1 Egkeuma is andew he edhukum is Nengazen. Ebevehinen te menge kuntada niw is menge azen niw te menge tig-Jerusalem he mid-aǥew zan, ne ebpeketetengteng kew. 2 Su edtiǥumen te Nengazen is menge etew ziyà te langun he menge nasyun su wey zan mekepekidtebek diyà te Jerusalem. Ed-eǥawen dan heini he inged, egkuwaan dan is menge azen diyà te menge valey, ne edleyuǥen dan is menge vahi. Ed-uwiten dan diyà te zuma he lugar is ketengà te menge meǥinged keniyan he inged. Piru is duma, egkesamà keniyan te inged. 3 Ne edtebeken te Nengazen haazà is menge etew ziyà te menge nasyun, iring te kebpekidtebek din dengan. 4 Dutun he andew, edhitindeg sikandin diyà te Buvungan te menge Olibo, he ziyà te zapit te edsilaan te Jerusalem. Egketevì heini he vuvungan ne egkeliwazà puun te edsilaan pehendiyà te edsenlepan. Is liwazà dutun te vuvungan ne ebpekeendud pehendiyà te zizaya ne is sevaha pa he liwazà, ne ebpekeendud pehendiyà te divavà. Umbe egkehimu he meluag he suǥud is diyà te teliwazà kayi. 5 Ne ebpemelaǥuy kew he ebayà kayi he suǥud, su taman man te Azel is egkeuma kayi. Ebpemelaǥuy kew iring te mibeelan te menge kepuun niw hein midlinug dutun te timpu ni Hadì Uzia he hadì te Juda. Ne ebpekeuma is Nengazen he Megbevayè ku duma te langun he menge velinsuǥuen din. 6 Dutun he andew wazà meinit wey meǥenew. 7 Nekeviza haazà he timpu su wazè mezukilem, kekenà, pudu zà maandew. Iyan dà is Nengazen netau ke keenu heini egkehitavù.

8 Dutun he andew edtudà is utew meupiya he wahig puun te Jerusalem. Is ketengà kayi edtudà pehendiyà te Daǥat he Minatey ne is ketengà ne ebpehendiyà te Daǥat he Mediteraneo. Ebpedayun is kedtudà kayi ke ǥulavung wey tipenguzan. 9 Iyan is Nengazen egkehimu he hadì te tivuuk he kelibutan. Iyan dà sikandin egkilelaan he Megbevayà ne wazè en duma.

10-11 Egkehimu he suǥud is tivuuk he tanà puun te Geba ziyà te zizaya pehendiyà te Rimon diyà te zivavà te Jerusalem. Piru ebmetikang is Jerusalem diyà te nepelestaran din, ne ed-ubpaan heini puun te pultahan ni Benjamin pehendiyà te nepelestaran te Kezaan he Pultahan, ne pehendiyè en te Pultahan diyà te Suyuk; wey puun te Turi ni Hananel pehendiyà te keresà te paras te hadì. Kenè en ed-umanen edezeeti is Jerusalem, ne is menge meǥinged kayi ebpengungubpaan en he wazà ebpekezezaat kandan.

12 Iyan heini kezeetan he ibpaaǥi te Nengazen diyà te langun he menge nasyun he nekidtebek diyà te Jerusalem: Megkeredak is menge lawa, mata, wey zilè dan minsan uuyag pa sikandan. 13-15 Iring daan kayi he kezeetan is ed-aǥi ziyà te menge uyaǥen dan diyà te menge kampu zan ragkes en is menge kudà, menge mulà, menge kemilyu, wey menge asnu.

Dutun he andew edterenteduwen te Nengazen heeyan he menge etew, ne is kada sevaha kandan ebpekidtebek te iring din he etew. Minsan is menge etew ziyà te zuma he menge inged diyà te Juda ne ebpekidtebek para te Jerusalem. Edtiǥumen dan is menge ketiǥeyunan te langun he menge nasyun diyà te peliǥuy zan: is utew mahabet he menge vulawan, menge pelata, wey menge visti.

16 Is langun he egkesamà diyà te menge nasyun he nenurung te Jerusalem edtekezeg diyà te Jerusalem kada tuig su ed-ezapen dan is Nengazen he Mekeǥeǥehem he iyan hadì, wey edsilibra sikandan te Pista te Kebaal te menge Lawig. 17 Is menge etew he kenà edhendiyà te Jerusalem te ked-azap te Nengazen he Mekeǥeǥehem he iyan hadì, kenà ebeǥayan te uzan. 18 Is menge etew ziyà te Ehipto he kenà edhendiyà te Jerusalem, ebpeeǥiyan daan te Nengazen te kezeetan iring te ibpaaǥi zin diyà te menge nasyun he kenà edhendiyà te kedsilibra te Pista te Kebaal te menge Lawig. 19 Iyan heeyan idsilut diyà te Ehipto wey ziyà te langun he menge nasyun emun kenè dan edhendiyà te Jerusalem te kedsilibra te Pista te Kebaal te menge Lawig.

20 Dutun he andew te ked-ezapa te Nengazen te menge etew he ebpemuun diyà te menge nasyun, id-ukir ziyà te menge seriyew te menge kudà is menge lalag he edhenduen te, “Inteǥeley para te Nengazen.” Is menge kuzen diyà te valey te Nengazen egkehimu he iring is kegkesegradu zan te kegkesegradu zuen te yehung he ziyà te pemuhatà. 21 Is kada kuzen diyà te Jerusalem wey te tivuuk he Juda egemiten te menge ebpemuhat he para edlutuan te menge pemuhat he para te Nengazen he Mekeǥeǥehem. Dutun he timpu wazè en menge nigusyanti ziyà te valey te Nengazen he Mekeǥeǥehem.