1 Nengazen, layun ku egkentaha is dekelà he ǥaǥew nu.

Ne taman te taman is kedtudtula ku te kebmetinumanen nu.

2 Idsangyew ku he utew melig-en is gaǥew nu he wazè din pidtemanan, ne iring te langit he kenà egkaawà.

3 Migkaǥi ka te, “Midhimu ku is kebpekid-uyun ku te suluǥuen ku he si David, he mibpilì ku he egkehimu he hadì.

Ne iyan heini impesarig ku kandin:

4 Is kada egkehimu he hadì te Israel ne ebpuun te menge kevuwazan nu taman te taman;

is ginhedian nu ebpedayun te wazà pidtemanan.”

5 Nengazen, is menge ilengiten he linimbag edalig te egkein-inuwan he menge vaal nu wey te kebmetinumanen nu.

6 Wazà minsan sevaha ziyà te langit he iring kenikew, Nengazen.

Wazà ilengiten he linimbag he igkepetug-iring kenikew.

7 Edtehuzan ka ziyà te menge ketiǥuman te ilengiten he menge linimbag.

Is langun he edliǥuy kenikew ne zuen dan kegkahandek kenikew.

8 Nengazen he Megbevayà he Mekeǥeǥehem, wazà minsan hentei he iring kenikew;

mekeǥeǥehem ka wey metinumanen diyà te langun he ebeelan nu.

9 Edumelahan nu pinaaǥi te ǥehem nu is ebpemaǥel he zaǥat;

ibpeengked nu is dezekelà he vaǥel zin.

10 Midezeetan nu is dekelà he langgam he si Rahab ne mibpatey heini.

Impedsusuwey nu is menge kuntada nu pinaaǥi te ǥehem nu.

11 Kenikew is langit wey is kelibutan;

mibeelan nu is kelibutan wey is langun he netaǥù kayi.

12 Mibeelan nu is dizaya wey is divavà.

Is Buntud he Tabor wey is Buntud he Hermon iring heini is dezuwa te menge etew he egkanta te kegkelipey tenged kenikew.

13 Mekeǥeǥehem ka! Utew subra is desen nu!

14 Is kedhadì nu egkezumahan te ketazeng wey hustu he kukuman,

wey egkezumahan daan te ǥaǥew wey kebmetinumanen.

15 Nengazen, utew zeyzey is menge etew he nemekesaǥad te melipayen he ked-ugyab tenged kenikew,

wey nengungubpaan tenged te hizu nu.

16 Tenged te keupiya nu kandan, layun sikandan egkelipey.

Ne edeliǥen dan is ketazeng nu.

17 Ebpekezantal key tenged te zesen he imbeǥey nu kenami;

ne tenged te keupiya nu kenami ed-umanan nu is egkehimu zey.

18 Nengazen, Waǥas he Megbevayà te Israel,

gaked nu is hadì dey he iyan kelasag dey.

19 Dengan nekidlalag ka te metinumanen he menge suluǥuen nu pinaaǥi te kebpelawas nu kandan.

Ke sikew te, “Midtevangan ku is sevaha he sundaru.

Mid-aram ku sikandin puun te menge etew ku su para mehimu he hadì.

20 Si David he suluǥuen ku, iyan mibpilì ku he hadì

pinaaǥi te kedlenahi kandin te segradu he lana ku.

21 Is gehem ku eduma kandin wey edlig-en kandin.

22 Kenà sikandin egkelupiglupig te menge kuntada zin;

ne kenà sikandin egkezaagdaag te menge lalung.

23 Ebekbeken ku ziyà te etuvangan din is menge kuntada zin taman te ebpemematey sikandan.

24 Ebmahalen ku sikandin wey ebpekid-uunungen a kandin.

Ne ed-umanan ku is egkehimu zin pinaaǥi te ǥehem ku.

25 Ibpeiseg ku is keluag te ginhedian din su edhimuwen ku he puun dà te Daǥat he Mediteraneo ne taman en te Wahig he Eufrates.

26 Egkaǥi sikandin kayi te kediey te, ‘Iyan ka amey ku wey Megbevayè ku;

iyan ka endilungè ku wey menluluwas ku.’

27 Ed-isipen ku sikandin he kinekekayan he anak ku,

iyan sikandin lavew te langun he menge hadì.

28 Ebpedayun is kebmahala ku kandin te wazà pidtemanan,

ne kenà egkaawà taman te taman is kebpekid-uyun ku kandin.

29 Is kada hadì te Israel ne ziyà ebpuun te menge kevuwazan din taman te taman.

Ne iring te langit is ginhedian din su kenà egkaawà.

30-31 Iyan, emun kenà edtuman is menge kevuwazan din te menge kesuǥuan ku, menge sulunuzen ku, wey menge penurù ku,

32 edletiguwen ku sikandan te mesakit tenged te menge salè dan.

33 Piru ebmahalen ku wey ed-unungan ku ǥihapun si David.

34 Edtumanen ku is kebpekid-uyun ku kandin,

wey is impesarig ku kandin.

35 Pinaaǥi te waǥas he ngazan ku nenangdù a ziyà te ki David,

ne kenà duwazuwa he edtumanen ku is insaad ku kandin su kenè e man teruen.

36 Is kada hadì te Israel ne ziyà ebpuun te menge kevuwazan din taman te taman.

Is ginhedian din iring te andew he kenà egkaawà diyà te etuvangan ku.

37 Ebpedayun heini taman te taman su iring heini te vulan he egkeseriǥan he tistiǥus diyà te langit.”

38 Piru, Nengazen, nepeukan nu is pinilì nu he hadì;

mid-iniyuǥan nu sikandin wey mid-engkezan nu.

39 Wazè nu leusa te edtuman is kebpekid-uyun nu kandin te suluǥuen nu,

ne in-awè nu is gehem te hadì diyà te kandin.

40 Midlempag nu is menge verengbeng te inged din wey migevè nu is menge kutà kayi.

41 Is menge azen dutun te inged din ne mibpenguwa te menge sumeseǥazà.

Mibpeel-elezan sikandin te kesikbit din he menge nasyun.

42 Mibeǥayan nu te zesen is menge kuntada zin;

midlipey nu sikandan is langun.

43 Midhimu nu he wazà pulus te menge ǥumaan din,

ne midhimu nu he mezaag sikandin te tebek.

44 In-awè nu ziyà te kandin is kegkemekeǥeǥehem wey is gehem te hadì.

45 Henduen be te midtik-ew zà sikandin mebmeǥurang;

ne mibpeel-elezan nu sikandin.

46 Sengemenu keluǥayad is ked-eles nu Nengazen?

Taman en be te wazà pidtemanan?

Sengemenu keluǥayad is pauk nu he henduen be te hapuy?

47 Tentenuzi nu Nengazen, he mevavè dà is untung te etew;

tentenuzi nu he midhimu nu is etew he zuen din kemetayen.

48 Hentei is etew he kenà ebpatey?

Ebpekelikey ve is etew te kemetayen?

49 Nengazen, hendei en is gaǥew nu he iring duen te nehuna, he insaad nu ziyà te ki David dengan tenged te kebmetinumanen nu?

50 Tentenuzi nu, Nengazen, he mibpeel-elezan te menge etew ziyà te mezakel he menge nasyun is menge suluǥuen nu,

ne ed-entusen ku heini.

51 Iyan, is menge kuntada nu, Nengazen, edsudì te pinilì nu he hadì minsan hendei sikandin ebayà.

52 Dait he edeliǥen is Nengazen te wazà pidtemanan! Amen! Amen!