ፆኦሲ ማዾም ዳኪንቴዞንሢኮ ማዾ
ዓይፆ ካሮ
ዳኪንቴዞንሢኮ ማዾ ማፃኣፓ፦ ሉቃሴ ፃኣፔ ኮዦ ሃይሶ ማፃኣፓፓ ሄሊ ዓኣዻያኬ፤ ሃኖ ማፃኣፖኮ ዼኤፖ ማሊፃ ዬሱሴኮ ጊንፆ ሃንታ ቤርታሳ ናኣታ ዓያና ጌኤሺ ዔያቶ ማሊሳዛ ዒዛ ዛሎ ኬኤዛ ኮዦ ሃይሶ ዎይቲ ዬሩሳላሜይዳ፥ ዪሁዳ ዓጮ ቢያይዳ፥ ሳማሪያይዳ ሃሣ ዴንዲ ዓጮ ጋፖ ሄላንዳኣና ዳልጊሺ ኬኤዜቴያ ዔርዛኒኬ (1፡8)፤ ሃና ማፃኣፓ ፆኦሲ ጉሙርቂፆ ካኣዣ ዓይሁዶ ዓሶ ባኣካፓ ዓርቃዖ ዴንዲ ዓጪ ዴሬ ቢያኮ ጉሙርቂሢ ካኣሺ ማዓንዳያ ሄላንዳኣና ዎይቲ ዳልጊ ዴንዴቴያ ኬኤዛ ሃይሴ ዓርቃያኬ።
ሃኖ ማፃኣፖ ፃኣፔ ዓሢ፦ ኪሪስቶሴ ጉሙርቃ ዓሳ ሮሜ ዓጮ ካኣቱሞ ሎንሣኒ ዴሚና ዞርታ ዓሲ ማዒባኣሢ ሃሣ ጊንሣ ኪሪስቶሴ ጉሙርቂ ካኣሽኮ ካኣዣ ዓይሁዶ ዓሶኮ ካኣዦ ኩንሣያ ማዔሢ ዔርዛኒ ሚርጌ ላቢ ማዼኔ።
ዳኪንቴዞንሢኮ ማዾ ማፃኣፓ፦ ዬሱሴ ዛሎ ኬኤዛ ኮዦ ቃኣላ ዴንዲ ሄላ ቤዛ ቢያ ዳልጊ ዳልጊ ዓኣዼያ ማዒፆና ሃሣ ጊንሣ ሺኢጲፆ ማኣሮኮ ማዢንቲፆ ዔርዛ ሃይሦ ዼኤፒ ዼኤፒ ቤሲ ፓቂንታኒ ዳንዳዓኔ።
1. ኪሪስቶሴ ጉሙርቂፆ ካኣዣ ዬሩሳላሜይዳ ዬሱሴ ሌካ ዔውቴስካፓ ዓርቂንቴያ ማዒፆ
2. ዬና ካኣዣ ዬሩሳላሜ ዓጮ ቢያ ሄሊፆ
3. ሜዲቴራኒያ ባዞ ኮይላ ዓኣ ዓጮ ሃሣ ጊንሣ ሮሜ ዓጮ ሄላንዳኣና ዳልጊ ዴንዲፆ
ዳኪንቴዞንሢኮ ማዾ ማፃኣፖይዳ ባሼ ማዾ ማዒ ጴዻሢ ዓያኖ ጌኤዦ ማዾኬ፤ ዬይያ ጴንፄቆስፄ ኬሎና ዬሩሳላሜይዳ ዓኣ ኪሪስቶሴ ጉሙርቃ ዓሶ ዑፃ ዎልቄና ኬዲፆና ሃሣ ጊንሣ ሃኖ ማፃኣፖይዳ ዓኣ ማዺንቴ ባኮ ቢያይዳ ጴዻሢጉዲ ዓያኖ ጌኤዣ ሺኢጲፆ ማኣሮና ዔኪ ዓኣዻ ዓሶና ማዻንዳ ባኮ ዻዊ ዻዊ ሃሣ ዶዲሼያ ማዔሢኬ።
ዬኖ ዎዶና ኪሪስቶሴ ጉሙርቂፆ ዛሎ ኬኤዚንቴ ሃይሶኮ ዓኣፒ ማዔ ባካ ሃኖ ማፃኣፖይዳ ዓኣኔ፤ ዳኪንቴዞንሢኮ ማዾ ማፃኣፖይዳ ዓኣ ማዺንቴ ባካ ኪሪስቶሴ ጉሙርቃ ዓሶ ናንጎና ሺኢጲፆ ማኣሮ ዓሶኮ ፔቱሞናይዳ ዓኣ ዎልቃ ዎማዒ ዼኤፒ ማዔቶዋ ፔጋሲ ዻዋኔ።
ማፃኣፔላ ዱማ ዱማ ዓርቄ ባኮ
ኮዦ ሃይሶ ኬኤዛኒ ጊኢጊንቶና ሃይሴ (1፡1-26)
