ዓይኑሞ ማፃኣፖ
ዓይፆ ካሮ
ሃና ዓይኑሞ ማፃኣፓ ጌኤዦ ማፃኣፖ ጋራ ዓኣ ማፃኣፖይዳፓ ቢያ ዺቢ ዓይሢ ዓኣ ዳልጊ ማፃኣፔኬ። ዬይ ሚርጌ ዓይኑማ ፔቴ ዓሲ ፔኤሮ፥ ጊንሣ ሃሣ ፔቱሞና ዓይናዻያ ሃሣ ናባባያኬ።
ሃኖ ማፃኣፔሎ ጋራ ፄኤታና ዶንጊንታሚና ዓይኑሞ ዓኣኔ። ዬያ ዓይኑሞ ባሼሢ ፃኣፔሢ ካኣቲ ዳውቴኬ። ዬያ ዓይኑሞ ዎላ ቡኩሲ ጊኢጊሻኒ ሚርጌ ዎዴ ዔኬያ ማዓዛ ዒስራዔኤሌ ዴራ ፆኦሲ ካኣሽካ ዳምቦኮ ዬይ ኮሺ ኮይሳያ ማዔኔ። ዬያ ዓይኑሞፓ ፔቴ ፔቴ ዓይኑማ ዎዚጉዴ ዓንጋሞና፥ ሃሣ ዎዚም ዓይናዺንታንዳቴያ ዓይኑሞ ዓይናዻ ዓሶኮ ሱኡጋሢም ዬይ ፔኤሮ ዔርዛኔ። ኮኦኪንሢና ዓይኑሞ ማፃኣፖ ዓይሢ ዖይዶና ዖይዲታሚ ዶንጎናይዳ ዛጋኒ ዳንዳዓኔ። ዬያቶ ዓይኑሞይዳ ፆኦሲ ሄርሺሢ፥ ጋላቲሢ፥ ጉሙርቂሢ፥ ሃጊ ማዓ ዎዛ ጌሥሢ፥ ዻቢንቲ ማዺንቴ ጎሜ ዛላ ዖዪሢ፥ ፆኦሲኮ ጉሙርቂንታያ ማዒፆንታ ዒ ማኣዳ ማኣዲፆንታ፤ ዬያጉዴ ዼኤፒ ዼኤፒ ማዔ ጌኤዦ ማፃኣፖ ማሊፃ ዓኣያ ማዔኔ።
ዬያ ዓይኑሞኮ ዼኤፖ ማሊፃ ዓሲ ፆኦሲ ዒናፓ ጉሙርቃንዳጉዲኬ፤ ዬያ ዓይኑሞ ፃኣፔ ዓሳ ፆኦሲ ጋላቲሢና፥ ጊንሣ ሃሣ ፔኤኮ ሜታሢያ ዒዛም ኬኤዚሢና ዔያቶኮ ዒኖ ማሊፆ ፔጋሲ ዔርዛኔ።
ሚናኣ ዎዶና ዒስራዔኤሌ ዓሳ ዬያ ዓይኑሞ ዱማ ዱማ ጎይሢና ማዾይዳ ፔኤሻኔ፤ ዬይያ፦
1. ዓይኑሞ ማፃኣፖኮ ዓይ. 105ይዳ ዓይናዺንቴ ጎይፆ ፆኦሲ ጋላታኒ፤
2. ዓይኑሞ ማፃኣፖኮ ዓይ. 13ይዳ ዓይናዺንቴ ጎይፆ ዖዪሢ ዔርዛኒ፤
3. ዓይኑሞ ማፃኣፖኮ ዓይ. 1ይዳ ዓይናዺንቴ ጎይፆ ዱማ ዱማ ባኣዚ ዔርዛኒ፤
4. ዓይኑሞ ማፃኣፖኮ ዓይ. 72ይዳ ዓይናዺንቴ ጎይፆ ዒስራዔኤሌ ካኣታ ፒዙሞና ዎጋንዳጉዲ ሺኢጲሢሮ፤
5. ዓይኑሞ ማፃኣፖኮ ዓይ. 47ይዳ ዓይናዺንቴ ጎይፆ ፆኦሲኮ ቢታንታ ዒ ማዤ ባኮ ቢያኮ ዑፃ ማዔሢ ዔርዛኒ፤
6. ዓይኑሞ ማፃኣፖኮ ዓይ. 122ይዳ ዓይናዺንቴ ጎይፆ ዬሩሳላሜ ናሽካያ ማዒፆ ዔርዛኒ፤
7. ዓይኑሞ ማፃኣፖኮ ዓይ. 126ይዳ ዓይናዺንቴ ጎይፆ ቦንቾ ኬሊያኣ ቦንቻኒኬ።
