin he si Ada.

13 Is menge anak ni Reuel he menge maama ne iyan ensi Nahat, Zera, Shama, wey Miza. Iyan sikandan menge apù ni Esau ziyà te esawa zin he si Basemat.

14 Is maama he menge anak ni Esau ziyà te ki Oholibama ne iyan ensi Jeush, Jalam, wey si Kora (si Oholibama anak ni Ana wey apù ni Zibeon).

15 Iyan heini nehimu he menge pengulu te menge kevuwazan ni Esau: si Teman, si Omar, si Zefo, si Kenaz, 16 si Kora, si Gatam, wey si Amalek. Heini sikandan menge pengulu ziyà te lugar he Edom, menge anak sikandan ni Elifaz wey menge apù ni Ada.

17 Nehimu zaan he menge pengulu te Edom is menge anak ni Reuel he iyan ensi Nahat, Zera, Shama, wey Miza. Menge apù sikandan ni Esau ziyà te esawa zin he si Basemat. 18 Nehimu zaan he menge pengulu is menge anak ni Esau ziyà te ki Oholibama te anak ni Ana. Iyan sikandan si Jeush, si Jalam, wey si Kora.

19 Pudu sikandan menge kevuwazan ni Esau he menge pengulu ziyà te Edom.

20 Iyan heini menge maama he kevuwazan ni Seir he Hurhanen he meǥinged diyà te Edom: Si Lotan, Shobal, Zibeon, Ana, 21 Dishon, Ezer, wey Dishan. Nehimu sikandan he menge pengulu te menge Hurhanen he meǥinged diyà te Edom.

22 Is menge anak ni Lotan iyan si Hori wey si Hemam. Telesuled si Lotan wey si Timna he sevaha zuen te menge asawa ni Elifaz.

23 Is menge anak ni Shobal iyan si Alvan, Manahat, Ebal, Shefo, wey si Onam.

24 Is menge anak ni Zibeon iyan si Aya wey si Ana. Iyan si Ana sikan is neketuredu te serebseb diyà te sibsivayan hein ebantey sikandin te menge asnu te amey zin. 25 Is menge anak ni Ana iyan si Dishon wey si Oholibama.

26 Is menge anak ni Dishon he menge maama, iyan si Hemdan, Eshban, Itran, wey si Keran.

27 Is menge anak ni Ezer iyan si Bilhan, Zaavan, wey si Akan.

28 Is menge anak ni Dishan iyan si Uz wey si Aran. 29-30 Iyan heini sikandan menge pengulu te menge Hurhanen he midumala te menge lugar ziyà te Seir: Si Lotan, si Shobal, si Zibeon, si Ana, si Dishon, si Ezer, wey si Dishan.

31 Iyan heini sikandan menge hadì diyà te Edom dutun te timpu he wazè pa menge hadì te menge Israilihanen: 32 Si Bela he tig-Dinhaba he anak ni Beor nehimu he hadì te Edom. 33 Hein minatey sikandin, iyan mid-ilis kandin si Jobab he anak ni Zera te tig-Bozra. 34 Hein minatey si Jobab, iyan mid-ilis kandin si Husham he tig-Teman. 35 Ne hein minatey si Husham, iyan mid-ilis kandin si Hadad he tig-Avet he anak ni Bedad. Si Hadad iyan kes nekezaag te menge Midianhen diyà te Moab. 36 Hein minatey si Hadad, iyan mid-ilis kandin si Samla he tig-Masreka. 37 Hein minatey si Samla, iyan mid-ilis kandin si Shaul he tig-Rehobot he uvey te Wahig he Eufrates. 38 Hein minatey si Shaul, iyan mid-ilis kandin si Baal Hanan he anak ni Acbor. 39 Hein minatey si Baal Hanan, iyan mid-ilis kandin si Hadar he tig-Pau. Iyan esawa zin si Mehetabel he anak ni Matred wey apù ni Mezahab.

40-43 Si Esau (he migngezanan daan te Edom) iyan kepuun te menge Edomanhen. Ne iyan heini nehimu he menge pengulu te menge kevuwazan ni Esau he is menge tribu zan wey menge inged dan iyan inngazan kandan: Timna, Alva, Jetet, Oholibama, Elah, Pinon, Kenaz, Teman, Mibzar, Magdiel, wey Iram.