Menge Erubasa
1
Is Ketuyuan te menge Erubasa
Iyan heini sikan is menge erubasa ni Solomon he anak ni David te hadì diyà te Israel.
Heini he menge erubasa, ebpekeveǥey te ketau wey ebpekemansu kenikew, ne egkesavut nu is mezalem he menge lalag he ebpekeveǥey te ketau. Ebpekemansu heini kenikew para mehimu ka he uluwanen, he ebpengungubpaan te hustu, metazeng, wey mezait he menge ulaula. Ebpkeveǥey heini te ketau te wazè din ketau, wey ebpekeveǥey heini te keuluwanen te menge vetan-en te ked-isip-isip ke hengkey is hustu. Pinaaǥi te kebpemineg kayi, ne egkeumanan pa is ketau te menge uluwanen wey egkegiyahan is duen din menge netuenan, su wey zan mesavut is ibpesavut te menge erubasa, menge sempità, wey menge peentukà te menge metau.
Is kedtahud te Nengazen iyan ebpuunan te hustu he ketau, piru is tulebung he etew kenè din egkesuatan is hustu he ketau, ne kenè din daan egkesuatan he metulid is mezaat he vetasan din.
Is menge Sambag emun duen Lalung he menge Etew
Mama, pemineǥa nu is sambag ku ne kenè nu iniyuǥi is penurù te ǥinikanan nu. Is penurù dey ebpekeveǥey kenikew te meupiya he vetasan iring te kuruna he menge vulak etawa velieg he ebpekeveǥey kenikew te mekempet he kedezagwey wey zengeg.
10 Mama, kenè ka peuwit te menge mekesesalà. 11 Emun ke sikandan te, “Duma ka kenami su ed-ayan kiw, ne edhimetayan tew is edsaǥad minsan pa te wazà mekesalà. 12 Is edsanggar ziyà te kenitew ne kenè tew en edsemaan te ǥehinawa. 13 Su emun egkepatey tew sikandan egkaangken tew is mahal he menge azen dan su wey mepenù is menge valey tew te menge azen he tinakew. 14 Duma ka kenami ne emun egketiǥayun kiw en, ne ebehinen tew is tinakew tew.”
15 Mama, kenè ka zuma te menge etew he iring dutun, kekenà, likayi nu sikandan. 16 Su utew sikandan meǥaan he ebaal te mezaat wey ebunù te etew. 17 Wazà pulus te penuǥes te tagbis emun netuenan en dutun te menge tagbis he edtuǥesen nu sikandan. 18 Ne iring kayi is tulebung he menge etew: ne iring dà te iyan dan edhimatey te lawa zan etawa iring dà te iyan dan ed-eyanan is keugelingen dan. 19 Iyan heini egkehitavù te menge etew he mid-angken te ketiǥeyunan pinaaǥi te mezaat he paaǥi. Haazà is paaǥi, iyan kes dalan pehendiyà te kemetayen.
Is Rimeǥas te Kedselikwey te Ketau
20-21 Is ketau, iring te sevaha he etew he edwali te mezaǥing diyà te menge zalan, menge pelasa, menge mirkadu, wey ziyà te menge pultahan te menge inged. Ke sikandin te,
22 “Sikiyu is menge wazè din hanew, taman te taman en be he iring kew keniyan?
Sikiyu is menge mesudì, taman te taman en be is kegkelipey niw te kedsudì?
Sikiyu is menge tulebung, taman te taman en be he kenè kew egkesuat he mebmetau?
23 Mebpezumazuma kew te kedawey ku keniyu.
Guntaan, egkeǥiyen ku keniyu is egkeisip ku;
ibpetuenan ku keniyu is egkeǥiyen ku keniyu.
24 Tenged te kenè kew ebpezumazuma te ked-umew ku wey kenà a keniyu edseǥipaan,
25 ne tenged te mibey-anan niw is menge sambag ku wey kenè kew egkesuat he ebpepenurù,
26-27 bà ku zà sikiyu ed-engiti emun ebpekebmereǥen kew;
bà ku zà sikiyu ed-un-undaha zutun te kemereǥenan wey mekahandekhandek he egkeulaula niw he iring te eribpures.
28 Ne ed-umawen a keniyu, iyan, kenà ad edtavak;
ebpen-ahaan a keniyu, iyan, kenà a keniyu egketuredu.
29 Su geina te kenè kew egkesuat he ebpenuruen wey wazè niw kedtahud te Nengazen.
30 Wazè niw seǥipaa is menge sambag ku wey wazè niw itetenged is kedawey ku keniyu,
31 ne egkeraǥun niw is mezaat he menge beǥas te vaal niw, wey is menge mezaat he pelanu niw.
32 Su is kewewalì te etew he wazè din hustu he ketau iyan ibpatey zin,
ne is kebpeeyehey te tulebung iyan ebpekezezaat kandin.
33 Iyan, is ebpemineg kedì, dezeyaan is kebpekesavuk din.
Ne kenà sikandin egkehandek he egkekeizan.”