1 Iyan heini migkaǥi te Nengazen diyà te ki Jeremias mehitenged te Babilonia wey te menge etew kayi: 2 “Ipetueni nu ziyà te menge nasyun is tudtul! Ne ivayew is bendirà ne ipetueni te langun: ‘Egkezeetan is Babilonia! Egkerupet wey egkepeel-elezan is menge ed-ezapen kayi he si Bel wey si Marduk.’ 3 Su edsurungen is Babilonia te sevaha he nasyun he ebpuun te zizaya, ne egkehimu heini he mekevulungbulung ne wazè en ed-ubpà kayi, su ebpemelaǥuy en is menge etew kayi wey menge uyaǥen.”

4 “Dutun he timpu is menge etew ziyà te Israel wey Juda edsineǥew is edangep kayi te kedì, te Nengazen he Megbevayè dan. 5 Id-insè dan is beyeey pehendiyà te Jerusalem ne edhendiyè dan. Ne ebpekid-uyun dan kedì te uyun he wazà pidtemanan, ne kenè dan heini egkelipatan.

6 “Is menge etew ku neiring te netazin he menge kerehidu. Mibey-anan sikandan te menge ebantey kandan he metazin diyà te menge vuntud wey menge vuvungan, ne kenè ne sikandan ebpeketuredu he ed-ulì. 7 Edsurungen sikandan te ebpekaahà kandan. Egkaǥi is menge kuntada zan te, ‘Nekesalè dan diyà te Nengazen he iyan tutuu he eputè dan wey egkeperateng te menge kepuun dan, umbe wazè tew televaken emun edsurungen tew sikandan.’

8 “Sikiyu is menge Israilihanen, awè kew puun te Babilonia! Ewai niw heeyan he nasyun! Huna kew awà! 9 Su ibpesurung ku is Babilonia te menge sundaru he gurupu he ebpuun diyà te gemhanan he menge nasyun diyà te zizaya. Edsurung dan diyà te Babilonia ne egkaaǥew zan heini. Metau utew sikandan he menge mememanà ne kenà ebperis is kebpanè dan. 10 Ed-eǥawen dan is menge azen diyà te Babilonia, ne egkuwaan dan is egkesuatan dan te egkuwa. Iyan a, is Nengazen, is migkaǥi kayi.

11 “Sikiyu is menge etew ziyà te Babilonia mid-eǥawan niw te menge azen is menge etew he ǥaked ku. Midlipey kew wey miguǥusà he iring te mid-elimahan he dumeraǥa he vaka ziyà te penebtavà wey kudà he edherìhì. 12 Piru ebpeel-elezan ku is tivuuk he meǥinged diyà te nasyun niw. Egkehimu heini utew mevavà te langun he nasyun, wey egkehimu heini he mekevulungbulung wey disirtu he nasyun. 13 Tenged te pauk ku wazè en ebpekeubpà diyà te Babilonia ne egkehimu heini he mekevulungbulung he lugar. Is langun he edsaǥad kayi ne ebpekepenerektek dan tenged te langun he egkehitavù kayi he nasyun.

14 “Sikiyu is menge mememanà, pelastar kew en diyà te peliǥuy te Babilonia. Ne iamin niw ipanà is menge vesut niw ziyà te kandin su nekesalà sikandin diyà te Nengazen. 15 Kulahì kew en te egkezineg minsan hendei! Ahàa niw man! Midsurindir en is Babilonia! Nengerundus en is menge turi zin ne nengewaǥey en is menge verengbeng din. Ne penimales heini te Nengazen kandin. Umbe velesi niw sikandin ne veeli niw ziyà te kandin is mibeelan din diyà te zuma. 16 Puawa niw ziyà te Babilonia is menge ebpememula wey menge ebpemenraǥun. Libriya niw mulà is menge vinihag te ispada te menge kuntada wey kenà mehimetayi, ne ipeulì sikandan diyà te kandan he menge lugar.