1. ዬሱሴኮ ጋፒንፆ ዓይሢፆና ሃሣ ዒ ዒንጌ ዎዞ (1፡1-14)
2. ዪሁዳ ቤዛ ሜሌ ዓሲ ዶኦሪንቴሢ (1፡15-26)
ኮዦ ሃይሳ ዬሩሳላሜይዳ ኬኤዚንቴሢ (2፡1—8፡3)
ኮዦ ሃይሳ ዪሁዳና ሳማሪያናይዳ ኬኤዚንቴሢ (8፡4—12፡25)
ጳውሎሴ ማዼ ማዾ (13፡1—28፡31)
1. ቤርታሲ ሃንቲ ማዼ ማዾ (13፡1—14፡28)
2. ዬሩሳላሜይዳ ዴዖና ቡኪንቶ (15፡1-35)
3. ላሚ ሃንቲ ማዼ ማዾ (15፡36—18፡23)
4. ሃይሣሲ ሃንቲ ማዼ ማዾ (18፡24—21፡16)
5. ጳውሎሴኮ ዬሩሳላሜይዳ፥ ቂሳሪያይዳ ሃሣ ሮሜ ዓጮይዳ ቱኡቲፆ (21፡17—28፡31)
1
ቴዎፒሎሴ! 1፡1 ሉቃ. 1፡1-4።
ታኣኮ ቤርታሳ ማፃኣፖይዳ ዬሱሴ ማዼ ባኮና ዔርዜ ባኮ ቢያ ታ ፃኣፔኔ፤ ታኣኒ ፃኣፔሢያ ዬሱሴ ሳዖይዳ ማዾ ዓርቄማፓ ዴንዲ፥ ሌካ ጫሪንጮ ዔውቴ ኬሎ ሄላንዳኣና ዒዚ ማዼ ማዾኬ፤ ሌካ ጫሪንጮ ዒዚ ዔውቴሢ ዳኪንቴዞንሢ ጌይንቲ ዶኦሪንቴዞንሢም ዓያና ጌኤሺ ዎልቄና ዓይሢፆ ዓይሤሢኮ ጊንፃፓኬ፤ ዒ ሃይቄሢኮ ጊንፃ ዺቢ ዔርታ ማርካ ማዓ ጎይሢና ሼምፔና ዓኣያ ማዒፆ ጎናሳኒ ዔያቶም ዖይዲታሚ ኬሊዳ ጴዺ ጴዺ ፆኦሲኮ ካኣቱሞ ዛሎ ዔርዜኔ፤ ዔያታኣ ዒዛ ዛጌኔ። ዔያቶና ዎላ ዒዚ ዓኣና፦ «ታ ዒንሢም ቤርታ ኬኤዜሢ ሃሣ ዓዶይዳፓ ዒንጊንቴ ዎዞ ዒንሢ ዬሩሳላሜይዳፓ ኬስኩዋዖ ዒኢካ ካፑዋቴ፤ 1፡4 ሉቃ. 24፡29። ዮሃኒሴ ቤርታ ዋኣሢና ማስኬኔ፤ ዒንሢ ጋዓንቴ ሃሢ ዻካ ኬሊኮ ጊንፃፓ ዓያና ጌኤሺና ማስታንዳኔ» ጌዔኔ። 1፡5 ማቲ. 3፡11፤ ማር. 1፡8፤ ሉቃ. 3፡16፤ ዮሃ. 1፡33።
ዬሱሴኮ ሌካ ጫሪንጮ ዓኣዺፆ
(ማር. 16፡19-20፤ ሉቃ. 24፡50-53)
ዒማና ዳኪንቴዞንሢ ፔቴይዳ ቡኪንቲ ዓኣዖ፦ «ጎዳሢዮ! ዒስራዔኤሌም ካኣቱሞ ማሂ ኔ ዒንጋንዳ ዎዳ ሃሢዳ?» ጌዒ ዬሱሴ ኮራ ዖኦጬኔ።
