ማዢንቲ ማፃኣፔ
ዓይፆ ካሮ
ማዢንቶ ማፃኣፓ ሳዖንታ ጫሪንጮንታኮ ማዢንቲ ዛላ፥ ዓሲ ዜርሢኮ ሙኪሢ ዛላ፥ ጎሜና ዋኣዮ ናንጊኮ ዓይፆና ፆኦሲ ዓሲ ዜርሢና ዎላ ዓኣ ካኣሚፆ ዛሎ ኬኤዛኔ፤ ማዢንቶ ማፃኣፓ ላምዖ ዼኤፒ ዼኤፒ ቤሲ ፓቂንታኔ።
1. ዓይሢ 1—11 ሄላንዳኣና፦ ሳዖና ጫሪንጮናኮ ማዢንቶና ዓሲ ዜርሢኮ ቤርታኣ ሃይሶዋ ኬኤዛኔ፤ ዓዳኣሜና ሂዋኣኖናኮ፥ ቃኣዔኤሌና ዓኣቤኤሌናኮ፥ ኖሄና ባይሲንቶ ዋኣፆናኮ፤ ዬያጉዲ ሃሣ ባብሎኔ ጌይንታ ቤዛ ማዢንቴ ዼኤፖ ሹጮ ኬኤሎናኮ ሃይሳ ጴዻሢ ዬኖ ቤዞይዳኬ።
2. ዓይሢ 12ፓ ዴንዲ 50 ሄላንዳኣና፦ ዬና ቤዛ ዒስራዔኤሌ ዓሶኮ ቤርታኣ ዓዶንሢ ሃይሶ ኬኤዛኔ፤ ዔያቶ ባኣካፓ ቤርታዺ ፆኦሲ ጉሙርቂፆና ፆኦሲም ዓኣ ዓይሢንቲፆና ዔርቴያ ማዔሢ ዓብራሃሜኬ፤ ዬካፓ ዒዛኮ ናኣዚ ዪሳኣቄንታ ናኣዚ ናዖ ማዔሢ ያይቆኦቤንታ ታጶ ላምዖ ያይቆኦቤ ናኣቶ ሃይሳ ሄሊ ኬኤዚንቴኔ፤ ዬንሢያ ታጶ ላምዖ ያይቆኦቤ ናኣቶንሢ፥ ታጶ ላምዖ ዒስራዔኤሌ ፃጶኮ ቤርታሳዞንሢኬ፤ ዬንሢ ታጶ ላምዖ ዒስራዔኤሌ ናኣቶ ባኣኮይዳፓ ዱማና ዮሴፔ ዛሎ፤ ዬያጉዲ ሃሣ ያይቆኦቤ ዛላና ዒዛኮ ናኣታ ማኣሮ ዓሶና ዎላ ጊብፄ ዓጮ ዔኪ ሙኬ ባኮ ዛሎ ኮሺ ኬኤዛኔ።
ሃና ማፃኣፓ ዴሬ ሃይሴ ዛላ ባኣዚ ኬኤዛያ ማዔቴያ ቢያፓ ዑሣ ኬኤዛሢ ፆኦሲ ማዼ ማዾ ዛሎኬ፤ ፆኦሲ ሳዖና ጫሪንጮና ማዤ ሃይሶ ኬኤዚሢ ዓርቃዖ ፆኦሲ ዴሮም ማሊፆ ሃሹዋኣሢ ዔርዛያ ማዔ ሃጊ ማዓንዳ ዎዞ ፔጋሲሢና ኩንሣኔ፤ ማፃኣፔሎኮ ካራፓ ዴንዲ ጋፖ ሄላንዳኣና ዓኣ ፑኡፖ ሃይሶ ዓዴ፥ ዻቢንታ ዓሶ ዑፆይዳ ጎሪንታሢና ዎጋሢ፥ ዴሮ ዔኪ ዓኣዻሢና ማኣዳሢ፤ ሃሣ ዔያታ ናንጋ ናንጎ ሃይሶ ዔያቶኮ ጊኢጊሻሢ ፔ ቶኦኪና ፆኦሲኬ። ሃይ ሚርጌ ዎዴኮ ቤርታ ዓኣ ማፃኣፓ ፃኣፒንቴሢ ዴሮኮ ፆኦሲ ጉሙርቂፆ ኬኤዛኒና ዬያ ጉሙርቂፆዋ ናንጊና ባይቁዋያ ማዒ ናንጋንዳጉዲ ማሃኒኬ።