17 “Is menge Israilihanen neiring te netazin he menge kerehidu he midal-as te menge erimaung. Hein aney, migkaan sikandan te hadì te Asiria, ne mid-ul-ulan is menge tulan dan te Babilonia.

18 “Umbe siak, is Nengazen he Mekeǥeǥehem, he Megbevayà te Israel, migkaǥi a te, ‘Edsilutan ku is hadì te Babilonia iring te midsilutan ku is hadì te Asiria. 19 Piru ibpelikù ku is menge Israilihanen diyà te nasyun dan. Ne egkeiring dan te menge kerehidu; egkaan sikandan te egkeraǥun dan puun te Carmel, te Bashan, wey ziyà te vuvungan te Efraim wey Gilead, ne egkeperahan sikandan. 20 Dutun he timpu, egkehanew en is menge salà wey is menge kedsupak te nesamà he menge etew ziyà te Israel wey Juda, su ebpeseyluwen ku sikandan.’ ”

21 Migkaǥi pa is Nengazen te, “Surunga niw is Merataim wey is Pekod. Penhimetayi niw is menge etew zutun ne purungi niw dezeeti. Beeli niw is langun he insuǥù ku keniyu. 22 Egkezineg is kulehian diyà te tebek wey is keǥurub te kegkepurung kegkezeeti te tivuuk he tanà. 23 Is Babilonia neiring te masu he edrupet te menge nasyun piru ǥuntaan nerupet en heini. Nahandek is langun he menge nasyun te nehitavù kayi!

24 “Ne Babilonia, midlitaǥan ku sikew ne wazè ka meketukew he nelitaǥan ke en. Nezekepan ka su nekigkuntada ka kediey. 25 Mibpuwasan ku is teleǥuey te menge gumaan ku ne impeǥawas ku is menge ǥumaan he egemiten ku zutun te kebpeǥazami ku te pauk ku. Siak, is Nengazen he MEGBEVAYÀ he Mekeǥeǥehem, duen ebeelan ku ziyà te kenikew, he Babilonia.

26 “Sikiyu is menge kuntada te menge tig-Babilonia he ebpuun diyà te meziyù he lugar, surung kew ziyà te Babilonia! Puwasi niw is menge budiga kayi. Itambù niw is menge azen he egkaaǥew niw he iring te edtambù kew te trigu. Purungi niw dezeeti is menge tig-Babilonia ne kenè niw en semai. 27 Penhimetayi niw is langun he menge sundaru zan. Lepaa niw he iring te menge turiti he vaka. Mekehizuhizu sikandan su neume en is timpu te kedsiluti kandan.

28 “Pemineǥa niw is menge etew he nekepelaǥuy puun te Babilonia. Nenudtul zan diyà te Jerusalem ke mibmenumenu te Nengazen he Megbevayè tew is kebelesi zin te Babilonia tenged te mibeelan te menge tig-Babilonia ziyà te baley zin.

29 “Ipesurung niw te menge mememanà is Babilonia! Peliǥuwi niw para wazà ebpekepelaǥuy. Belesi niw sikandin sumalà te mibeelan din. Beeli niw ziyà te kandin is mibeelan din diyà te zuma, su midsukulan din is Nengazen, kes Waǥas he Megbevayà te Israel. 30 Umbe, ebpematey is menge vetan-en din he menge maama ziyà te menge zalan, ragkes en is langun he menge sundaru zin.

