ዒያሱ ማፃኣፖ
ዓይፆ ካሮ
ሙሴ ቤዞ ጌሊ ዶኦሪንቴ፥ ዒያሱ ዒስራዔኤሌ ዴሮ ዔኪ ዓኣዼም ዖሎና ዔያታ ባሺ ካኣናኔ ዓጮ ዎይቲ ዓርቄቴያ ኬኤዛ ሃይሴ ሃኖ ዒያሱ ማፃኣፖይዳ ዓኣያኬ፤ ሃኖ ማፃኣፖይዳ ፃኣፒንቴ ዼኤፖ ዼኤፖ ሃይሶ ባኣካፓ ዓኣፖ ማዔ ባኮንሢ፦ ዒስራዔኤሌ ዓሶኮ ዮርዳኖሴ ዎሮና ፒንቂፆ፥ ዒያርኮ ካታሞኮ ኬኤሎ ዲፆ ዶዒፆ፥ ዓዪ ጌይንታ ቤዛ ዔያታ ዖልቴ ዖሎንታ ዴራ ፆኦሲና ዎላ ጫኣቄ ጫኣቁሞኮ ጊንሣ ዓካዺፆዋ ኬኤዛያኬ። ሃኖ ማፃኣፖይዳ ሚርጌና ዔርቴያ ማዔ ቤዞይዳፓ ፔቴዛ «ዒንሢ ካኣሽካንዳ ባኮ ሃኖ ዶኦሩዋቴ፤ ታኣና ታ ማኣሮ ዓሶና ጋዓንቴ ናንጊና ናንጋ ጎዳ ኑ ካኣሽካንዳኔ» (24፡15) ጋዓ ቤዞኬ።
ማፃኣፔላ ዱማ ዱማ ዓርቄ ባኮ
ካኣናኔ ዓጮኮ ዖሎና ባሺንቲፆ (1፡1—12፡24)
ዓጮ ጊሽኪፆ (13፡1—21፡45)
1. ዮርዳኖሴ ዎሮኮ ዓባ ኬስካ ዛሎ ዓጮ (13፡1-33)
2. ዮርዳኖሴ ዎሮኮ ዓባ ጌላ ዛሎ ዓጮ (14፡1—19፡51)
3. ዓኣሺንቲ ቶሎ ካታሞ (20፡1-9)
4. ሌዊ ዓሶ ካታሞ (21፡1-45)
ዓባ ኬስካ ዛላ ዴዔ ዓሶኮ ፔ ቤዞ ማዒ ዴንዲፆ (22፡1-34)
ዒያሱ ዔልቃሜ ዔልቃሞ (23፡1-16)
ሴኬሜይዳ ጫኣቁሞኮ ጊንሣ ዓካዺፆ (24፡1-33)
1
ናንጊና ናንጋ ጎዳ ዒያሱ ዓይሤ ባኮ
ናንጊና ናንጋ ጎዳኮ ዓይላሢ፥ ሙሴ ሃይቄስካፓ ሙሴ ማኣዲ ማኣዲ ማዻ ኔዊ ናኣዚ ዒያሱም ናንጊና ናንጋ ጎዳ፦ «ኔ ዔራሢጉዲ ታ ዓይላሢ ሙሴ ሃይቄኔ፤ ዓካሪ ኔናንታ ዒስራዔኤሌ ዴሮንታ ቢያ ጊኢጊንቲ፥ ታኣኒ ዒስራዔኤሌ ዓሶ ዻካልሳንዳ ዓጬሎ ጌላኒ ዮርዳኖሴ ዎሮና ፒንቁዋቴ። ሙሴም ታ ኬኤዜ ጎይፆና ዒንሢ ዴንዲ ሄላ ዓጮ ቢያ ታ ዒንሢም ዒንጌኔ። ዒንሢ ዓጮኮ ዛጳ፦ ዾኦሎ ዛሎና ዓኣ ዓሲ ናንጉዋ ቦኦላፓ ዓርቃዖ ኬዶ ዛላ ዓኣ ሊባኖኦሴ ዹኮ ሄላንዳኣና፤ ሃሣ ዓባ ኬስካ ዛሎና ዼኤፖ ዔፕራፂሴ ዎሮና ጋዓዖ ሂኢታ ዓሶ ዓጮ ቢያ ዔኪ ዓባ ጌላ ዛሎና ዓኣ ሜዲቴራኒያ ባዞና ማዓንዳኔ። ዒያሱ፤ ኔ ናንጋ ዎዶ ቢያይዳ ኔና ዖሊ ባሻንዳ ዓይጎ ዓሲያ ባኣሴ፥ ታኣኒ ሙሴና ዎላ ማዔሢጉዲ ኔኤና ዎላኣ ታ ማዓንዳኔ፥ ቢያ ዎዴ ታ ኔኤና ዎላኬ፤ ፔቴታዖ ታ ኔና ሃሻዓኬ፤ 1፡5 ላሚ. ዎማ 31፡6፤8፤ ዔብ. 13፡5። 1፡5 ላሚ. ዎማ 11፡24-25። ዒጊጪፖ፥ ዶዴ፤ ታኣኒ ዔያቶኮ ቤርታኣ ዓዶንሢም ዒንጋኒ ጫኣቄ ዓጬሎ ዻካልሳኒ ሃያ ዴሮ ዔኪ ዓኣዻንዳሢ ኔናኬ። 