1 Duen migkaǥi te Nengazen diyà te ki Jeremias hein ikesepulù he tuig te kedhadì ni Zedekia ziyà te Juda. He iyan daan haazà ike-18 he tuig te kedhadì ni Nebucadnezar ziyà te Babilonia. 2 Dutun he timpu midliǥuyan te menge sundaru te Babilonia is Jerusalem, ne si Jeremias he ebpeneuven mibpirisu ziyà te ubpeey te menge vantey ziyà te turuǥan. 3 Impepirisu sikandin ni Hadì Zedekia tenged te migkaǥi sikandin te, “Iyan heini migkaǥi te Nengazen: Ibeǥey ku heini he inged diyà te hadì te Babilonia, ne egkaaǥew zin heini. 4 Kenà ebpekelikey si Hadì Zedekia te gehem te menge tig-Babilonia. Su siguradu he ibeǥey ku sikandin te hadì te Babilonia ne ebpeked-etuvang wey ebpekedlalag sikandan. 5 Edumahan si Zedekia ziyà te Babilonia, ne kenà sikandin egkaawà diyà taman te egkesilutan ku sikandin. Minsan edsukul kew te menge tig-Babilonia ne kenè kew ǥihapun ebpekezaag. Iyan a, is Nengazen, is migkaǥi kayi.”

6 Mid-uman pa megkaǥi si Jeremias te, “Migkeǥiyan a te Nengazen, ke sikandin te 7 si Hanamel he anak ni Shalum te anggam nu, edhengkayi te kenikew is egkaǥi te, ‘Pemesaha nu is bevesukè ku ziyà te Anatot. Su iyan ka utew megeget he kezuzumahi ku, duen nu ketenged wey ketengdanan te kebpemasa kayi.’

8 “Ne ǥeina te iyan heeyan migkaǥi te Nengazen, midhengkayi te kediey si Hanamel he id-aǥew ku, kayi te ubpeey te menge vantey. Ke sikandin te, ‘Deyzey ke ebpemesahan nu is bevesukè ku ziyà te Anatot he nesakup te tanà te tribu ni Benjamin. Duen nu ketenged wey ketengdanan te kedlekat wey ked-angken kayi, umbe pemesaha nu en heini para kenikew.’ ”

Netuenan ku he iyan migkaǥi zutun is Nengazen, 9 umbe mibpemasa ku haazà is bevesukà diyà te Anatot diyà te ki Hanamel te 17 he vuuk he pelata. 10 Mibpirmahan ku wey midtetakan is pepilis te kebpemasa ku ziyà te etuvangan te menge tistiǥus. Ne midtimbang ku haazà is pelata ne imbayad ku ki Hanamel. 11 Ne migkuwa ku sikan is pepilis he midtetakan wey is kupya zin he wazà tetaki, he zutun mekesurat is neuyunan dey te kebpemasa ku. 12 Ne imbeǥey ku haazà diyà te ki Baruc he anak ni Neria wey apù ni Masea, diyà te etuvangan ni Hanamel he id-aǥew ku wey te menge tistiǥus he nemirma zutun te pepilis, wey ziyà te etuvangan te menge Judio he ebpemimpinuu zutun te ubpeey te menge vantey.

13 “Ne ziyà te etuvangan dan migkeǥiyan ku si Baruc te, 14 ‘Iyan heini migkaǥi te Nengazen he Mekeǥeǥehem, he Megbevayà te Israel: Uwita nu is pepilis he midtetakan wey is wazà tetaki, ne itaǥù nu heini ziyà te tivud su wey kenà mezeeti seled te meluǥayad he timpu. 15 Su egkeuma is timpu he is menge etew ebpememase en maan te menge valey, menge vevesukà, wey menge pemuleey te paras kayi he lugar.’ ”

16 Ne hein ingkeveǥey ku en haazà is pepilis diyà te ki Baruc he anak ni Neria, ne nengemuyù a te, 17 “He Nengazen he MEGBEVAYÀ, midlimbag nu is kelibutan wey is langit pinaaǥi te zekelà he ǥehem nu. Wazà minsan hengkey he kenè nu egkehimu. 18 Impeehè nu is kebmahala nu te linibu he menge etew, piru midsilutan nu is menge anak tenged te salà te menge ginikanan dan. Utew ka mekeǥeǥehem he Megbevayà. Iyan ngazan nu is Nengazen he Mekeǥeǥehem. 19 Utew meupiya is menge pelanu nu wey egkein-inuwan is menge vaal nu. Egkeehè nu is langun he ebeelan te menge etew, ne ebelesan nu sikandan sumalà te vetasan dan wey menge vaal zan. 20 Mibaal ka te menge singyal wey menge egkein-inuwan he menge vaal ziyà te Ehipto ne taman en guntaan is kebeeli nu zutun kayi te Israel wey ziyà te zuma he menge nasyun. Ne pinaaǥi kayi nehimu ka he velentuǥen taman en guntaan. 21 Pinaaǥi te menge singyal wey menge egkein-inuwan he menge vaal nu, wey te ǥehem nu he ingkahandek te menge Ehiptohanen, impeǥawas nu ziyà te Ehipto is menge etew nu he Israilihanen. 22 Imbeǥey nu kandan heini is meupiya wey selebpeten he tanà he insaad nu is kebeǥaya nu zuen diyà te menge kepuun dan. 23 Naangken dan heini piru wazè dan medtuman te kesuǥuan nu. Wazè dan beeli is langun he ebpeveelan nu kandan. Umbe impaaǥi nu ziyà te kandan heini is kezeetan. 24 Ne ǥuntaan midtambù te tanà is menge tig-Babilonia kayi te kilid te verengbeng te Jerusalem he egkeveyaan dan te kedseled dan kayi te inged su wey zan maaǥew heini. Ne tenged te tebek, bitil, wey zaru, egkaaǥew te menge tig-Babilonia heini is inged su iyan heeyan migkaǥi nu. 25 Piru minsan pa te iyan heini, Nengazen he MEGBEVAYÀ, midsuǥù a kenikew te kebpemasa te vevesukà he ebeyazan heini te pelata ziyà te etuvangan te menge tistiǥus, Minsan pa te hapit en egkaaǥew te menge tig-Babilonia heini is inged.”