ማፃኣፔላ ዱማ ዱማ ዓርቄ ባኮ
ሳዖና ጫሪንጮና ሃሣ ዓሲኮዋ ማዢንቶ (1፡1—2፡25)
ጎሜና ሜቶናኮ ዓይፆ (3፡1-24)
ዓዳኣሜይዳፓ ዴንዲ ኖሄ ሄላንዳኣና ዓኣ ሃይሶ (4፡1-5፡32)
ኖሄና ባይሲንቶ ዋኣፆ ዛሎ ሃይሶ (6፡1-10፡32)
ባብሎኔ ሹጮ ኬኤሎ ዛሎ (11፡1-9)
ኖሄ ናኣዚ ሴኤሜይዳፓ ዴንዲ ዓብራሃሜ ሄላንዳኣና ዓኣ ሃይሶ (11፡10-32)
ቤርታኣ ዓዶንሢ ዓብራሃሜንታ ዪሳኣቄንታ ያይቆኦቤንታ ዛሎ (12፡1—35፡29)
ያይቆኦቤ ናኣዚ ዔኤሳዎ ዜርፆ ሾይንቶ (36፡1-43)
ዮሴፔና ዒዛኮ ጌርሲንሢና ዛሎ (37፡1—45፡28)
ዒስራዔኤሌ ዓሶኮ ጊብፄ ዓጮይዳ ናንጊፆ (46፡1—50፡26)
1
ሳዓኮ ማዢንቲ ጎይሢ
1 ቤርታዺ ፆኦሲ ጫሪንቺና ሳዓና ዔኤቢ ባኣያይዳፓ ማዤኔ። 2 ዬኖ ዎዶና ሳዖኮ ሃማኬ ጌዒ ዔርታ ባኣዚ ባኣያ፤ ሃሣ ፔቴታዖ ዒዞይዳ ዓኣ ባኣዚያ ባኣያኬ፥ ሚርጌና ዔቴ ማዔ ዼኤፖ ዒጊቻ ዋኣፆ ዑፆይዳ ሻኔ ዹሚ ዓኣኔ፤ ፆኦሲኮዋ ዓያና ዋኣፆ ዑፆይዳ ሴካ ሃንጋ ጋዓኔ።
3 ዬካፓ ፆኦሲ «ፖዒ ፖዖንጎ» ጌዒ ዓይሣዛ ፖዔኔ። 1፡3 2ቆሮ. 4፡6። 4 ፆኦሲ ፖዒ ዛጋዖ ዒ ማዤ ባኮና ዎዛዼኔ፤ ዬካፓ ፆኦሲ ፖዒ ዹሚፓ ዱማሲ፥ 5 ፖዖ «ሮኦሪ» ጌዒ፥ ሃሣ ዹሞዋ «ዋንቴ» ጌዔኔ። ሳዓ ዓሚ ካሬኔ፤ ዬና ፔታሳ ቤርታሲ ኬሊ ማዔኔ።
6 ዬካፓ ፆኦሲ «ዋኣፆ ዋኣፆይዳፓ ፓቂ ቃዛያ ሳዖኮ ዑፆይዳ ሌካ ዼጌ ቤሲ ማዖንጎ» ጌዒ ዓይሣዛ ማዔኔ፤ 7 ፆኦሲ ዬያይዲ ሌካ ዼጌ ዋኣፆኮ ሳዛ ጉሪ ቤሲ ማዤኔ፤ ዬካፓ ፆኦሲ «ዬኖ ጉሮ ቤዞኮ ዴማ ዓኣ ዋኣፆና ዑፃ ዓኣሢና ፓቂንቶንጎ» ጌዔኔ፤ ዒዚ ጌዔሢጉዴያ ማዔኔ። 8 ፆኦሲ ዬኖ ሳዖኮ ዑፃ ዼጊ ጌዔ ጉሮ ቤዞ «ጫሪንቺ» ጌዔኔ። ሳዓ ዓሚ ካሬኔ፤ ላምዓሳ ኬሊ ማዔኔ። 1፡8 2ጴፂ. 3፡5።