ዬሱሴ ማሃዖ፦ «ዓዳሢ ፔ ቢታንቶና ማሊ ጌሤ ዎዶና ማዓንዳ ባኮና ዒንሢ ዔራኒ ዳንዳዑዋሴ። ጋዓንቴ ዓያና ጌኤሺ ዒንሢዳ ኬዴ ዎዶና ዎልቄ ዒንሢ ዴንቃንዳኔ፤ ዬካፓ ዬሩሳላሜይዳ፥ ዪሁዳ ዓጮ ቢያይዳ፥ ሳማሪያይዳ፥ ዴንዲ ዓጮኮ ጋፒንፆ ሄላንዳኣና ዒንሢ ታኣኮ ማርካ ማዓንዳኔ» ጌዔኔ። 1፡8 ማቲ. 28፡19፤ ማር. 16፡15፤ ሉቃ. 24፡47-48። ያዺ ጌዔስካፓ ዔያታ ዛጋ ጎይሣ ዓኣንቴ ሌካ ጫሪንጮ ባንሢ ሳዓፓ ዔውታኣና ሻኣሬ ዔያቶኮ ዓኣፓፓ ዒዛ ዓኣቼኔ። 1፡9 ማር. 16፡19፤ ሉቃ. 24፡50-51።
10 ዒዚ ዓኣዻኣና ዔያታ ጫሪንጮ ባንሢ ጊዥ ጌዒ ዛጊፆይዳ ዓኣንቴ ቦኦሬ ዓፒላ ማኣዔ ላምዖ ዓሲ ዔያቶ ኮራ ዔቃዖ፦ 11 «ዒንሢ ሃይ ጌሊላ ዓጮ ዓሳ ጫሪንጮ ባንሢ ዛጊ ዒንሢ ዓይጎሮ ዔቄይ? ሃይ ጫሪንጮ ዔኪንታንቴ ዒንሢ ዛጌ ዬሱሴ፥ ጫሪንጮ ዴንዳንቴ ዒንሢ ዛጌማ ጎይፆ ዒማይዲ ማዒ ሙካንዳኔ» ጌዔኔ።
ዪሁዳ ቤዛ ማቲያሴኮ ዶኦሪንቲፆ
(ማቲ. 27፡3-10፤ ዓይኑ. 109፡8)
12 ዬካፓ ዛይቴ ሪሚቲ ዹካ ጌይንታዞይዳፓ ዬሩሳላሜ ባንሢ ዔያታ ማዔኔ፤ ዛይቴ ሪሚቲ ዹካ ጌይንታ ዹካ ዬሩሳላሜይዳፓ ዓሲ ዔኤሌም ዋይዛንዳጉዴ ፓዴ ቤሲዳኬ። 13 ዬሩሳላሜ ዔያታ ሙካዖ ዎንዴ ናንጋ ኩቦ ማኣሮ ኬስኬኔ፤ ዔያታ፦ ጴፂሮሴ፥ ዮሃኒሴ፥ ያይቆኦቤ፥ ዒንዲራሴ፥ ፒልጶሴ፥ ቶኦማኣሴ፥ ቤርቴሌሞሴ፥ ማቲዎሴ፥ ዒልፒዮሴ ናኣዚ ያይቆኦቤ፥ ፔ ዓጮ ሚጪንታ ሲሞኦኔንታ ያይቆኦቤ ናኣዚ ዪሁዳንታኬ። 1፡13 ማቲ. 10፡2-4፤ ማር. 3፡16-19፤ ሉቃ. 6፡14-16። 14 ዬያታ ቢያ ኬሊ ፔቱሞና ዶዲ ፆኦሲ ሺኢቃኔ፤ ዔያቶና ዎላ ፔቴ ፔቴ ላኣሊና ዬሱሴኮ ዒንዶ ማይራሞና ሃሣ ዬሱሴኮ ጌርሲንሢያ ዓኣኔ።
15 ዒማና ጴፂሮሴ ፄኤታና ላማታሚና ማዓ ኪሪስቶሴ ጉሙርቃ ዓሲ ባኣካ ዔቃዖ ሂዚ ጌዔኔ፦ 16 «ታ ዒሾንሦ! ታ ሚሾንሦ! ዬሱሴ ዓርቄ ዓሶኮ ዓርና ማዔ፥ ዪሁዳ ዛሎ ፃኣፒንቴሢጉዲ ዓያና ጌኤሺ ቤርታሲ ዳውቴ ዛሎና ኬኤዜ ፆኦሲ ማሊፃ ኩማኒ ኮይሳኔ። 17 ዪሁዳ ኑኡኮ ፔቴሢ ማዒ ቤርታ ኑኡና ዎላ ማዻያኬ።»
18 «ጋዓንቴ ዬይ ዓሢ ፔኤኮ ፑርቶ ማዾ ዛሎሮ ዔኬ ሚኢሾና ሳዓ ሻንቄኔ፤ ሃሣ ባሊቲና ሳዓ ጳዺንቲ ዹኡቂ ሄኮ ፓቂንታዛ፥ ሩቁንታኣ ዒዛኮ ኬስኪ ሚጪንቴኔ፤ 1፡18 ማቲ. 27፡3-8። 19 ዬይ ማዺንቴ ባካ ዬሩሳላሜ ዓጮይዳ ቢያ ዋይዚንቴኔ፤ ዬያሮ ዬና ሳዓ ዔያቶ ዓጮ ሙኡጮና ‹ዓኬልዳማ› ጌይንቴኔ፤ ዬኖኮ ቡሊፃ ‹ሱጉሢ ሳዓ› ጌይሢኬ።»
