ዔርሚያሴ
ዓይፆ ካሮ
ፆኦሲ ማሊፆ ኬኤዛ፥ ዔርሚያሴ ናንጌሢ፦ ኪሪስቶሴ ሾይንቱዋንቴ ላንካሳ ፄኤቶ ሌዖኮ ጋፒንፆ ዎዶና ላሃሳ ፄኤቶ ሌዖኮ ዓይፆይዳኬ፤ ዔርሚያሴ ዬያ ዖዶሲ ማዼ ዎዶይዳ ሜሌ ፆኦዞ ካኣሽኪፆና ጎሞ ማዺፆና ዛሎ ፆኦሲ ዴሮይዳ ዼኤፒ ባይሲንታ ሙካንዳሢ ላቲ ላቲ ኬኤዛኔ፤ ዒ ኬኤዜ ፆኦሲ ማሊፆይዳፓ ዒ ሼምፔና ዓኣዖ ባብሎኔ ካኣቲ፥ ናብካዳናፆኦሬ ዬሩሳላሜ ዓርቂ ካታሞንታ ጌኤዦ ማኣሮንታ ሻሄሢና ዪሁዳ ካኣቲ ፔኤኮ ዴሮፓ ዺቢ ዴሬና ዎላ ዲዒንቲ ባብሎኔ ዔውቴሢያ ዛጌኔ። ዔርሚያሴ ዬኖ ዎዶና ዴራ ዬያ ዳውሲንቲ ዴንዴ ቤዛፓ ማዓንዳሢና ዒስራዔኤሌ ዓጮ ካኣታ ጊንሣ ካኣታዻንዳሢ ቤርታዺ ኬኤዜኔ።
ዔርሚያሴ ኬኤዜ ፆኦሲ ማሊፃ ዖይዶ ቤሲ ፓቂንታኒ ዳንዳዓኔ።
1. ዒዮሲያሴ፥ ዒዮዓቄሜ፥ ዮዓኪኔንታ ሴዴቂያሴንታ ካኣታዺ ዎይሤ ዎዶይዳ ዪሁዳ ዴሮና ዔያቶኮ ሱኡጎናም ፆኦሲ ኬኤዜ ቃኣላ።
2. ዱማ ዱማ ኬኤዚንቴ ፆኦሲ ማሊሢና ዔርሚያሴ ናንጌ ዎዶይዳ ማዼ ዼኤፒ ዼኤፒ ባኣዚንታ ዔርሚያሴም ዔቦ ፃኣፒ ዓርቃ ባኣሮኬ ፃኣፒ ጌሤ ባኮፓ ጴዼ ባኣዚ።
3. ዱማ ዱማ ፃንጎ ማዔ ዴሮም ፆኦሲ ኬኤዜ ሎንሦ ቃኣላ።
4. ዬሩሳላሜ ዓርቂንቴሢና ዴራኣ ዲዒንቲ ባብሎኔ ዔውቴሢ ዛሎ ኬኤዛ ሃይሴ።
ዔርሚያሴ ዴሮ ዒናፓ ኮሺ ናሽካያ፤ ጊንሣ ሃሣ ዔያቶይዳ ዻቢንቴያ ማዒፆ ዎጋኒያ ሚርጌና ዒፃ ዓሲኬ። ፆኦሲ ፔ ማሊፆ ኬኤዛያ ማሂ ዒዛ ዔኤሌሢሮ ዔርሚያሴ ማሊ ሜታዺፆና ፔጋሲ ኬኤዜ ዖዪሢ ሃይሴ ሃኖ ማፃኣፔሎይዳ ሚርጌ ቤስካ ኬኤዚንቴኔ፤ ዬያጉዲ ሃሣ ፆኦሲ ቃኣሎ ዒዚ ፔ ዒና ዓኣቺ ዓርቂ ቃዛኒ ዳንዳዒባኣሢያ ፔጋሲ ኬኤዜኔ።
ሃኖ ማፃኣፔሎይዳ ፆኦሲ ማሊሢ ማዒ ኬኤዚንቴ ዼኤፖ ዼኤፖ ሃይሶፓ ዛላ ሚርጌ ሜቶና ኩሜ ዔርሚያሴ ዎዶ ጊዴና ሶፒ ዴንዲ ፆኦሲ ፔ ዴሮም ጫኣቄ ዓኮ ጫኣቁማ ማዾይዳ ፔኤቃንዳሢያ ዔርዛያኬ፤ ዬና ዓኮ ጫኣቁማ ዴሮኮ ዒኖይዳ ፃኣፒንታንዳሢሮ ዔያቶም ጶቂሢ ኬኤዚ ዔርዛ ዓሲባኣንቴ ፔኤሮ ዔያታ ዬያ ካፓንዳኔ። (ዔር. 31፡31-34)
ማፃኣፔላ ዱማ ዱማ ዓርቄ ባኮ
ፆኦሲ ዔርሚያሴ ዶኦሬሢ (1፡1-19)
ፆኦሲ ዪሁዳና ዔስራዔሌ ዴሮናይዳ ሜቶ ዔኪ ዬዓንዳያ ማዒፆ (2፡1—25፡38)
