Seini se Mèpiya Indan Insolat i
Lucas
1
Simolat si Lucas ki Teofilo
Elew Teofilo. Medita den se otaw simolat tepad te neinang dini kenami. Se insolat dan, yan se kagi ingkeliwat te menge otaw ontò kimità te kedita te ininang i Jesus lekat te ketebò niyan, so ontò dan kinità se ininang din, aw ingkeliwat dan heman se kagi din diyà kenami. Elew, nenamay a den mig-iling te kedita niyan, aw yan se doun te mig-aneng-aneng a den te mèpiya aw somolat a heman diyà kamno te kedita te neinang, amon ketegahan no te ontò benal se tapay intoladà diyà kamno.
Impetaga-taga se pegtebaw i Juan Memonyagay
Kedengan, dalem te peglowan i Herod kidoen te probinsya te Judiya, doen sebad pengolo te simbahan te Judiyo ngadan din si Zacarias. Sikandin se sebad pengolo te simbahan sakop te gropo i Abias. Doen esawa din si Elisabet, aw pengolo te simbahan se kemonaan din heman. Sìyan teleesawa, ontò dan nelubahan te Timanem so metòlid se eg-inangen dan. Wedad palos otaw mekesila kandan so ontò dan egtolò te menge punù te Pengolo. Wedad palos batà dan, so wedà pegbatà si Elisabet, aw lokes den, aw temoay den se esawa din.
Dimateng se aldaw te pegpengibing i Zacarias te pegsimba, so migpetibos-tibosay se menge gropo te pengolo. Se ketanem te menge pengolo te simbahan, migbonot dan aw sinu se mawop doton te dakel simbahan amon menonog te metinadeg. Aldaw sìyan, si Zacarias se nepallì. 10 Pegdateng te oras te pegsonog, medita se otaw migtawal-tawal doton te lowà. 11 Peg-awop din amon menonog, doen anghil insogò te Timanem migpekità diyà kandin doton te sonoganan te metinadeg lenged te kowanan. 12 Pegkità i Zacarias kandin, migkebulung se aneng-aneng din aw nelemitan. 13 Meneng minikagi se anghil, “Zacarias, ikà egkelemitan. Nenenalan se Timanem te intawal-tawal nikaw. Doen batà no meama tomebaw diyà te esawa no, aw keilangan ingedanan no sikandin ki Juan. 14 Yan se doun te ontò ka meluba, aw meluba heman se medita doma otaw aw tomebaw sikandin, 15 so ipelangkaw sikandin te Pengolo. Eked palos inem te bino aw pengkey eden se mekelasing. Meneng gayed sikandin egbeyà-beyaan te Espiritu Santo lekat te pegtebaw din. 16 Megtabang sikandin te medita bowad-bowad i Israel amon todà dan tomaking te Pengolo dan Timanem. 17 Mekeonà sikandin diyà te Pengolo amon megpetaga-taga sikandin te kedita te otaw te agpet den domateng se Pengolo. Megtabang se Espiritu Santo kandin iling te pegtabang din te telekeliwat te kagi din si Elias gebii. Pineokit te pegtoladà i Juan, megpèpiyaay se pedowan te menge telebatà. Megtoladà heman sikandin te menge otaw kenà egtolò te Timanem amon meg-inang dan te metòlid. Aw metoman iyan, meketagad den dan te pegdateng te Pengolo.”
18 Mig-insà si Zacarias, “Menonen ko se pegketaga-taga te metoman iyan? Eked besi iyan ketoman, so temoay a den, aw lokes den se esawa ko.”
19 Timaba se anghil, “Siak si Gabriel, aw gayed a ipegsogò te Timanem. Insogò a din dini kamno amon ipetaga-taga ko kamno se mèpiya indan sìyan. 20 Nayan, so wedà ka pemenal te inikagi ko gina diyà kamno, lekat seini meinang ka den bingelen aw omo lamig metoman se kagi ko, so ontò iyan metoman aw domateng se aldaw tapay pinemallì te Timanem.”
21 Nayan, se menge otaw kidoen te lowà te dakel simbahan, migtagad dan pa te peglowà din, aw nepela dan so nenamay sikandin doton didalem. 22 Peglowà din, wedà sikandin pekeikagi, aw netegahan dan te doen migpekità diyà kandin lekat te langit. Meneng gayed sikandin siminyas diyà kandan te belad din, so neomo.
