1 Hein minatey en si Moises is suluǥuen te Nengazen, ne migkaǥi is Nengazen diyà te timbang ni Moises he si Josue he anak ni Nun te, 2 “Minatey en is suluǥuen ku he si Moises. Umbe sikew wey is langun he menge Israilihanen, pengendami niw is kedlayun niw te Wahig he Jordan pehendiyà te tanà he ibeǥey ku keniyu. 3 Sumalà is impenaad ku ziyà te ki Moises, ne ibeǥey ku keniyu is langun he tanà he egkeumahan niw. 4 Iyan heini egkehimu he tanè niw: ebpuun diyà te sibsivayan is dapit te zivavà pehendiyà te menge vuvungan diyà te Lebanon he zapit te zizaya, wey puun te zekelà he Wahig he Eufrates is dapit te edsilaan, ne taman te Zaǥat he Mediteraneo is diyà dapit te edsenlepan, wey taman te tanà te menge Hitihanen.

5 “Wazà ebpekezaag kenikew mintras uuyag ke pa. Su ebpekiduma a kenikew iring te kebpekiduma ku ki Moises. Kenè ku sikew ed-ewaan wey ebpesegdanen. 6 Mebpekelig-en ka wey mebpekevurut ka, su iyan ka ebpengulu kayi te menge etew te ked-angken duen te tanà he impenaad ku ziyà te menge kepuun dan. 7 Basta mebpekelig-en ka wey mebpekevurut ka utew. Purungi nu sunuza is langun he kesuǥuan he imbeǥey kenikew ni Moises te suluǥuen ku. Kenè nu heini engkezi, su para medlampus ka te langun he ebeelan nu. 8 Kenè nu lipati te ebasa is Libru te Kesuǥuan. Ne purungi nu ngunngunua maandew wey mezukilem su para metueni nu ke ebmenmenuwen te edtuman is langun he ingkesurat kayi. Su pinaaǥi kayi ebmeuswaǥen ka wey ebmelempusen. 9 Tentenuzi nu heini is insuǥù ku kenikew: ‘Mebpekelig-en ka wey mebpekevurut ka. Kenè ka mahandek wey luyahi, su siak, is Nengazen he Megbevayè nu, eduma a kenikew minsan hendei ka ebpevayà.’ ”

10 Umbe, mibmenduan ni Josue sikan is ebpemendumala te Israel te, 11 “Liǥuya niw is kampu ne keǥiyi niw is menge etew he teǥenaha zan is menge egkekaan dan, su tetelu he andew puun guntaan ne edlayun kiw en te Wahig he Jordan te ked-angken duen te tanà he imbeǥey kenitew te Nengazen he Megbevayè tew.”

12 Ne migkeǥiyan ni Josue is tribu ni Reuben, ni Gad, wey is ketengà he tribu ni Manase te, 13 “Tentenuzi niw is migkaǥi keniyu ni Moises te suluǥuen te Nengazen. Migkaǥi sikandin te ebeǥayan kew te Nengazen he Megbevayè niw te tanà he zutun kew ebpekehimeley. Ne iyan heini he tanà imbeǥey zin keniyu: 14 Is menge esawa niw, wey is menge anak niw ne mebpetaǥak dà kayi te tanà he zapit te edsilaan he vahin te tanà kayi te Jordan duma te menge uyaǥen niw. Piru is menge sundaru niw kinahanglan he edhuna sikandan edlayun te ked-uǥup te menge suled niw, 15 taman te egkaangken dan en is tanà he egkehimelayan dan he imbeǥey te Nengazen iring te naangken niw en. Ne emun egkeulaula en heini, ne egkehimu en he ebpekehulenè kew te ked-angken te tanà kayi te Jordan he zapit te edsilaan he imbeǥey keniyu ni Moises te suluǥuen te Megbevayà.”

16 Ne midtavak dan si Josue te, “Ebeelan dey is langun he migkaǥi nu, ne edhendiyè key te minsan hendei he ebpeveyaan nu kenami. 17 Edsunud key kenikew iring te kedsunud dey ki Moises, su ebpekiduma kenikew is Nengazen he Megbevayè nu iring te kebpekiduma zin ki Moises. 18 Edhimetayan is minsan hentei he edsupak kenikew wey kenà edtuman te mandù nu. Mebpekelig-en ke zà wey mebpekevurut!”