1 Migkaǥi is Nengazen te, “Kanta ka, Jerusalem, is iring te vahi he kenà ebpekaanak. Kanta ka wey derag-ey ka te kegkelipey, is wazè pa mekesaǥad te velilit. Su minsan mid-ewaan ka te esawa nu, egkehimu he mahabet pa is kenikew he menge anak kenè te vahi he wazà ewai te esawa zin. 2 Ipezekelè nu wey lig-eni nu is ubpeey nu. Kenè nu eǥena is kebpekeluaǥa kayi. 3 Su ibpeiseg ku is menge dulunè nu, edsekupen te menge etew nu is duma he menge nasyun, ne ed-ubpaan dan is menge inged kayi. 4 Kenè ka mahandek su kenè ka egkepeel-elezan. Egkelipatan nu is kegkeeled-eled nu hein betan-en ke pa wey is kegkevalu nu. 5 Su siak is midlimbag kenikew, egkehimu a he iring te esawa nu. Mekeǥeǥehem he Nengazen is ngazan ku. Siak, is Waǥas he Megbevayà te Israel, iyan a Menluluwas nu. Egngezanan a he ‘Megbevayà te tivuuk he kelibutan.’

6 “Jerusalem, iring ka te vetan-en he vahi he midlalew su mid-ewaan te esawa zin. Iyan, guntaan ed-umawen ku sikew he likù ka kayi te kedì. 7 Seled te mevavà he timpu mid-ewaan ku sikew, piru tenged te zekelà he hizu ku ed-umanan ku sikew egkuwaa. 8 Tenged te utew ku kenikew kegkepeuki, mid-iniyuǥan ku sikew seled te mevavà he timpu, piru tenged te gaǥew ku he wazà pidtemanan, egkehizuwan ku sikew. Iyan a, is Nengazen he Menluluwas nu, is migkaǥi kayi.

9 “Iyan ked-isipa ku kayi is, iring te timpu ni Noe he zutun nenangdù a he kenè ku en ibpeuman ibpelapey is wahig kayi te kelibutan. Ne ǥuntaan ebpenangdù a zaan he kenè ku en sikew egkepeukan wey edsilutan. 10 Minsan egkengetempag pa is menge vuntud wey menge vuvungan, ne kenà mulà egkaawà is gaǥew ku wey penangdù ku he ebeǥayan ku sikew te meupiya he kebpekesavuk. Iyan a, is Nengazen he nehizu kenikew, is migkaǥi kayi.

11 “He Jerusalem, he henduen be te migkusukusu te vagyu. Nerasey ka ne wazà midlipey wey midasig kenikew. Piru ed-umanan ku sikew ebenguna he ziyà ibpehitindeg te menge vatu he sepiru, ne egemiten ku is mahalen he menge vatu te kebaal te menge elavat te menge valey nu. 12 Egemiten ku is menge vatu he rubi he para te turi nu, wey is mekempet he menge vatu te kebaal te menge pultahan wey menge verengbeng nu. 13 Iyan a mismu ebpenurù te menge etew nu, ne utew sikandan ed-uswag. 14 Ebmelig-en ka su edtinazeng is menge etew nu. Ebpeleǥuyan ka te menge kuntada nu, umbe wazè nu en igkahandek. Kenè en ed-uvey ziyà te kenikew is menge kuntada nu, ne kenè ke en egkeheratan. 15 Emun duen edsurung kenikew; kenà heini kediey he suat. Ebpekesurindir is edsurung kenikew. 16 Pemineg ka! Iyan a mibaal te menge pandey te mital he edhiyup te hapuy wey vaǥa te uring wey ebpemaal te ǥumaan. Ne kediey zaan he limbag is menge ebpendezaat he egamit kayi he menge ǥumaan te kebpendezaat dan. 17 Is kada ǥumaan he mibeelan su igkuntra kenikew ne kenà ebpekekaid kenikew, ne egketavak nu is menge ibpesangil kenikew. Is egkepengevilin te menge suluǥuen ku, iyan is kezeeǥan duma is ketazeng. Iyan a, is Nengazen, is migkaǥi kayi.”