ፆኦሲ ማሊፆ ኬኤዛኔ ጌይ ሉኡቃ ዓሶ ዔርሚያሴ ማኪ ጌስቴ ጌኤዞ (26—29)
ፆኦሲ ፔኤኮ ዴሮ ዔያቶ ዓጮ ባንሢ ማሃንዳሢ ዛሎ (30—33)
ዔርሚያሴ ማዼ ዱማ ዱማ ማዾ (34—38)
ዬሩሳላሜ ካታሞኮ ሎኦሚፆና ዪሁዳይዳኣ ማዺንቴ ባኮ (39—42)
ዔርሚያሴ ጊብፄ ዓጮይዳ (43—44)
ባኣሮኬም ዳኪንቴ ኪኢታ (45)
ፆኦሲ ማሊፆ ኬኤዛ ዔርሚያሴ ዱማ ዱማ ዴሮም ኬኤዜ ፆኦሲ ማሊፆ (46—51)
ዬሩሳላሜኮ ሎኦሚፆ ዛሎ ቃሲ ኬኤዚንቴ ሃይሴ (52)
1
1 ቢኢኒያሜ ፃጶ ዴኖ ዓጮይዳ ዓኣ ዓናቶቴ ጌይንታ ጉርዳስኬኖይዳ ናንጋ ቄኤሶፓ ፔቴ ሂልቂያ ጎዖሢኮ ናኣዚ ዔርሚያሴ ሃካፓ ሊካ ኬኤዚንታ ባኮ ኬኤዜኔ፤ 2 ናንጊና ናንጋ ጎዳኮ ዬይ ቃኣላ ዔርሚያሴም ኬኤዚንቴሢ ዓሞኦኔ ናኣዚ ዒዮሲያሴ ዪሁዳይዳ ካኣታዼንቴ ታጶ ሃይሣሳ ሌዖናኬ። 1፡2 2ካኣቶ. ማ 22፡3—23፡27፤ 2ፆኦሲ. ዓሃኬ 34፡8—35፡19። 3 ዬያጉዲ ዒዮሲያሴ ናኣዚ ዒዮዓቄሜ ካኣታዺ ዎይሤ ዎዶና፤ ጊንሣ ሃሣ ዒዮሲያሴ ናኣዚ ሴዴቂያሴ ካኣታዺ ታጶ ፔቴ ሌዔ ዎይሤ ዎዶ ሄላንዳኣና፤ ዬኖ ሌዖኮዋ ዶንጋሳ ዓጊኖና ዬሩሳላሜ ዴራ ዲዒንቲ ዔውቴ ዎዶ ሄላንዳኣና ዬይ ፆኦሲ ቃኣላ ዔርሚያሴ ዛሎና ኬኤዚንቲ ኬኤዚንቲ ዴዔኔ። 1፡3 2ካኣቶ. ማ 23፡36—24፡7፤ 24፡18—25፡21፤ 2ፆኦሲ. ዓሃኬ 36፡5-8፤ 11፡21።
ዔርሚያሴኮ ፆኦሲ ማዾም ዔኤሊንቲፆ
4 ናንጊና ናንጋ ጎዳኮ ቃኣላ ሂዚ ጋዓያና ታኣም ኬኤዚንቴኔ፦
5 «ዔርሚያሴ!
ኔና ሃጊ ዒንዶ ጎጳ ታኣኒ ማዡዋዖ
ቤርታ ታ ኔና ዔሬኔ፤
ኔ ሾይታንዳሢኮ ቤርታ ታ ኔና ዱማሲ
ዴሮም ታ ማሊሢ ኔ ኬኤዛንዳጉዲ ታ ኔና ዶኦሬኔ» ጌዔኔ።
6 ታኣኒ ዒማና፦ «ናንጊና ናንጋ ጎዳ ማዔ ቢያ ባኮ ማዤሢዮ! ታኣኒ ሃጊ ናይታሢሮ ዎዚም ጌስቶቴያ ታኣኒ ዔሩዋሴ» ጌዔኔ።
7 ናንጊና ናንጋ ጎዳ ጋዓንቴ ታኣም፦ « ‹ታኣኒ ሃጊ ናይኬ› ጌይፖ፤ ኔ ዴንዳንዳሢ ታ ኔና ዳካ ቤሲኬ፤ ኔ ኬኤዛንዳሢያ ታ ኔና ዓይሤ ባኮ ቢያኬ፤ 8 ታኣኒ ኔኤና ዎላ ማዒ ኔጊዳ ሙካ ባኣዚፓ ቢያ ዓውሳንዳሢሮ ዔያቶ ፔቴታዖ ዒጊጪፖ፤ ዬያ ጋዓሢ ታና፥ ናንጊና ናንጋ ጎዳኬ!» ጌዔኔ።