31 “Siak, is Nengazen he MEGBEVAYÀ he Mekeǥeǥehem, migkaǥi a te, ‘Kuntada ku sikew he Babilonia he mepelevawen! Neume en is timpu te kedsiluti ku kenikew. 32 Sikew is gelbuwen he nasyun utew ka egkezeeti, ne wazà ebpekeuǥup te ked-enew kenikew. Ebinsulan ku is dezekelà he menge inged nu wey is malù dezekelà diyà te peliǥuy kayi.’ ”

33 Migkaǥi pa is Nengazen he Mekeǥeǥehem te, “Midaagdaag is menge etew ziyà te Israel wey Juda. Mibihag wey mibpurungan sikandan bentayi wey kenè en meveǥayi te vayàbayà. 34 Piru gehemanen a, is Menluluwas dan; Nengazen he Mekeǥeǥehem is ngazan ku. Edlevanan ku sikandan wey meveǥayi te kelinew wey kebpekehimeley is kelibutan, piru egurigawen ku mulà is menge meǥinged diyà te Babilonia.

35 “Siak, is Nengazen, migkaǥi a he ebpeǥezaman ku te menge etew ziyà te Babilonia is ispada te kezeetan, te menge upisyal zin, wey uluwanen he menge etew! 36 Ibpeǥezaman daan heini te teruen he menge ebpeneuven, ne ebuneǥen sikandan. Wey ziyà daan te menge sundaru zan, ne egkengeheratan dan utew! 37 Heini is ispada ibpeǥezaman daan te menge kudè din wey menge kerwahi, wey ziyà te langun he ebpuun te zuma he lugar he kezapig din. Ne edluyahan sikandan iring te vahi! Egkeulaula zaan heini ziyà te menge ketiǥeyunan din, ne ed-eǥawen heini. 38 Ne egkemezahan is langun he menge wahig din. Su is Babilonia lugar he mahabet is menge ed-ezapen duen ne netazin is isip te menge etew kayi te mekeharatharat he menge ed-ezapen.

39 “Ed-ubpaan dà is Babilonia te leew he menge langgam, dumezaas he menge langgam he henduen be te menge asu wey te menge ekang. Ne kenè en ed-uman ed-ubpà is menge etew zutun taman te taman. 40 Iring te midezeetan ku zengan is Sodom wey Gomora, wey is menge inged diyà te peliǥuy kayi, edezeetan ku zaan is Babilonia. Wazè en ed-ubpà dutun. Iyan a, is Nengazen, is migkaǥi kayi.

41 “Tengteng kew! Duen menge sundaru he ebpekeuma he ebpemuun diyà te tanà he zizaya. Sevaha he mekeǥeǥehem he nasyun ne mahabet he menge hadì he ebpuun diyà te meziyù he lugar is nengandam te kebpekidtebek te Babilonia. 42 Neǥumeenan sikandan te menge panà wey menge vangkew. Mesipala sikandan ne wazè dan hizu. Emun ed-untud sikandan te menge kudè dan ne iring is keǥurub dan te keǥurub te dezekelà he menge vaǥel ziyà te zaǥat. Ebpekeuma sikandan is andam en he edsurung keniyu te menge meǥinged diyà te Babilonia. 43 Egkezineg heini te hadì te Babilonia ne egkeewaan sikandin te zesen. Handek wey kesakit te gehinawa is egkeǥezam din egkeiring is kegkerasey zin te kegkerasey te vahi he ebeliliten.

44 “Edtik-ew a edsurung diyà te Babilonia he iring a te erimaung he ebpuun te ketelunan diyà te Jordan he edhendiyà te menge kerehidu ziyà te penebtavà. Edsegseǥen ku sikandan ne iyan ku ibpezumala te Babilonia is etew he mibpilì ku. Hentei is iring kediey? Hentei is ebpeǥaruǥaru he edsukul kediey? Hentei is pengulu he ebpekigkuntada kedì? 45 Umbe, pemineǥa niw is mibpelenuwan ku te ebaal he idezaat te Babilonia. Minsan is menge anak dan ne ebihaǥen, ne is menge tanè dan edezeetan tenged te mezaat he mibeelan dan. 46 Tenged te utew subra he kegkezeeti te Babilonia egkeenluwag is tanà, ne is erang dan ebpekeuma is kegkezineǥa zuen diyà te zuma he menge nasyun.”