ጎኔና ሚርጌ ዓይኑሞኮ ማሊፃ ፔቴ ማሊሢዳፓ ዑሣ ማዓኒ ዳንዳዓኔ። ኑ ጎዳ ዬሱስ ኪሪስቶሴ ቃኣሎ ኬኤዜያና፥ ጊንሣ ሃሣ ዱማ ዱማ ባኮ ዔርዜያና ዓይኑሞ ማፃኣፖፓ ዔኪ ዔኪ ሚርጌ ባኣዚ ኬኤዜኔ። ዓኮ ጫኣቁሞ ማፃኣፖ ፃኣፔ ዓሳኣ ሚርጌ ቤስካ ዬያ ዓይኑሞ ዔኪ ዔኪ ፃኣፔኔ። ዬያ ሌሊቱዋንቴ ቤርታዺ ኪሪስቶሴ ጉሙርቂ ዔኬ ዓሳኣ ፆኦሲ ዬሱስ ኪሪስቶሴ ዛሎና ማዼ ኮዦ ባኮ ዬያ ዓይኑሞና ኬኤዚ ኬኤዚ ፆኦሲ ካኣሽኬኔ። ዬያኮ ኮኦኪንሢ ማዓይ ዓይኑሞ ማፃኣፖ ዓይ. 118ኮ ፓይዲ 22ይዳ ዓኣ ማሊፃ ዓኮ ጫኣቁሞ ማፃኣፖይዳ ላሆ ማይንቲ ፃኣፒንቲፆኬ።
ማፃኣፔላ ዱማ ዱማ ዓርቄ ባኮ
ዓይኑሞ ማፃኣፓ ዻካ ዻካ ቤሲ ዶንጎ ፓቂንታኔ፤ ዬያቶይዳፓ ባሼዞንሢ ጌይፃ ቤርታሶና ላምዓሶ ማዒ ፓቂንቴ ማሊፆ ፃኣፔሢ ካኣቲ ዳውቴኬ። ሃይሣሶ ማዒ ፓቂንቴ ዓይኑሞ ፃኣፔሢ ዓሳኣፔ፥ ሃንጎ ቆሬኬ ጌይንታኔ።
ዓይሢ 120—134 ሄላንዳኣና ዓኣ ዓይኑማ ቦንቾ ኬሊ ቦንቺንታኣና ዓይናዺንታ ዓይኑሞኬ። ሃካፓ ዴማ ዓይኑሞ ማፃኣፓ ዻካ ዻካ ዶንጎ ቤሲ ፓቂንቴ ጎይፃ ኬኤዚንታኔ፦
ዓይኑሞ ማፃኣፖ ዓይ. 1—41
ዓይኑሞ ማፃኣፖ ዓይ. 42—72
ዓይኑሞ ማፃኣፖ ዓይ. 73—89
ዓይኑሞ ማፃኣፖ ዓይ. 90—106
ዓይኑሞ ማፃኣፖ ዓይ. 107—150
ቤርታሳ ፓቂፆ
1
(ዓይኑሞ ማፃኣፖ ዓይ. 1—41)
ኮሺ ዓሲና ፑርታ ዓሲናኮ ናንጊ
ፑርቶ ዓሶ ዞሮ ዋይዙዋኣሢ
ጎሞ ዓሳ ሃንታ ጎይፆ ሃንቱዋኣሢ
ፆኦሲ ባኮ ቦሃ ዓሶና ፔቴ ማዒባኣሢ ዓንጂንቴያኬ።
ዬያ ጉዴ ዓሢ
ናንጊና ናንጋ ጎዳኮ ዎጎና ዎዛዻኔ፤
ዬያ ዎጎዋ ዋንቶና ሮኦሮና ፔ ዒኖና ማላኔ።
ዒዚ፦
ዎዶና ዎዶና ዓኣፒ ዓኣፓያ
ዒላዣኣ ዲኢኑዋያ
ዓልቃ ዋኣሢ ዓሽካ ቱኪንቴ ሚሢጉዲ ማዓኔ፤
ዒዚ ማዻ ባካኣ ቢያ ዒዛም ጊኢጋኔ። 1፡3 ዔር. 17፡8።
 
ፑርቶ ማዻ ዓሳ ጋዓንቴ ያዺቱዋሴ፤
ዢባሬ ፒፂ ዔኪ ዓኣዻ ዲልባጉዲኬ።
ዬያሮ ፑርቶ ማዻ ዓሳ
ፆኦሲ ዎጎ ዎጋ ኬሎና ቶላዓኬ፤
ጎሞ ዓሳኣ ፂሎ ዓሶ ባኣካ ጴዻዓኬ።
ፂሎ ዓሳ ሃንታ ጎይፆ ናንጊና ናንጋ ጎዳ ዔራኔ፤
ፑርቶ ማዻ ዓሶ ጎይፃ ጋዓንቴ ባይሲንታ ባንሢ ዔኪ ዓኣዻያኬ።

1:3 1፡3 ዔር. 17፡8።