1 Is etew he kenà ebpezumazuma minsan layun en edewaya, ne iyan egkepengkusan din is egkerumpak sikandin diyà te kezeetan ne wazè en paaǥi wey meǥaud sikandin dutun.

2 Emun metazeng is pengulu, egkelipey is menge etew, iyan, emun lalung is egkehimu he pengulu, egkengeseeng is menge etew.

3 Is etew he zekelà is suat din he mebmetau ebpekeveǥey te kelipey ziyà te amey zin.

Is etew he ebpengumpadi te vahi he ebelegyà te zengeg din, ne edhelhelasen din is ketiǥeyunan din.

4 Emun iyan igkeseeng te hadì is ked-ikul te hustu he kukuman, egkelig-enan is ginhedian din, puru emun ebpeheheramham sikandin su egkesuat he edsipsipan, ne edezeetan din is ginhedian din.

5 Is etew he edigdiǥen din is duma zin, ne iring te ebaal te lelevù su wey meuney melelevù sikandin.

6 Is lalung he etew egkelitag te keugelingen din he salà, iyan, is etew he metazeng, ne egkanta te kegkelipey zin.

7 Is etew he metazeng midlevanan din is ketenged te menge pubri. Kenà heini egkesavut te etew he lalung.

8 Is menge etew he sumpalit iyan edretem te kesamuk te sevaha he inged, iyan, ebmelinew mulà is inged pinaaǥi te etew he uluwanen.

9 Wazà egkepeveyaan emun ebpeked-etuvang diyà te hukmanan is uluwanen he etew wey is tulebung, ne wazà kelinew zutun su haazà is tulebung ebpelelanget wey ebpemenulà.

10 Is etew he utew egkesuat he ebunù, ne minsan is etew he ebpeninidtuwan edumutan din, ne edtinguhaan din te edhimatey.

11 Is etew he tulebung kenè din egkeeǥen is pauk din, iyan, is etew he uluwanen egkeeǥen din mulà is kandin he pauk.

12 Emun ebpemineg is pengulu te tarù he menge tudtul, ne egkehimu he lalung is langun he menge upisyal zin.

13 Is pubri wey is ebpendaagdaag kandin neked-iiring dà su imbeǥey zà te Nengazen is mata zan.*He ke và dà egkeǥiya, pudu zan is dezuwa, midlimbag te Nengazen.

14 Emun metazeng is kukuman te sevaha he hadì diyà te menge pubri, epedayun is kedumala zin wey egkelig-enan heini.

15 Is kebmensuwa te vatà pinaaǥi te kedlegkuta kandin, ebpekepenurù kandin ne egkehimu he uluwanen, iyan, emun pinesagdan is batà, egkepeel-elezan din is iney zin.

16 Emun lalung is ebpemendumala, ne ed-uswag daan is ked-ulaula te salà. Piru heini sikandan egkezeetan, ne egkemetmetahan heini te menge metazeng.

17 Mensuwa nu is anak nu, ne ebpekeveǥey sikandin kenikew te kelinew te ǥehinawa wey kelipey.

18 Emun wazà lalag te Megbevayà he ebpenurù te sevaha he inged, wazà kayi kegkelinew. Utew zeyzey is menge etew he edtuman te menge ibpenurù te Megbevayà.

19 Duen suluǥuen he kenà egkesuat he ebpenuruen pinaaǥi te kegkeǥiyi nu kandin, su minsan ebpekesavut ne kenè ke zin ebpemineǥen.

20 Deyzey pa is egkepengkusan te tulebung he etew, kenà te etew he ebpengaǥi te wazà pulus.

21 Emun ibpaangè nu is suluǥuen nu puun pa te kengunguhezi zin, iyan egkepengkusan is ebpekeveǥey sikandin te seeng kenikew.

22 Is etew he melemu he egkepauk, ebpeketuvù te kesevaan, ne layun dà ebpekehimu te salà.

23 Tenged te kebpelavew te etew, ebminus is pid-etawan din; iyan, tenged te kenè din kebpelavew, edtehuzen wey edeliǥen sikandin.

24 Is etew he kumpeniya te tekawen, iyan ebpekezezaat te keugelingen din. Minsan ibpepenangdù pa sikandin he iketug-an din ke hentei is duma zin, ne kenà sikandin edtug-an.

25 Is kegkahandek, ebpekezezaat te etew; iyan, ke edsarig ki zà te Nengazen, ne wazè ta igkemenu.

26 Mahabet is edsarig te hukum te pengulu, iyan, Nengazen dà is ebpekeveǥey te hustu he kukuman.

27 Is menge metazeng egkeepesan dan is menge lalung, ne is menge lalung egkeepesan dan daan is menge metazeng.