1-2 Mibpenlavey is timpu, is pengulu te pereuwit te vinu te hadì wey kes pengulu te mememaal te supas ne nekesalà diyà te kandin. Utew nepeuki te hadì haazà is dezuwa he menge upisyal zin. 3 Umbe, impepirisu sikandan diyà te valey te kepitan te menge vantey ziyà te pirisuwan he iyan ded sikan is mibpirisuan daan ki Jose. 4 Si Jose is midseriǥan te kepitan te menge vantey he iyan ebeǥey kandan te egkinehenglanen dan. Neuǥet is kegkepirisuwa kandan.

5 Sevaha zutun he mezukilem, neketeǥeinep kes pereuwit te inumen wey mememaal te supas dutun te kemulu pa sikandan nepirisu. Uman sevaha kandan ne selakew is teǥeinep din wey selakew is kehuluǥan te teǥeinep din. 6 Ne hein nepawà te kedleuya kandan ni Jose, neehè din he utew zan neseeng. 7 Mid-insaan din haazà is dezuwa he upisyal te hadì te Ehipto ke maan is utew zan neseeng. 8 Ne midtavak dan te, “Geina te neketeǥeinep key, iyan, wazà ebpekeseysey ke hengkey is kehuluǥan duen te teǥeinep dey.” Ne migkaǥi zutun si Jose te, “Megbevayè dà is ebpekepezayag kenitew te kehuluǥan te menge teǥeinep. Keǥiya niw kun kediey is teǥeinep niw.”

9 Ne zutun impenudtul ki Jose te egalen te menge pereuwit te inumen is teǥeinep din. Ke sikandin te, “Neteǥeinep ku he zuen gawed diyà te egkesineruan ku. 10 Ne tetelu is subpang duen te ǥawed. Ne mibpeneringsing ne mibpengevukad ne mibpemeǥas ne nengelutuan is beǥas din. 11 Migewezan ku kun is tasa te hadì te Ehipto ne midrupù ku haazà is menge paras ne migkeres ku ne midtiǥis is wahig din diyà te tasa. Ne nepasad ne imbeǥey ku haazà is tasa ziyà te hadì.”

12 Ne migkaǥi si Jose te, “Iyan heini kehuluǥan te teǥeinep nu: Sikan is tetelu he subpang ne iyan kehuluǥan din is tetelu he andew. 13 Dutun te kenè pa egkeuma is tetelu he andew, ne ibpeǥawas ke en te hadì kayi te pirisuwan, ne ibpelikù ke zin diyà te zaan he terebahu nu he iyan is ked-uwiti nu kandin te vinu. 14 Berakat he kenà a kenikew lipati emun meupiya en is kebpekesavuk nu, he iyan kebpaahà a nu te keupiya nu kedì, keǥiya nu ziyà te hadì is ngazan ku su wey a kenikew metevangi wey a mekeǥawas kayi te pirisuwan. 15 Migebpaan a puun te inged dey te menge Hebriyuhanen, ne wazà salè ku he zait he igkepirisuwa kedì.”

16 Hein nezineg duen te egalen te mememaal te supas he meupiya is kehuluǥan duen te teǥeinep, midtudtul zin daan is teǥeinep din diyà te ki Jose. Ke sikandin te, “Neketeǥeinep a zaan he zuen ku ed-utuken he tetelu he revan he nepenù te supas. 17 Ne is kinezivevawan en utew zutun te revan, ne zuen taǥù he nekedseselekawà he kelasi he supas he para te hadì, piru mibpengaan heini te menge tagbis.”

18 Ne midtavak si Jose te, “Iyan heini kehuluǥan te teǥeinep nu: Sikan is tetelu he revan, ne tetelu zaan he andew. 19 Seled te tetelu he andew ebpepungelan ka te hadì te ulu ne ibitey ka ziyà te kayu ne ebpengeenen te menge tagbis is sapù nu.”

20 Ne netuman iyan haazà su neketelu pa zutun iyan kedsilibra te ked-enaka te hadì te Ehipto ne midtukud sikandin te keemuran ne impetampu zin is langun he menge upisyal zin. Mid-umew zin is egalen te menge pereuwit te inumen wey is egalen te menge mememaal te supas ne impeetuvang sikandan te menge zuma zan he upisyal. 21 Ne sikan is egalen te menge pereuwit te inumen, impelikù din te zaan he vaal zin ne iyan en maan sikandin eduwal te inumen diyà te hadì. 22 Ne sikan is egalen te menge mememaal te supas, impevitey te hadì sumalà is kehuluǥan he midseysey ni Jose. 23 Piru sikan is pereuwit te inumen, wazè din tevangi si Jose su nelipatan din.