1 Dutun he timpu, midsuwey si Juda te menge suled din ne ziyà sikandin med-ubpà te ed-ubpaan ni Hira he tig-Adulam. 2 Ne zutun nekilala ni Juda is anak ni Shua he tig-Canaan ne mid-esawa zin haazà. 3 Ne mibmeǥingey haazà ne mid-anak te maama ne migngezanan haazà ni Juda te Er. 4 Mid-uman sikandin mebmeǥingey ne mid-anak en maan te maama ne migngezanan din te Onan. 5 Ne mid-uman en maan sikandin mebmeǥingey ne mid-anak en maan te maama ne migngezanan din haazà te Shela. In-anak si Shela ziyà te Kezib.

6 Impeesawa ni Juda is kinekekayan he anak din he si Er te vahi he iyan ngazan din si Tamar. 7 Piru mezaat is ulaula ni Er ziyà te etuvangan te Nengazen, umbe midhimetayan sikandin te Nengazen. 8 Umbe, migkeǥiyan ni Juda si Onan te, “Esawaa nu is ipag nu su veveluwan nu sikandin su suled nu is minatey he esawa zin, su wey pinaaǥi kenikew egkevuwad is minatey he suled nu.” 9 Netuenan ni Onan he is egkehimu he anak dan ki Tamar ne kenà heini ed-isipen he keugelingen din he kevuwazan. Umbe kada zin edhileveti si Tamar ne kenè din ibpeseled is similya zin su para kenà sikandin mekaanak para zuen te minatey he suled din. 10 Ne mezaat diyà te etuvangan te Nengazen haazà is mibeelan ni Onan, umbe midhimetayan din si Onan.

11 Ne migkeǥiyan ni Juda haazà is ambey zin he si Tamar te, “Ulì ka zèpa ziyà te amey nu, ne kenè ka mebpeesawa taman te egkenakan en si Shela.” Migkaǥi haazà ni Juda su nahandek sikandin he kela ke mebpatey zaan si Shela iring duen te menge suled din. Umbe mid-ulì dèpa si Tamar ziyà te amey zin.

12 Ne hein neuǥet en minatey is esawa ni Juda. Ne hein netapus is timpu te kedlalew zin, ne midhendiyà sikandin te menge peraalut te menge kerehidu zin diyà te Timnah. Duma zin te midhendutun is emiǥu zin he si Hira he tig-Adulam.

13 Ne netudtulan si Tamar he edhendiyà is enuǥang din te Timnah su ed-elutan din is menge kerehidu zin. 14 Kegkezineǥa zutun ni Tamar, mid-ilisan din is bisti zin he visti te valu, ne midtembunan din te lembung is buked din. Ne mibpimpinuu sikandin diyà te pultahan te inged he Enaim, he ziyà te kilid te zalan he ibpehendiyà te Timnah. Iyan diyà te isip din he edlimbungan din si Juda su neseǥipè din he wazà gihapun sikandin ipeesawa ki Shela minsan pa te kenakan en heini.

15-16 Ne hein naahà ni Juda si Tamar, wazè din mekilala he iyan kes ambey zin su netembunan man is buked din. Kunaan din ke vahi haazà he ebelegyà te zengeg din. Umbe mid-uvayan din haazà dutun te kilid te zalan he ke sikandin te, “Hendini ka su ebpehilevetè ki.” Ne midtavak si Tamar te, “Hengkey is ibayad nu kedì ke ebpehilavet a kenikew?” 17 Migkaǥi si Juda te, “Ebeǥayan ku sikew te kambing he ebpuun diyà te menge uyaǥen ku.” Midtavak si Tamar te, “Edsukul a emun duen idsandè nu he wey nu en egkahawì emun igkepeuwit nu en sikan is kambing.” 18-19 Mid-insà si Juda te, “Hengkey is ibpesandè nu kedì?” Midtavak si Tamar te, “Iveǥey nu kediey is penmarka nu wey is hiket din he imbevelieg nu, ragkes en is tuked nu.” Umbe imbeǥey haazà ni Juda ne mibpekidhilavet sikandin ki Tamar. Ne hein nepasad haazà mid-ulì si Tamar, ne in-awè din is tambun te vuked din ne mid-uman mebivisti te visti he para te valu. Ne hein malù en neuǥet mibmeǥingey sikandin.

20 Wazè en meuǥet ne impahated en ni Juda zuen te emiǥu zin he si Hira he tig-Adulam sikan is kambing he idlekat duen te menge azen he insandè din diyà te vahi, piru wazè din meturedu haazà is bahi. 21 Nenginginsà si Hira te menge tig-Enaim ke hendei en sikan is bahi he ebelegyà te zengeg din, he ebpimpinuu ziyà te kilid te zalan. Piru midtavak is menge etew te, “Wazè man bahi kayi he ebelegyà te zengeg din.”

22 Umbe, midlikù si Hira ziyà te ki Juda he ke sikandin te, “Wazè ku sikandin meturedu. Ne iyan lalag te menge etew zutun he wazà bahi zutun he ebelegyà te zengeg din.” 23 Migkaǥi si Juda te, “Ebey-anan en sikan is menge azen ku he ziyà te kandin, su kela ke và ki zà eengiti te menge etew is edtulung ebpen-ahà te wazà duen. Mibpeuwitan ku en man pezem sikandin te kambing piru wazè nu sikandin meturedu ziyà.”

24 Hein midlavey en is tetelu he vulan, netudtulan si Juda he is ambey zin he si Tamar ebpemelegyà te zengeg din ne mibmeǥingey en. Umbe migkaǥi si Juda te, “Uwita niw sikandin diyà te ǥawas te inged ne binsuli niw.” 25 Piru hein ed-uwiten dan en si Tamar, duen impekaǥi zin diyà te ki Juda he ziyà te kandin is penmarka wey is hiket kayi, ragkes en is tuked. Ne is teǥiǥaked dutun iyan nekeǥingey kandin. Ne kinahanglan he egkilelaan ke hentei is teǥiǥaked dutun.

26 Nekilala ni Juda he kandin haazà he menge azen, umbe migkaǥi sikandin te, “Wazà mekesalà si Tamar. Iyan a nekesalà su wazè ku sikandin ipeesawa te anak ku he si Shela.” Ne wazè en si Juda med-uman medhilavet ki Tamar.

27 Hein hapit en ed-anak si Tamar, netuenan he sereping is keǥingayan din. 28 Hein ebeliliten en sikandin, migawas is belad te sevaha he vatà. Ne is mengunguyamu midhiketan din heini te meriǥà he hiket su wey metuusi he iyan kakey. 29 Piru inseled dutun te vatà is belad din ne iyan midhuna megawas sikan is sereping din. Ne migkaǥi is mengunguyamu te, “Mibpekid-aǥew ka te kegawas.” Umbe migngezanan haazà is batà te Perez. 30 Ne migawas daan sikan is sereping din he midhiketan te meriǥà he hiket is belad din. Ne migngezanan sikandin te Zera.