1 Kentahi niw he melipayen kew is Megbevayà he iyan mibeǥey kenitew te zesen.

Ugyab kew ziyà te etuvangan te Megbevayà ni Jacob!

2 Puuni niw is kegkanta;

ipezaǥing niw is tamburin,

tukara niw is utew meupiya he ebpemineǥen he menge instrumintu he zuen dan menge kuwirdas.

3 Ipezaǥing niw is budyung te kedsilibra te Pista te Kebpuun te Hayag wey zuen te pista he ebeelan tew emun tuker.

4 Su iyan heini sulunuzen te menge tig-Israel.

Su suǥù heini te Megbevayà ni Jacob.

5 Impenurù din heini he penurù te menge kevuwazan ni Jose hein midsurung din is Ehipto.

Nekezineg a te laǥeng he wazè ku mekilala he edhenduen te,

6 “Impelingkawas ku sikiyu te kegkeuripena keniyu;

in-awè ku is menge meveǥat he uwiten niw.

7 Hein egkereǥenan kew mid-umew a keniyu ne midlibri ku sikiyu.

Ne ziyà te mid-elesan ku he kivel midtavak ku is umew niw.

Ne migezaman ku sikiyu ziyà te serebseb te Meriba.

8 Sikiyu is menge etew ku he menge tig-Israel, pemineǥa niw is petizaan ku keniyu.

Deyzey pezem ke ebpemineǥen a keniyu!

9 Kinahanglan he liyu kedì, kenè kew med-azap te zuma;

kenè niw ezapa is tarù he menge Megbevayà.

10 Iyan a kes Nengazen he iyan Megbevayè niw he iyan kes mibpeǥawas keniyu ziyà te Ehipto.

Buyù kew kayi te kediey ne ebeǥayan ku sikiyu te menge kinahanglan niw.

11 Piru sikiyu is menge Israilihanen he menge etew ku, wazè kew mebpemineg wey mebpezumazuma kedì.

12 Umbe, mibpesagdan ku sikiyu te kebmesinupaken niw, ne mibeelan niw is egkesuatan niw.

13 Emun pezem ebpemineg kew kedì wey edtumanen niw is menge paaǥi ku,

14 ne diritsu ku zà edsiluti wey edaaǥa is menge kuntada niw.

15 Is menge edumut kediey, ne ebpekeluhud kedì su egkahandek.

Ne wazà pidtemanan te silut dan.

16 Iyan, sikiyu mulà is menge etew ku, ibpekaan ku sikiyu. Edhentayen ku sikiyu te utew meupiya he trigu wey teneb.”