9 ናንጊና ናንጊና ናንጋ ጎዳ ፔ ኩጮና ታኣኮ ሙሱሮ ካኣማዖ፦ «ዓካሪ ኔ ኬኤዛንዳ ቃኣሎ ታ ኔኤም ዒንጌኔ፤ 10 ዬያሮ ቱጋኒና ሻሃኒ፥ ባይዛኒና ሴካ ሃንጋ ማሂ ሺርሻኒ፥ ኬልቂ ኮሻኒና ቱካኒያ ኔ ዳንዳዓንዳጉዲ ዴሮ ቢያሢና ካኣቶና ዑፃ ቢታንቶ ታ ኔኤም ዒንጌኔ» ጌዔኔ።
ዔርሚያሴም ፆኦሲ ፔጋሲ ዻዌ ላምዖ ባኣዚ
11 ናንጊና ናንጋ ጎዳ ታና፦ «ዔርሚያሴ! ኔኤም ጴዻ ባካ ዓይጎዳይ?» ጌይ ዖኦጬኔ።
ታኣኒ ማሃዖ፦ «ሌውዜ ጌይንታ ሚፄሎ ካኣፒ ታኣም ጴዻኔ» ጌዔኔ።
12 ናንጊና ናንጋ ጎዳ ዒማና፦ «ፒዜ ኔ ዴንቄኔ፤ ታኣኒያ ዬያጉዲ ታኣኮ ቃኣሎ ማዺ ኩንሣኒ ቢያ ዎዴ ጊኢጊ ዓኣያኬ» ጌዔኔ።
13 ላሚ ሃሣ ናንጊና ናንጋ ጎዳ፦ «ሜሌ ኔ ዴንቃ ባኣዚ ዓይጎዳይ?» ጌይ ታና ዖኦጬኔ።
ዬያሮ ታኣኒ፦ «ዓጮኮ ኬዴኖ ዛሎይዳ ፔቴ ዖቲዳ ዋኣሢ ቡርቃያ ታ ዴንቃኔ፤ ዬና ቡርቄ ዋኣፃ ሃንጋ ሾኦታንዳጉዲ ዖታ ዛላዺ ዓኣኔ» ጌይ ማሄኔ።
14 ናንጊና ናንጋ ጎዳ ታኣም ኬኤዛዖ፦ «ዓጮኮ ኬዴኖ ዛሎይዳፓ ባይሲንታ ቡርቂ ኬስኪ ሃኖ ዓጫ ናንጋ ዓሶይዳ ቢያ ዲጲጉዲ ሙካንዳኔ፤ 15 ዬኖ ኬዶ ዛሎይዳ ናንጋ ዴሮ ሃይካ ዬዓንዳጉዲ ታ ዔኤላንዳኔ፤ ዬሩሳላሜንታ ኮይሎይዳ ዓኣ ዪሁዳ ካታሞ ዖሊ ዔያታ ፔ ዴማ ማሂ ዓርቃንዳኔ፤ ዬካፓ ዬሩሳላሜ ጌሎ ካሮይዳ ፔኤኮ ካኣቱሞ ዖይቶ ዔያታ ጌሣንዳኔ። 16 ታ ዴራ ጎሜ ማዼሢሮ ታ ዔያቶይዳ ሜቶ ዓጋንዳኔ፤ ዔያታ ታና ሃሺ ሜሌ ፆኦዞም ዑንጆ ጩቢሻኔ፤ ዬያቶ ፆኦዞኮ ማሎ ማዓ ባኣዚ ማዢ ዬያቶም ዚጋኔ። 17 ዬያሮ ዔርሚያሴ! ታ ኔና ዓይሣ ባኮ ቢያ ዔያቶም ኬኤዛኒ ዔያቶ ኮይላ ዴንዲሮ ጊኢጌ፤ ታ ኔና ታኣኒ ማዻንዳ ባኮ ዛሎ ማሊ ሜታዻንዳጉዲ ማሂባኣንቴ ዔያቶይዳ ማዺንታንዳ ባኮሮ ማሊ ሜታዺፖ። 18-19 ዔርሚያሴ! ሂንዳ ታ ጋዓሢ ኮሺ ዋይዜ! ሃኖ ዓጮይዳ ናንጋ ዓሳ ቢያ፤ ጌይፃ፦ ዪሁዳ ካኣታ፥ ቢታንታ ዓኣ ዓሳ፥ ቄኤሶንታ ዴሮንታ ዓቱዋዖ ኔጊዳ ሞርኬ ማዒ ዔቃንዳኔ፤ ያዺ ማዔቴያ ዔያቶ ዖሊ ቃዛንዳ ዎልቄና ዶዱሞና ታ ኔኤም ዒንጋንዳኔ፤ ዙሎ ኬልቂ ዲርቆና ካታማጉዲ፥ ዓንጊ ቱርቱሪጉዲ፥ ሞኦና ዓንጊና ኮሾና ኬኤሌ ዲሢጉዲያኣ ታ ኔና ዶዲ ማሃንዳኔ፤ ታ ኔኤና ዎላ ማዒ ኔና ሄላ ባኣዚ ቢያፓ ጎኦቢ ካፓንዳሢሮ ዔያታ ፔቴታዖ ኔና ባሻዓኬ፤ ዬያ ጋዓሢ ታና፥ ናንጊና ናንጋ ጎዳኬ» ጌዔኔ።