20 «ዬይ ያዺ ማዓኒ ዳንዳዔሢ ዓይኑሞ ማፃኣፖይዳ፦
‹ዒዚ ናንጋ ማኣራ ባዔ ማዖንጎ፤
ዖኦኒያ ዒኢካ ናንጎፓ፤
ሃሣ ዒዛኮ ዓኣ ቢታንቶ ሜሌ ዓሲ ዔኮንጎ›
ጌይንቲ ፃኣፒንቴያ ዓኣሢሮኬ።» 1፡20 ዓይኑ. 69፡25፤ 109፡8።
21 «ዬያሮ ጎዳ ዬሱሴ ኑ ባኣኮይዳ ኑኡና ዎላ ሃንቴ ዎዶና ጉቤ ኑኡና ዎላ ዓኣ ዓሶይዳፓ፥ 22 ዬያጉዲ ሃሣ ዮሃኒሴ ዋኣፆና ማስካ ዎዶይዳፓ ዓርቃዖ ዴንዲ ጎዳ ዬሱሴ ጫሪንጮ ዔውቴ ኬሎ ሄላንዳኣና ኑኡና ዎላ ዓኣ ዓሶይዳፓ ፔቴ ዓሲ ጎዳ ሃይባፓ ዔቄሢኮ ኑኡና ዎላ ማርካ ማዓኒ ኮይሳኔ» ጌዔኔ። 1፡22 ማቲ. 3፡16፤ ማር. 1፡9፤ 16፡19፤ ሉቃ. 3፡21፤ 24፡51።
23 ዬካፓ ላምዖ ዓሲ ዔያታ ዱማሲ ፔ ባንሢ ኬሴኔ፤ ዬያታ ቤርሳባሴ ሃሣ ባጎ ሱንፃ ዒዮስፆሴ ጌይንቲ ላምዖ ሱንሢና ዔኤሊንታ ዮሴፔ ጎዖሢና ማቲያሴናኬ። 24 ዬካፓ ጴፂሮሴንሢ ሂዚ ጌዒ ሺኢቄኔ፦ «ዓሲኮ ቢያ ዒኔ ዔራ ጎዳሢዮ! ሃንሢ ላምዖንሢዳፓ ዖና ኔኤኒ ዶኦሬቴያ ኑና ዻዌ፤ 25 ኑ ሃሢ ሺኢቃሢ ዪሁዳ ፔ ሼኔና ፔ ማሌ ቤዞ ዓኣዻዖ ሃሼ ዳኪንቲፆ ማዾ ዔኪ ፔ ማዾ ማሂ ዒዛ ቤዛ ማዻንዳሢ ዖናታቴያ ኔ ኑም ዔርዛንዳጉዲኬ።» 26 ጋዓዖ ዒፃ ዓጋዛ ዬና ባኬላ ማቲያሴም ኬስኬኔ፤ ዬያሮ ዬይ ማቲያሴ ጎዖሢ ታጶ ፔቴ ዳኪንቴዞንሢና ዎላ ማዒ ፓይዲንቴኔ።

1:1 1፡1 ሉቃ. 1፡1-4።

1:4 1፡4 ሉቃ. 24፡29።

1:5 1፡5 ማቲ. 3፡11፤ ማር. 1፡8፤ ሉቃ. 3፡16፤ ዮሃ. 1፡33።

1:8 1፡8 ማቲ. 28፡19፤ ማር. 16፡15፤ ሉቃ. 24፡47-48።

1:9 1፡9 ማር. 16፡19፤ ሉቃ. 24፡50-51።

1:13 1፡13 ማቲ. 10፡2-4፤ ማር. 3፡16-19፤ ሉቃ. 6፡14-16።

1:18 1፡18 ማቲ. 27፡3-8።

1:20 1፡20 ዓይኑ. 69፡25፤ 109፡8።

1:22 1፡22 ማቲ. 3፡16፤ ማር. 1፡9፤ 16፡19፤ ሉቃ. 3፡21፤ 24፡51።