ናሆኦሜ ማፃኣፖ
ዓይፆ ካሮ
ፆኦሲ ማሊፆ ኬኤዛ ናሆኦሜ ማፃኣፓ ሚናፓ ዓርቃዖ ዒስራዔኤሌኮ ሞርኬ ማዒ ናንጌ ዓሶኦሬ ካታሞኮ ዶዒ ባይቂፆ ኬኤዛ ካላሊ ዓርቄያኬ፤ ኔኔዌ ዓሶኦሬኮ ዔርቴ ዼኤፒ ካታማኬ። ኔኔዌ ካታማ ኪሪስቶሴ ሾይንታንዳሢኮ ቤርታ ላንካሳ ፄኤቶ ሌዖኮ ጋፒንፆይዳ ሻሂንቲ ባይቄኔ፤ ዬኖ ካታሞኮ ዬያይዲ ባይቂፃ ዋይዞ ዒፃ ፑርቶ ዓሶንታ ዖቶርቃ ዓሶንታይዳ ፆኦሲ ዎያጉዴ ሜቶ ዓጋቴያ ፔጋሲ ዻዋያኬ።
ማፃኣፔላ ዱማ ዱማ ዓርቄ ባኮ
ፆኦሲኮ ዒጊቻ ዻጎ (1፡1-6)
ዓሶኦሬይዳ ዓጎና ፑርቶ ባካ ዒስራዔኤሌ ዴሮም ሃጊ ማዓ ዎዛ ጴዺሼሢ (1፡7-15)
ኔኔዌ ካታሞኮ ዶዒ ባይቂፆ (2፡1—3፡19)
1
ናንጊና ናንጋ ጎዳኮ ታሞጉዴ ዻጎ
ኔኔዌ ባይቃንዳያ ማዒፆ ዔልቆሻ ዓጮ ዓሢ፥ ናሆኦሜም ፆኦሲ ፔጋሲ ዻዌ ባካ ሃካፓ ሊካ ኬኤዚንታ ጎይፆጉዴያኬ። 1፡1—3፡19 ዒሲ. 10፡5-34፤ 14፡24-27፤ ሶፖ. 2፡13-15።
ናንጊና ናንጋ ጎዳ ዒዛፓ ሜሌ ካኣሽኪንታንዳጉዲ ኮዑዋያ
ዒዛኮ ሞርኮ ኮሜ ኮፃ ፆኦሲኬ፤
ፔኤኮ ዼኤፖ ዻጎና ሞርኮይዳ ፑርታ ባኣዚ ዓጋያኬ።
ናንጊና ናንጋ ጎዳ ቲኢራያ፥ ሃሣ ዎልቄና ዓኣያኬ፤
ያዺ ማዔቴያ ዻቢንቴሢዳ ሜቶ ዓጉዋዖ ሃሹዋሴ።
ዒዚ ሃንታሢ ዓልጋሢ ዢባሮና ባዞ ጉዳሢናኮ ባኣካኣኬ፤
ዓሲ ሃንታዖ ሲላሊ ዔቂሳሢጉዲ
ናንጊና ናንጋ ጎዳ ሃንታዖ ሻኣሮ ዔቂሳኔ።
 
ናንጊና ናንጋ ጎዳ ዼኤፖ ባዞንታ ዎሮንታ
ሚጫንዳጉዲ ዓይሢ ሚሚጪሳኔ።
ባኣሳኣኔና ቄርሜሎሴናይዳ ዓኣ ካያ ሜሌኔ፤
ሊባኖኦሴይዳ ዓኣ ቡናኣ ሹሊ ዲኢኔኔ።
ናንጊና ናንጋ ጎዳ ቤርቶይዳ ዹካ ጎጎይቃኔ፤
ጌሜራኣ ዓልቂ ዋኣሢ ማዓኔ።
ናንጊና ናንጋ ጎዳ ቤርቶይዳ ሳዓ ዓዓጊፃኔ፤
ሳዖንታ ዒኢካ ዓኣ ባካኣ ቢያ ጎጋይቃኔ።
ዒዛኮ ዼኤፖ ዻጎ ቤርታ ዖኦኒ ጫርቂ ዔቃንዳይ?
ዻጋ ዒዛኮ ታሚጉዲ ዔኤታኣና ዖ ዳንዳዓይ?
ታሚጉዲ ሙሙዓ ዻጋ ዒዛኮ ሎኦፓ ኬዳኣና
ላላ ፃሂ ፃሂ ቡርሺንታኔ።
 