26 Ne migkeǥiyan te Nengazen si Jeremias te, 27 “Siak is Nengazen he Megbevayà te langun he menge etew. Duen be kenè ku egkehimu? 28 Umbe, ibeǥey ku heini he inged diyà te menge tig-Babilonia wey ziyà te hadì dan he si Nebucadnezar, ne egkaaǥew zan heini. 29 Edselezan dan heini he inged ne ebinsulan. Elin daan ebinsulan dan is menge valey he zutun te atep dan edtutungen is beyewà para ki Baal. Ne zutun daan edhalad dan te idhalad he menge inumen para te zuma he menge ed-ezapen he utew ku ingkeepes.

30 “Puun pa zengan wazà duma he vaal te menge etew ziyà te Israel wey Juda, kekenà, pudu kebaal te salà. Midhimu zan he mepauk a pinaaǥi te menge vaal zan. 31 Puun pa te kegketukud kayi he inged taman en guntaan, midhimu te menge meǥinged kayi he mepauk a. Umbe edezeetan ku heini. 32 Midhimu te menge etew ziyà te Israel wey Juda he mepauk a tenged te mezaat he menge vaal zan. Pudu sikandan–is menge hadì dan wey menge upisyal zan, is menge memumuhat dan, is menge ebpeneuven, wey is langun he menge etew ziyà te Juda wey Jerusalem. 33 Mid-iniyuǥan e zan minsan layun ku sikandan ebpenurùa. Kenè dan ebpemineg wey kenè dan egkesuat he ebpenuruen. 34 Diyà te valey ku he mibpilì ku he zutun a ebeǥayi te zengeg, ne midremerikan dan heini pinaaǥi te kedsevuki zan te utew mezaat he menge ed-ezapen. 35 Mibangun dan te menge simbahan he para ki Baal ziyà te Suǥud-suǥud he Ben Hinom, para ikepemuhat dan is menge anak dan diyà te ed-ezapen he si Molec. Ne wazè ku heini isuǥù kandan; wazè ku man ganì meisip he ebeelan dan heini is utew mezaat he menge vaal he nehimu he hinungdan te kebpekesalà te menge etew ziyà te Juda.

36 “Jeremias, tutuu is migkaǥi nu he pinaaǥi te tebek, bitil, wey zaru egkezizalem heini he inged te ǥehem te hadì te Babilonia. Piru ǥuntaan siak, is Nengazen he Megbevayà te Israel, egkaǥi a te, 37 edtiǥumen ku is menge etew ku puun te langun he lugar he zutun ku sikandan ipeyapat tenged te utew ku kegkepeuki kandan. Ed-umanan ku sikandan ed-uwita kayi he lugar ne ebpekepengungubpaan dan he melinawen. 38 Egkehimu sikandan he menge etew ku ne egkehimu a he Megbevayè dan. 39 Edhimuwen he mesevaha is ketuyuan dan te kebpengungubpaan, su wey zan layun medtahud kediey, ne para heini te keupiyaanan dan wey keupiyaanan te menge kevuwazan dan. 40 Ebpekid-uyun a kandan te wazà pidtemanan, idsaad ku kandan he layun a ebaal te meupiya ziyà te kandan. Ebeǥayan ku sikandan te tinguhà te kedtahud kediey, su wey zan kenà med-awà kayi te kedì. 41 Igkelipey ku is kebaal te meupiya ziyà te kandan, ne ebpuun diyà te tivuuk he ǥehinawa ku is kebpeubpaa ku kandan kayi he tanà.”

42 Migkaǥi pa is Nengazen te, “Iring te impeseǥazan ku kayi he menge etew is dekelà he kezeetan, ibeǥey ku zaan kandan is menge keupiyaanan he insaad ku kandan. 43 Duen egkagi he heini is tana utew en mekevulungbulung wey wazà duen ed-ubpà he etew etawa langgam, su imbeǥey ku en heini te menge tig-Babilonia. Piru minsan pa zutun, keuzemà duen ebpememasa te menge vevesukà kayi te tanà.

44 “Uya, egkehitavù ded is kebeyazi te menge etew te pelata te menge vevesukà. Ebaal sikandan te kesebutan. Ebpirmahan, edtetakan is menge pepilis, ne edtistiǥusan. Egkeulaula heini ziyà te menge tanà ni Benjamin, wey ziyà te zezeisey he menge inged he nekeliǥuy te Jerusalem, malù dezekelà he menge inged diyà te Juda, wey te menge inged diyà te menge vuvungan, diyà te inged te menge mibuntud-buntud diyà te edsenlepan, wey ziyà te inged he Negev. Ibpelikù ku is menge etew ku wey ibpeuswag ku sikandan ibpeuman. Iyan a, is Nengazen, is migkaǥi kayi.”