9 ዬካፓ ፆኦሲ ፃኣዺ ዓጪ ፔጋዺ ጴዻንዳጉዲ ጫሪንጮኮ ዴማ ዓኣ ዋኣፆ «ፔቴ ቤስካ ዴዖም» ጌዔኔ፤ ዒዚ ጌዔሢጉዴያ ማዔኔ። 10 ፆኦሲ ፃኣዾ ዓጮ «ሳዓ» ጌዒ፥ ሃሣ ፔቴ ቤዛ ዴዒ ዓኣ ዋኣፆ «ዼኤፒ ባዚ» ጌዔኔ፤ ፆኦሲ ዬያ ዛጋዖ ማዤ ባኮና ዎዛዼኔ። 11 ዬካፓ ፆኦሲ «ሳዓ ቱኮ ሚሢንታ ሃኣኮ ዜርሢ ጉቤ፤ ሃሣ ዓኣፒ ዓኣፓ ሚሢ ዱማ ዱማ ባቃልሶንጎ» ጌዒ ዓይሣዛ፥ ዒዚ ጌዔሢጎይፆ ማዔኔ። 12 ዬያ ጎይፆና ሳዓ ቢያ ባኮ ባቃልሴም፥ ፆኦሲ ዬያ ዛጋዖ ማዤ ባኮና ዎዛዼኔ። 13 ሳዓ ዓሚ ካሬኔ፤ ሃይሣሳ ኬሊ ማዔኔ።
14 ዬካፓ ፆኦሲ «ሮኦሮ ዋንታፓ ዱማሳኒ ዱማ ዱማ ፖዒ ጫሪንጮይዳ ማዖንጎ፤ ዱማ ዱማ ኬሎንታ፥ ሌዖንታ ሌዖይዳ ዓኣ ዱማ ዱማ ዎዳኣ ዓርቃ ዎዶ ዱማሲ ዔርዛ ማላታ ማዖንጎ፤ 15 ሳዖም ፖዓኒ ጫሪንጫ ማዒ ፖዖንጎ» ጌዒ ዓይሣዛ ማዔኔ። 16 ዬያይዲ ፆኦሲ ላምዖ ዼኤፒ ፖዒ ዔኤቢ ባኣያይዳፓ ማዤኔ፤ ፑኡፒ ፖዒ ፖዓ ዓቢ ሮኦሪ ፖዓንዳጉዲ፥ ሃሣ ጊንሣ ዻካ ፖዒ ፖዓ ዓጊኒ ዋንታ ፖዓንዳጉዲ ማሃዖ ዬያጉዲ ሃሣ ዦኦጎዋ ማዤኔ፤ 17 ዬንሢ ፖዖንሢ ጫሪንጫ ዴዓንዳጉዲ ጌሤኔ፤ ዬያ ዒ ማዼሢ ሳዖም ፖዒ ፖዓንዳጉዲ፥ 18 ሮኦሪና ዹሚናይዳ ፖዓንዳጉዲና ዹሚ ፖዒዳፓ ዱማሳንዳጉዴያኬ። ፆኦሲ ዬያ ዛጋዖ ማዤ ባኮና ዎዛዼኔ። 19 ሳዓ ዓሚ ካሬኔ፤ ዖይዳሳ ኬሊ ማዔኔ።
20 ዬካፓ ፆኦሲ «ዋኣሢዳ ዱማ ዱማ ሼምፖና ዓኣ ማዢንቲ ዺቢ ዓኣያ ማዖንጎ፤ ካፒያ ሳዖኮ ዑፃ ጫሪንጮይዳ ባራኖንጎ» ጌዔኔ። 21 ዬያይዲ ፆኦሲ ፑኡፒ ፑኡፒ ባዚ ቦዖንታ ሜሌ ዋኣፆይዳ ናንጋያና ዓጊፃ ዱማ ዱማ ማዢንቲ፤ ሃሣ ዱማ ዱማ ካፖዋ ዔኤቢ ባኣያይዳፓ ማዤኔ። ፆኦሲ ዬያ ዛጋዖ ማዤ ባኮና ዎዛዼኔ። 22 ፆኦሲ ዔያቶ «ሾይ ሚርጉዋቴ፤ ዜርፃ ዒንሢኮ ባዞ ዋኣፆ ኩሞንጎ፤ ካፓኣ ሳዖይዳ ሚርጎንጎ» ጌዒ ዓንጄኔ። 23 ሳዓ ዓሚ ካሬኔ፤ ዶንጋሳ ኬሊ ማዔኔ።