23 Pegkepenga te pegpengibing i Zacarias kidoen te dakel simbahan, minolì sikandin.
24 Penga niyan te wedà kenamay, miglaman se esawa din si Elisabet. Dalem te lima se bolan, gayed sikandin mig-ogpà kidoen te balay. 25 Minikagi sikandin, “Ontò mèpiya se tabang te Pengolo kanak, so neidowan a din. Eked a den lindoi te doma otaw.”
Impetaga-taga se pegtebaw i Jesus
26 Pegdateng te ikeenem se bolan te peglaman i Elisabet, insogò te Timanem se anghil si Gabriel doton te lonsod te Nasarit sakop te probinsya te Galiliya. 27 Doen laga kidoen si Maria. Telesalà dan si Jose sebad bowad-bowad te selotan gebii si David. 28 Dimoton si Gabriel ki Maria aw minikagi, “Doen keluba nikaw. Ontò ka neidowan te Timanem aw gayed ka din eg-ipaten.”
29 Meneng pegdineg i Maria te inikagi te anghil, ontò sikandin migkebulung. Mig-aneng-aneng sikandin aw eden se kedegdagan niyan. 30 Minikagi heman se anghil, “Maria, ikà egkelemitan, so pinemallì ka te Timanem amon tebangan ka din. 31 Meglaman ka, aw tebawan ka te batà meama. Ingedanan no se batà ki Jesus. 32 Melangkaw sikandin, aw doen gulal din Batà te Timanem Melangkaw. Ipelowan sikandin te Timanem iling te peglowan te kemonaan din si David gebii. 33 Lomowan sikandin diyà te kedita te bowad-bowad i Jacob te wedad temanan. Wedad palos temanan te peglowan din.”
34 Minikagi si Maria, “Menonen lay iyan? So wedà a pa lumun layok te meama.”
35 Timaba se anghil, “Domateng se Espiritu Santo kamno, aw ketebangan ka te tolos te Timanem. Yan se doun te menimanem se batà tomebaw kamno, aw sikandin se Batà te Timanem. 36 Nayan, se inayen no si Elisabet, pengkey wedà sikandin pegbatà aw lokes den, meneng miglaman den te enem pa se bolan. 37 Wedad palos eked kebatog te Timanem.”
38 Minikagi si Maria, “Na, gayed a egtolò te Timanem. Mepakay aw meinang diyà kanak se inikagi nikaw.”
Penga niyan, nesayo se anghil.
Limaoy si Maria ki Elisabet
39 Penga niyan te wedà kenamay, nesayo si Maria aw mig-ayas doton te bontod taman te sebad lonsod sakop te probinsya te Judiya. 40 Pegdateng din doton, nenayit te balay te emayen din si Zacarias aw timawal ki Elisabet. 41 Pegdineg i Elisabet te tawal din, miniwal se batà kidoen te getek din, aw dimateng se Espiritu Santo diyà ki Elisabet. 42 Timawal sikandin te dakel se kagi din, “Diyà te kedita te bayi, sikona se binegayan te Timanem te ontò dakel keluba. Begayan din heman te keluba se batà tomebaw diyà kamno. 43 Nepela a so pengkey sikona se inay te Pengolo ko, meneng limaoy ka kanak. 44 Pegdineg ko te kagi no, miniwal se batà kidoen te getek ko tandà te luba din. 45 Doen den keluba nikaw, so nemenal ka te metoman se kagi ingkeliwat diyà kamno lekat te Pengolo.”
Delangan i Maria te pegduyun din te Timanem
46 Penga niyan, minikagi si Maria, “Ipegduyun ko se Pengolo, 47 aw ontò neluba se pedowan ko tandà te Timanem egpelowà kanak, 48 so pengkey ontò a medanà diyà kandin, meneng neeneng-enengan a din. Yan se doun te mikagi se kedita te otaw te binegayan a te Timanem te ontò dakel keluba, 49 so ontò mèpiya se ininang te Timanem metolos diyà kanak. Ontò sikandin metòlid. 50 Lekat te ketebò te keneyonan lamig te temanan, gayed din egkeidowan se kedita te otaw egsagman aw egtolò kandin. 51 Ipetaga-taga din te metolos sikandin pineokit te eg-inangen din. Ipekadas din se menge otaw eg-aneng-aneng te melangkaw dan. 52 Ebaten din se melangkaw selotan lekat te onsedanan dan te peglowan, aw inangen din melangkaw se menge otaw medanà. 53 Begayan din se otaw sagkep te mèpiya tabang, meneng ipekesayo din se otaw meyaman te wedad ibegay kandan. 54-55 Tebangan din kidon menge bowad-bowad i Israel pinemallì din, so eked din palos kelibeli se pakang din diyà te menge kemonaan tadon te gayed din keidowan si Abraham aw menge bowad-bowad din te wedad temanan.”
