1 Heini he menge lalag ne mehitenged te Tyre:

Sineǥew kew is menge ebpemen-untud te menge varku ziyà te Tarshish! Su nezeetan is pentalan niw ziyà te Tyre. Midtudtul en heini keniyu te ebpemuun diyà te Cyprus. 2 Pereremek kew is menge meǥinged diyà te pulu, ragkes kew en is menge nigusyanti ziyà te Sidon. Is menge nigusyanti niw he iyan insepian niw, ed-untud sikandan te menge varku 3 ziyà te menge zaǥat su para mekepemasa zan wey mekepemelegyà te menge abut he ebpuun diyà te Shihor he uvey te Wahig he Nilo. Ne mibpetiǥayun diyà te keniyu is menge nasyun. 4 Meeled ka is inged he Sidon he iyan edengepan te menge etew he ziyà ed-ubpà te veyvey te zaǥat. Ke và dà etew is daǥat ne idselikwey zin en is Sidon he ke sikandin te, “Wazè ku en anak, wazè ku mid-anak-anak he vatà he maama etawa vahi.”

5 Egkeseeng is menge Ehiptohanen emun egkezineg dan is nehitavù diyà te Tyre. 6 Sineǥew kew is ebpemen-ubpà diyà te pulu. Layun kew ziyà te Tarshish! 7 Dengan, ne menge melipayen is ed-ubpà kayi te inged he Tyre he mibangun dutun te nehuna he timpu; is menge ed-upà kayi, ne nemekeuma ziyà te meziyù he menge lugar ne midsakup dan haazà he menge lugar. Piru ǥuntaan hengkey en is nehitavù kayi he inged? 8 Hentei is mibpelanu para mezeeti is Tyre he iyan kes inged he midsakup din dengan is duma he menge lugar, wey nekilala kayi te kelibutan is dungganen he menge nigusyanti zuen? 9 Is Nengazen he Mekeǥeǥehem iyan mibpelanu kayi su ibpekevavè din is ebpelavew te kegkemekeǥeǥehem din wey is egkilelaan he ventuǥan kayi te kelibutan. 10 Sikiyu is menge meǥinged diyà te Tarshish, melinawen en human is kedsaǥad niw ziyà te Tyre iring en heini te melinawen he kedtuda te Wahig he Nilo, su wazè en ebpekeeǥen keniyu. 11 Imbayew te Nengazen is belad din diyà te zaǥat su edezeetan din heini, umbe mibpengerker tenged te kegkahandek is menge meǥinged diyà te menge ginhedian. Mibmandar sikandin he bengkaǥa is melig-en he verengbeng te Fenecia. 12 Migkaǥi is Nengazen te, “Sikiyu is menge meǥinged diyà te Sidon, egkeengked en is kegkelipey niw. Nezeetan kew en. Minsan ebpelaǥuy kew pehendiyà te Cyprus, wazè niw ǥihapun egkehimelayan diyà.”

13 Ahàa niw is tanà te menge tig-Babilonia. Hendei en buwa is menge meǥinged duen? Midhimu te Asiria heini he lugar he ubpeey zà te leew he menge langgam. Su midsurung dan heini, midrundus dan is menge melig-en he vahin kayi, ne mibey-anan dan en heini is lugar he nevengkag. 14 Sineǥew kew is ebpemen-untud te varku ziyà te Tarshish, su nevengkag en is inged he dengepè niw. 15 Egkelipatan is Tyre seled te 70 he tuig, he iyan keluǥayad te untung te hadì. Ne emun edlavey en haazà, ne egkehimu is Tyre he iring te vahi he ebelegyà te zengeg din he iyan edhisgutan kayi te kanta: “Sikew is bahi he ebelegyà te zengeg din, nelipatan ke en. 16 Umbe, kuwaa nu is alpa nu, ne purungi nu heini te edtukar zutun te edrigurigu ka ziyà te inged. Mehebeta nu is kanta nu, su wey ka metenuzi.”

17 Ne kedlavey te 70 he tuig, edtentenuzan en maan te Nengazen is Tyre. Piru ed-umanan ebeeli te Tyre is nehuna he mibeelan din, iring te ebeelan te vahi he ebelegyà te zengeg din. Ebeelan din is mezaat su para mepenepii zin is langun he menge ginhedian kayi te kelibutan. 18 Piru ziyà te huziyan he timpu, is genansya zin ne kenà edtipiǥan, kekenà, idhalad diyà te Nengazen su wey ikepemesa te zekelà he keenen wey meupiya he menge visti he para te menge etew he ebpenilbi te Nengazen.