24 ዬካፓ ፆኦሲ፦ «ሳዓ ዱማ ዱማ ማዔ ሼምፓ ዓኣ ማዢንቲ ጌይፃ ዱማ ዱማ ቆሎንታ፥ ዻካንታ ዼኤፒንታ ማዔ ካይዚ ቦዖ ማዢንቲያ ጴዺሶንጎ» ጌዒ ዓይሣዛ ማዔኔ። 25 ፆኦሲ ዬያይዲ ሼምፓ ዓኣ ማዢንቶ ቢያ ማዤኔ፤ ዒዚ ዬያ ዛጋዖ ማዤ ባኮና ዎዛዼኔ።
26 ዬካፓ ፆኦሲ፦ «ዓሲ ኑኡኒ ኑ ማሎና፥ ኑና ማላያ ዔኤቢ ባኣያይዳፓ ማዦም፤ ዬንሢ ዓሶንሢኮ ባዞይዳ ናንጋ ሞላሢ ዑፃ፥ ጫሪንጮ ካፖ ዑፃ፥ ቆሎንታ ካዮ ቦዖ ዻኮንታ ዼኤፖንታ ዑፃ፤ ሃሣ ዬያጉዲ ሳዖ ቢያይዳ ቢታንቶ ዓኣያ ማዖንጎ» ጌዔኔ። 1፡26 1ቆሮ. 11፡7።
27 ፆኦሲ ዬያይዲ ዓሲ ማዤኔ፤
ፔ ማሎና ፔና ማላያ፥
ዓቲንቄና ላኣሊና ማሂ ማዤኔ። 1፡27 ማቲ. 19፡4፤ ማር. 10፡6።
28 ፆኦሲያ ዓሲ «ሾይ ሚርጉዋቴ፥ ፃጳ ዒንሢኮ ሳዖ ኩሞንጎ፤ ሳዓኣ ዒንሢ ቢታንቶኮ ዴማ ማዖንጎ፤ ባዞይዳ ናንጋ ሞላሢ ዑፃ፥ ጫሪንጫ ባራና ካፖና ሳዖይዳ ዓጊፂ ሃንታ ሼምፖና ዓኣ ባኮ ቢያ ዑፃ ዒንሢኮ ቢታንቶ ዓኣያ ማዖንጎ» ጌዒ ዓንጄኔ። 1፡28 ማዢ. ማፃ 5፡1-2። 29 ፆኦሲ ዔያቶም ኬኤዛዖ፦ «ሙኡዚ ዒንሢም ማዓንዳጉዲ ሳዖይዳ ጴዻ ሃኣኮንታ ዓኣፒ ዓኣፓ ሚሢንታ ታኣኒ ዒንሢም ዒንጌኔ። 30 ሃሣ ዬያጉዲ ቆሎንታ ካዮ ቦዖንታም፥ ጫሪንጫ ባራና ካፖንታ ሳዖይዳ ዓጊፃ ሼምፓ ዓኣ ማዢንቶንታ ዑኡሲ ዔካ ሼምፔና ዓኣ ማዢንቲም ቢያ ሙኡዚ ማዓንዳጉዲ ዓኣዔ ማኣቲና ዒላሺና ታኣኒ ዒንጌኔ» ጌዔኔ፤ ዬይያ ዒዚ ጌዔ ጎይፆ ማዔኔ። 31 ፆኦሲ ማዤ ባኮ ቢያ ዛጋዖ፥ ዑሣ ዓኣዼ ዎዛዼኔ። ሳዓ ዓሚ ካሬኔ፤ ላሃሳ ኬሊ ማዔኔ።