56 Nayan, mig-ogpà si Maria diyà ki Elisabet taman te menge telo se bolan, aw penga niyan minolì.
Pegtebaw i Juan Memonyagay
57 Nayan, pegdateng te aldaw te pegpetebaw i Elisabet, timebaw se batà din meama. 58 Pegdineg te menge kedomaan din aw menge simbalay din kenyan, neluba dan heman so ontò sikandin neidowan te Timanem.
59 Pegdateng te ikewalo te aldaw lekat te pegtebaw din, netipon dan amon tolien aw ingedanan se batà. Ibeg dan ingedanan heman sikandin ki Zacarias, onawa te ngadan te amay din. 60 Meneng minikagi si Elisabet, “Eked iyan kepakay, so ingedanan sikandin ki Juan.”
61 Minikagi dan, “Meneng wedad palos kedomaan no iningedanan kenyan.”
62 Penga niyan, siminyas dan diyà ki Zacarias bingelen pa aw eden se ibeg din iingadan. 63 Siminyas heman sikandin aw nemoyò te solatan, aw insolat din se kagi, “Ingedanan sikandin ki Juan.”
Ontò nepela se kedita dan. 64 Pegketà negolian se pegkeomo din aw nekeikagi aw dimuyun sikandin te Timanem. 65 Nelemitan se kedita te simbalay dan. Ontò iyan nedengeg kidoen te menge bontod doton te Judiya, so yan se pigsempetanen dan. 66 Neeneng-enengan dan se dinineg dan, aw netegahan dan te meinang medengeg se batà sìyan, so egdomaan sikandin te Pengolo metolos.
Ingkeliwat i Zacarias se kagi te Timanem
67 Nayan, dimateng se Espiritu Santo diyà ki Zacarias, aw ingkeliwat din se kagi te Timanem, kagi din, 68 “Iduyun se Pengolo tadon Timanem egseligan te kedita tadon menge bowad-bowad i Israel, so doen isogò din megpelowà kenitadon menge sakop din, aw imetayan sikandin iselilin kenitadon. 69 Doen isogò te Timanem metolos megpelowà kenitadon, sìyan bowad-bowad i David egtolò te Timanem gebii. 70 Yan se impakang te Timanem gebii pineokit te menge telekeliwat te kagi din, so minikagi sikandin 71 te tebangan kidon din amon mekelowà kidon lekat te belad te poon tadon. 72 Metoman kidon din keidowan, so yan se impakang din diyà te menge kemonaan tadon. Eked din kelibeli se impakang din gebii, 73 so ontò migpakang diyà te kemonaan tadon si Abraham 74 te ipelowà kidon din lekat te belad te menge poon tadon, amon mekesimba kidon diyà kandin te wedad kelemitanan. 75 Ibeg din menimanem kidon aw metòlid se inangen tadon diyà kandin dalem te peg-ogpà tadon dini te keneyonan. 76 Nayan, sikona batà ko, meinang ka telekeliwat te kagi te Timanem melangkaw. Mekeonà ka doton te menge otaw amon meketagad dan te pegdateng te Pengolo, 77 so sikona se megpetaga-taga diyà te menge Judiyo te ipelowà din se menge sakop din lekat te pelumun aw pegwedaden din se salà tadon. 78 Yan se inangen te Timanem so gayed egkeido aw dakel se pedowan din. Iling te peglibtak te aldaw se pegdateng din amon megpelowà kenitadon, 79 so manyag sikandin diyà kenitadon pengkey iling kidon te otaw eg-ogpà diyà te kengitngitan aw nelemitan te kemetayun, amon ipeokit kidon din kidoen te dalan pesalo doton te kelinaw.”
80 Timilles si Juan aw ontò sikandin egkeseligan. Pegkedakel din, mig-ogpà sikandin kidoen te kebigtilan lamig te aldaw te pegpekità din diyà te menge bowad-bowad i Israel.