1 Midsuǥù te Nengazen si Moises 2 he keǥiya zin heini ziyà te menge Israilihanen:

Emun is sevaha he etew inhalad diyà te Nengazen su ingkepenaad he idhalad, heeyan he penaad 3-7 emun ebeyazan is bali zin te ziyà ibasi is keveǥat din te timbangan he egemiten te menge memumuhat:

8 Emun pubri is nekepenaad ne kenà sikandin ebpekevaug he ebayad dutun he kentidad, ne uwita zin diyà te memumuhat sikan is etew he impenaad din he idhalad din diyà te Nengazen, ne iyan egkaǥi haazà is memumuhat te vali he egkevaug dutun te etew te ebayad.

9 Emun iyan impenaad din is uyaǥen he egkehimu he ibpemuhat diyà te Nengazen, heeyan he uyaǥen egkehimu en he gaked te Nengazen. 10 Kinahanglan he kenè din en heini liwai te selakew en he uyaǥen, minsan pa ke edhuna he meupiya is idliwà etawa edliwaan. Emun ebeelan din heini ne sikan is uyaǥen he impenaad din wey sikan is uyaǥen he idliwè din ne pudu egkehimu he ǥaked te Nengazen. 11 Emun iyan impenaad din is meremerik he uyaǥen he kenà egkehimu he ibpemuhat diyà te Nengazen, ne uwita zin diyà te memumuhat haazà is uyaǥen. 12 Ne edsusiyen heini zutun te memumuhat ke meupiya ve wey ke kenà, ne ebeliyan din heini te vali he kenè en egkahalinhalin. 13 Emun edhewien dutun te teǥiǥaked haazà is uyaǥen kinahanglan he ebeyazan din haazà is prisyu te uyaǥen ne umani zin pa te 20 pursintu is bali kayi.

14 Emun inhalad te etew is baley zin diyà te Nengazen, ne edsusiyen te memumuhat haazà is baley ke meupiya pe be wey ke kenè en, ne ebeliyan din heini te vali he kenè en egkahalinhalin. 15 Emun edhewien te teǥiǥaked haazà is baley, kinahanglan he ebeyazan din is prisyu zutun te valey ne umani zin pa te 20 pursintu is bali kayi. Ne idlikù diyà te kandin haazà is baley.

16 Emun inhalad te etew ziyà te Nengazen is bahin te tanè din he nepengevilin din puun te menge kepuun din, ebeliyan heini te memumuhat te vali he ibpesikad te kezekelà te venì he igkepemula zutun te tanà: is kada egkepemulaan te liwazà te saku he venì ne iyan bali zin is 20 he vuuk he pelata. 17 Emun inhalad din is bevesukè din dutun te sikan pa meipus is Tuig te Kebeǥey te Bayàbayà wey Ked-ulì, is bali kayi ne iyan ded. 18 Iyan emun neuǥet en is kegkeliwas dutun he tuig ne human din heini ihalad, ebeliyan heini te memumuhat te vali he mevavà dutun, sumalà te kahabet te menge tuig he nesamà he egkeume en maan is Tuig te Kebeǥey te Bayàbayà wey Ked-ulì. 19 Emun edhewien te teǥiǥaked haazà is bevesukè din, kinahanglan he ebeyazan din is bali kayi te vevesukà ne umani zin pa te 20 pursintu haazà is bali kayi. Ne id-uli diyà te kandin haazà is bevesukà. 20 Iyan, emun ibelegyè din haazà is bevesukà dutun te wazè din pa melekat, ne kenè din en haazà egkahawì. 21 Ne emun egkeume en maan is Tuig te Kebeǥey te Bayàbayà wey Ked-ulì, ne ǥaked en heini te Nengazen ne kenè en heini egkahawì, egkehimu en heini he azen te menge memumuhat.

22 Emun inhalad te etew is bevesukà he nepemasa zin, 23 ne ebeliyan heini te memumuhat te vali he ibasi ziyà te kahabet te menge tuig he human egkeuma is Tuig te Kebeǥey te Bayàbayà wey Ked-ulì. Kinahanglan he segugunà heini edlekata. Is bayad he idlekat din kayi gaked en te Nengazen. 24 Dutun he Tuig te Kebeǥey te Bayàbayà wey Ked-ulì, haazà he tanà id-ulì diyà te teǥiǥaked he mibelegyà duen.

25 Is langun he prisyu te menge inhalad diyà te Nengazen kinahanglan he ziyà ibpesikad te keveǥat te pelata ziyà te timbangan he egemiten te menge memumuhat.

26 Is egkehuna he anak te uyaǥen ne ǥaked te Nengazen, umbe kenè en heini kinahanglan he idhalad diyà te kandin su zaan he kandin. 27 Emun meremerik haazà he uyaǥen, ne egkehimu he edlekaten te teǥiǥaked. Beyazi zin is bali zutun te uyaǥen ne umani zin pa haazà is bali zin te 20 pursintu. Ne emun kenè din heini edlekaten ne ibelegyà heini te menge memumuhat sumalà te imbali kayi.

28 Kenà egkehimu he ibelegyà etawa edlekaten is minsan hengkey he azen he kenè en duwazuwa is kedhelaza zuen diyà te Nengazen, etew man etawa uyaǥen etawa tanà he nepengevilin. Gaked en heini he Nengazen. 29 Is etew he kenà duwazuwa is kedhelaza zuen diyà te Nengazen kenà egkehimu he edhewien. Kinahanglan heini he edhimetayan.

30 Is ikesepulù he vahin te langun he menge sebpet, ne ǥaked te Nengazen 31 emun edhewien te etew is ikesepulù he vahin te sebpet, kinahanglan he ebeyazan din is bali kayi ne umani zin pa haazà is bali te 20 pursintu. 32 Emun ebilang kew te vaka niw, kerehidu niw, etawa kambing niw, is ikesepulù kayi iveǥey niw ziyà te Nengazen. 33 Kinahanglan he kenè niw heini pilia etawa liwai. Emun edliwaan niw heini, ne haazà is uyaǥen he edliwaan niw wey haazà is idliwè niw, ne pudu egkehimu he ǥaked te Nengazen ne kenè en heini egkehimu he edhewien.

34 Iyan heeyan menge suǥù he imbeǥey te Nengazen ki Moises diyà te Buntud he Sinai he para te menge Israilihanen.