Isaias
1
Heini he libru, ne mehitenged te impahayag te Megbevayà diyà te ki Isaias he anak ni Amoz. Ne heini, mehiten ged te Jerusalem wey Juda hein kedhadì diyà te Juda ni Uzia, ne nesunuzan ki Jotam, ki Ahaz, wey ki Hezekia.
Is Mekesesalà he Nasyun
Pemineg ka is langit wey is tanà, su migkaǥi is Nengazen te, “Mid-elimahan ku wey impezekelè ku is menge Israelinhon he menge anak ku, piru midsukul sikandan kediey. Minsan ganì is menge vaka ebpekekilala te egalen dan, is menge asnu ebpeketuredu te selemakà he zutun sikandan ibpekaan te egalen dan, piru is menge kevuwazan ni Israel he menge etew ku ne wazà mekekilala kediey.”
Mekesesalà sikandan he nasyun, menge etew he utew subra is kelelalung dan, kevuwazan sikandan te mememaal te mezaat wey mesipala. Inselikwey zan wey mid-undaunda is Nengazen, kes Waǥas he Megbevayà te Israel, ne mid-iniyuǥan dan sikandin.
Menge tig-Israel, maan is mibpedayun kew mebpekidsukulà? Egkesuat kew ve he edsilutan? Iring kew te etew he nepurung te palì is ulu zin wey utew mesakit is gehinawa zin. Puun te ulu zin taman te parapara zin ne wazè en egkekaǥi ta he meupiya, su pudu en palì, daǥem, wey levag. Wazà heini melùlui, etawa mevukusi, etawa mevewii.
Nehimu he mekevulungbulung is nasyun niw; ne nengevinsulan is menge inged niw. Ne nevembentayan niw is kebpenguwaa te menge veǥas te pinemula niw ziyà te vevesukè niw te menge etew ziyà te zuma he lugar. Edezeetan dan is tanè niw taman te kenè en heini egkepulusan. Ne wazè en nesamà gawas te Jerusalem. Neiring heini te helungà diyà te pemuleey te paras etawa lawig diyà te menge pemuleey te timun he iyan dà nekehitindeg. Ne iring daan heini te inged he edliǥuyan te menge kuntada. Emun wazà uuyag he midsamà kenitew te Nengazen he Mekeǥeǥehem, ne egkeiring kiw en te Sodom wey Gomora.
10 Sikiyu is menge ebpemendumala wey menge etew ziyà te Jerusalem, he iring te menge tig-Sodom wey tig-Gomora, pemineǥa niw is lalag wey kesuǥuan te Nengazen he Megbevayè tew. 11 Ke sikandin te, “Wazà bali kayi te kediey te mahabet he menge pemuhat niw. Midsemu ad te menge pemuhat niw he edtutungen menge kerehidu wey menge tavà te menge uyaǥen he impelambù niw. Wazè ku ikelipey is lengesa te menge tudu he vaka, menge kerehidu, wey menge kambing. 12 Hentei ves is midsuǥù keniyu he uwita niw heini is langun emun uvag ed-ezapen a keniyu? Hentei is midsuǥù keniyu te kedtekutak te valey ku? 13 Engked kew en te ked-uwit te menge pemuhat he wazè dan pulus. Igkeremerik ku is beyewè niw. Kenè ku en egkaantus is menge kevurunan niw emun Pista te Kebpuun te Hayag wey emun Andew te Kedhimeley, su minsan edtiǥum kew ne mezaat is baal niw. 14 Egkeepesan ku is menge Pista niw te Kebpuun te Hayag wey is duma he menge pista niw. Igkeveǥati ku heini; ne kenè ku egkaantus.
15 “Emun ebpengemuyù kew ne kenè ku sikiyu ebpemineǥen. Kenà a ebpemineg minsan kepipira kew pa med-ampù, su mahabet en is mibpenhimetayan niw he menge etew. 16 Mebpekelumpiyu kew! Engked kew en he ebaal te mezaat diyà te etuvangan ku. 17 Penginenau kew te kebaal te meupiya, wey iyan niw ikula is hustu he kukuman. Dewaya niw is menge ebpemeǥespeǥes, wey levani niw is ketenged te menge ilu wey menge valu he vahi.”
18 Migkaǥi pa is Nengazen te, “Hendini kew, su edhusayen tew heini. Minsan sengemenu keremerik is menge salè niw, edlumpiyuwan ku heeyan su wey kew mehimu he lumpiyu. 19 Emun ebpezumazuma kew kedì, ne edtuvazan ku sikiyu. 20 Piru emun edsupak kew wey ebpekidsukulè kew, ne siguradu ebpemematey kew. Egkehitavù heini, su iyan a, is Nengazen, is migkaǥi kayi.”
Is Mekesesalà he Inged
21 Ahàa niw man is inged he Jerusalem. Hein aney metinumanen is menge meǥinged kayi, piru ǥuntaan neiring en sikandan te vahi he ebelegyà te zengeg din. Hein aney metazeng he menge etew is ebpemen-ubpà diyà te Jerusalem, piru ǥuntaan menge teremunù. 22 He Jerusalem, hein aney mevali ka iring te pelata, piru ǥuntaan wazè nu en pulus. Hein aney iring ka te vinu he wazè din sahug piru ǥuntaan nesehuǥan te wahig. 23 Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.
24 Umbe, migkaǥi is Nengazen, he Mekeǥeǥehem he Megbevayà te Israel te, “Ebelesan ku sikiyu is menge tig-Jerusalem he menge kuntada ku, su wey kenà ad mesekiti tenged te menge vaal niw. 25 Edsilutan ku sikiyu su wey kew melumpiyuwi iring te pelata he edlunsayen pinaaǥi te hapuy. 26 Ed-umanan ku sikiyu ebeǥayi te menge pengulu wey menge sumesambag iring duen te nehuna. Ne ziyà te huziyan he timpu egkengezanan is inged niw te inged te menge metazeng wey menge metinumanen he menge etew.”
27 Pinaaǥi te metazeng he kukuman te Megbevayà, edlibriyen din is Jerusalem wey is menge meǥinged kayi he ed-iniyug te mezaat. 28 Piru edezeetan din mulà is menge mesinupaken wey menge mekesesalà, he edselikwey te Nengazen.
29 Egkepeel-elezan kew is menge tig-Jerusalem tenged te ked-azap niw ziyà te menge kayu he ulayan wey ziyà te pinilì niw he menge pemuleey. 30 Egkeiring kew te kayu he ulayan he neǥangu, wey te pemuleey he wazà mevinyaǥi. 31 Is menge gehemanen diyà te keniyu egkeiring te kayu he neǥangu he melemu zà egkevinsuli, ne is mezaat he menge vaal zan egkeiring te regreg he iyan ebpekevinsul kandan, ne wazà ebpekeevuk keniyan he hapuy.