1፡6 ላሚ. ዎማ 31፡6፤ 7፡23። ኔኤሮ ዒጊጪፖ፥ ዶዴ፤ ታ ዓይላሢ፥ ሙሴ ኔኤም ኬኤዜ ዎጎ ቢያ ጉሙርቂንቲ ዓይሢንታያ ማዔ፤ ኔ ዴንዳ ቤዞይዳ ቢያ ጉቤ ባኣዚ ኔኤም ጊኢጋንዳጉዲ ሃያ ዎጎ ሃሺ ሴካ ሃንጋ ጌይፖ፤ ሃያ ዎጎ ማፃኣፖ ቢያ ዎዴ ናባቤ፤ ዬያይዳ ፃኣፒንቴ ባኮ ቢያ ማዺ ኩንሣኒ ዋንቶና ሮኦሮና ቢያ ማሌ፤ ኔ ዬያይዴቴ ቢያ ባኣዚ ኔኤም ጊኢጋንዳኔ። ኔ ዴንዳ ቤዛ ቢያ፦ ታኣኒ፥ ናንጊና ናንጋ ጎዳ ማዔ ኔኤኮ ፆኦዛሢ ኔኤና ዎላታሢሮ ዒጊጪፖ! ዶዴ ታ ኔኤም ጌይባኣዓዳ?» ጌዔኔ።
ዒያሱ ዴሮ ዓይሤ ባኮ
10 ዬካፓ ዒያሱ ዴሮኮ ሱኡጎ፦ 11 «ጉርዶ ዴንዲጋፓ ዴሮም ‹ናንጊና ናንጋ ጎዳ ማዔ ዒንሢኮ ፆኦዛሢ ዒንሢ ዻካላንዳጉዲ ዒንጋ ዓጬሎ ዔካኒ ሃይሦ ኬሊኮ ጊንፃፓ ዮርዳኖሴ ዎሮና ዒንሢ ፒንቃንዳሢሮ ጋላ ጊኢጊሹዋቴ› ጌይ ኬኤዙዋቴ» ጌዒ ዓይሤኔ።
12 ዒያሱ ሃሣ ሮኦቤኤሌንታ ጋኣዴ ዓሶንታም፤ ሃሣ ጊንሣ ሚናኣሴ ዓሶኮ ዛሎም፦ 13 « ‹ናንጊና ናንጋ ጎዳ ማዔ ዒንሢኮ ፆኦዛሢ ዬኖ ዓጬሎ ዒንሢም ዒንጊ ዒንሢ ሃውሺሲ ዴይሣንዳኔ› ጌዒ ናንጊና ናንጋ ጎዳኮ ዓይላሢ ሙሴ ኬኤዜሢ ማሊ ጶቂሡዋቴ። 14 ዒንሢኮ ላኣሎንታ ናኣቶንታ ቆልሞንታ ሙሴ ዮርዳኖሴ ሱካ ዒንሢም ዒንጌ ሃኖ ዓጬሎይዳ ዴዖንጎ፤ ጋዓንቴ ዒንሢኮ ዖሎ ዖላ ዓሳ ዖሎ ዓንጋሞ ዔኪ ዔያቶኮ ፃጶ ዒስራዔኤሌ ዓሶ ማኣዳኒ ቤርታ ዮርዳኖሴ ዎሮና ፒንቆንጎ፤ 15 ናንጊና ናንጋ ጎዳ ማዔ ዔያቶኮ ፆኦዛሢ ዔያቶም ዒንጌ ዮርዳኖሴ ዎሮኮ ዓባ ጌላ ዛሎይዳ ዓኣ ዓጮ ዔያታ ዻካላንዳያ ሄላንዳኣና ዔያቶና ዎላ ዖሎንጎ፤ ናንጊና ናንጋ ጎዳ ማዔ ዒንሢኮ ፆኦዛሢ ዒስራዔኤሌ ማኣሮ ማኣሮ ዓሶም ቢያ ኮሹሞ ሃውሾ ዒንጋዛ ዒንሢ ማዒ ሙኪ ዓባ ኬስካ ዛላ ዮርዳኖሴ ዎሮኮ ሱካ ናንጊና ናንጋ ጎዳ ዓይላሢ ሙሴ ዒንሢም ዒንጌ ዓጮይዳ ናንጋንዳኔ» ጌዔኔ። 1፡15 ፓይ. ማፃ 32፡28-32፤ ላሚ. ዎማ 3፡18፤ ዒያ. 22፡1-6።
16 ዔያታ ዒያሱም ማሃዖ፦ «ኔ ኑም ኬኤዜ ባኮ ቢያ ማዺ ኑ ኩንሣንዳኔ፤ ሃሣ ኔ ኑና ዳካ ቤዞዋ ቢያ ኑ ዴንዳንዳኔ፤ 17 ዎንዴ ሙሴም ኑ ዓይሢንታሢጉዲ ኔኤማኣ ኑ ዓይሢንታንዳኔ፤ ናንጊና ናንጋ ጎዳ ማዔ ኔኤኮ ፆኦዛሢ ሙሴና ዎላ ማዔሢጉዲ ኔኤና ዎላኣ ማዖንጎ! 18 ኔ ቢታንቶ ማኪ ዒፃያና ኔ ዓይሣ ባኮ ቢያ ማዺ ኩንሡዋያ ዓኣቶ ዎዎዺንቶንጎ፤ ኔኤኒ ጋዓንቴ ዶዴ!» ጌዔኔ።

1:5 1፡5 ላሚ. ዎማ 31፡6፤8፤ ዔብ. 13፡5።

1:5 1፡5 ላሚ. ዎማ 11፡24-25።

1:6 1፡6 ላሚ. ዎማ 31፡6፤ 7፡23።

1:15 1፡15 ፓይ. ማፃ 32፡28-32፤ ላሚ. ዎማ 3፡18፤ ዒያ. 22፡1-6።