ጌኤዦ ማፃኣፖ ዮናኣሴ ማፃኣፖ 2

ዮናኣሴ ሺኢቄ ሺኢጲፆ

1 ዮናኣሴ ሞላሢ ጎጶይዳ ዓኣዖ ሂዚ ጌይ ናንጊና ናንጋ ጎዳ ማዔ ፔ ፆኦዛሢ ሺኢቄኔ፦

2 «ናንጊና ናንጋ ጎዳሢዮ! ታኣኒ ሜታዺ ዓኣዖ ኔና ዔኤሌኔ፤

ኔኤኒያ ታኣም ዬሄኔ፤

ኔኤኒ ታና ማኣዶንጎ ጌይ ሃይቄ ዓሶ ዓጮ፥ ዔቶይዳ ዓኣዖ

ኔ ዓውሳንዳጉዲ ታኣኒ ዒላቴኔ፤

ኔኤኒያ ታኣም ዋይዜኔ።

3 ኮሺ ዔታዻ ባዞኮ ዴሞይዳ ኔኤኒ ታና ኬኤሬኔ፤

ኮይላ ታኣኮ ዋኣሢ ሌሊ ማዔኔ፤

ኔኤኮ ዴቺንታ ዋኣፆና ባዞ ጉዳሢና ታኣኮ ዑሢና ዓኣዼኔ።

4 ኔ ዓኣፓፓ ታኣኒ ኬኤሪንቲ ባይቄኔ፤

ያዺ ማዔቴያ ኔኤኮ ጌኤዦ ማኣሮ ላሚ ታኣኒ ዛጋኔ።

5 ዋኣፃ ታኣኮ ሆሎ ሄላንዳኣና

ዼኤፖ ባዞ ዋኣፃኣ ጋፒሲ ታና ዔኤዼኔ፤

ዼኤፖ ባዞይዳ ባቃሊ ዓኣ ማኣታ ቶኦኮ ታኣኮ ማሬኔ።

6 ሊካ ዹኮኮ ዴሞ ታኣኒ ኬዴኔ፤

ዬያኮዋ ዴማ ዓኣ ሳዖ ዴማ

ናንጊና ታኣኒ ካራ ዎዺንቴም ዴዔኔ፤

ኔኤኒ ጋዓንቴ ናንጊና ናንጋ ጎዳ ማዔ ታ ፆኦዛሢዮ!

ዬያ ዋኣፆ ዔቶይዳፓ ኬሲ ዔኪ ሼምፓሢ ታኣኮ ዓውሴኔ።

7 ታኣኒ ሃይቄያ ታኣም ማሌ ዎዶና

ናንጊና ናንጋ ጎዳ ታኣኒ ማሊ ጶቂሤኔ፤

ኔና ታኣኮ ፆኦዛሢ ታኣኒ ሺኢቄኔ፤

ሺኢቂፆ ታኣሲ ኔኤኮ ጌኤዦ ማኣሮይዳ ኔ ዋይዜኔ።

8 ሉኡዚ ማዔ ፆኦዞ ካኣሽካ ዓሳ ቢያ

ኔኤም ጉሙርቂንታያ ማዒፆ ሃሼኔ።

9 ዻቂሻሢ ናንጊና ናንጋ ጎዳታሢሮ

ታኣኒ ጋላታ ዓይኑሞና ዎላ ዒንጎ ባኣዚያ ሺኢሻንዳኔ፤

ዒዛም ታኣኒ ናኣቤ ባኮዋ ዒንጋንዳኔ።»

10 ዬካፓ ናንጊና ናንጋ ጎዳ ዓይሤም ሞላሢ ዮናኣሴ ዔኪ ኬሲ ባዞ ዓጫ ጮኦሽኬኔ።