ናንጊና ናንጋ ጎዳ ኮሺ ፆኦሲኬ፤
ሜቶ ዎዴና ፑኖ ካይዚ ዶዲኬ፤
ዒዛ ጉሙርቃዞንሢኮ ቶኦኮ ዛጊ ዒዚ ማኣዳኔ።
ዒዛ ማካ ዓሶ ዼኤፒ ዲጲና ዱኡኪ ዒ ባይዛኔ፤
ዒዛኮ ሞርኮዋ ዹሚዳ ዳውሲ ጌልዛኔ።
ናንጊና ናንጋ ጎዳም ጌኔ ማሊሢ ዒንሢ ዓይጎሮ ማላይ?
ዒዚ ዒንሢ ጋፒ ቲፂዲ ባይዛንዳኔ፤
ላሚ ዒንሢ ዬያጉዴ ባኣዚ ፔቴታዖ ማዻኒ ዳንዳዑዋሴ።
10 ዒንሢ ሃይ ማሢንቴ ዓሳ!
ዎሊ ማሪ ዓርቄ ዓንጊሢና ቡኡራና
ታሚ ሙይ ባይዛሢጉዲ
ያዺዲ ዒንሢ ሙይንቲ ባይቃንዳኔ።
 
11 ኔኔዌ ዴሬዮቴ! ናንጊና ናንጋ ጎዳም ፑርታ ማሊሢ ማላያ፤ ሃሣ ፑርታ ዞሮ ዞራ ዓሲ ዒንሢ ባኣካ ኬስኬኔ። 12 ናንጊና ናንጋ ጎዳ ፔ ዴሮ ዪሁዳም ሂዚ ጋዓኔ፦ «ዓሶኦሬ ዓሳ ዎልቄና፥ ሃሣ ፓይዳኣ ዔያቶኮ ሚርጌታቴያ ዲርካቺንቲ ቤሲ ዔያታ ባይቃንዳኔ። ታ ዴሬዮቴ! ሃያኮ ቤርታ ዒንሢዳ ሜቶ ታኣኒ ዺቢሼያ ማዔቴያ ሃይካፓ ሴካ ታኣኒ ዬያይዳዓኬ። 13 ዓሶኦሬ ዓሳ ዒንሢ ሄርቂ ዎይሣ ዎይሢፆ ታኣኒ ሃሺሳንዳኔ፤ ዒንሢኮ ዔያታ ቶኮ ቱኬ ዱፃሢ ታኣኒ ሜንሣንዳኔ።»
14 ናንጊና ናንጋ ጎዳ ዓሶኦሬ ዓሶይዳ ዎጌ ዎጊፃ ያዺኬ፦ «ሃይካፓ ሴካ ሱንፆ ዒንሢኮ ዔኤሊሳንዳ ዜርሢ ባይቃንዳኔ፤ ዒንሢ ካኣሽካ ፆኦዞ ማኣሮይዳ ዱማ ዱማ ዓርሲ ኮሾና ባኮንታ ዓንጎ ሼኤሺ ኮሾና ፆኦዞዋ ታኣኒ ባይዛንዳኔ፤ ዒንሢያ ፓሡዋ ዴሬ ማዔሢሮ ዱኡፒ ዔቴ ታኣኒ ዒንሢም ቦኦካንዳኔ።» 15 ሃይሾ ሃሢ ኮሺ ሃይሴ ኬኤዛያ፥ ኮሹሞ ዓኣያ ማዒፆ ዒላቲ ኬኤዛ ኪኢታ ዓሲ ዹኮ ዑፆ ዬይ ዬይኬ፤ ዪሁዳ ዴሬዮቴ! ፑርቶ ማዔ ኔኤኮ ሞርካ ጋፒ ዲርካቺንቴሢሮ ሃይካፓ ሴካ ኔኤኮ ዓጮ ዔያታ ሙኪ ፔቴታዖ ዓርቃዓኬ! ዬያሮ ሌዓ ሌዓ ኔኤኒ ቦንቻ ቦንቾ ዎዛና ቦንቼ! ኔኤኒ ናኣቤ ናኣቦዋ ፆኦሲም ዒንጌ! 1፡15 ዒሲ. 52፡7።

1:1 1፡1—3፡19 ዒሲ. 10፡5-34፤ 14፡24-27፤ ሶፖ. 2፡13-15።

1:15 1፡15 ዒሲ. 52፡7።