Nhupi Wooreera wa Yesu Kristu Wantikhiye ni
Marku
1
Yohani Mpatisa nalalyaa
Mt 3.1-6; Lk 3.1-6
1 Wiipaceroni wa Nhupi Wooreera wa Yesu Kristu, Mwanawe Nluku. 2 Ohaantikhiya ni nnapiyu Isaya:
Kimmonrumiha uhoolo wa mayanhupi aka,
nohala wulokiherani iphiro.* Malakiya 3.1
3 Ncu ninkhuwa ntakhwani,
Nlokihe iphiro ya Apwiya, mookole mittala.* Isaya 40.3
4 Ciicale, Yohani Mpatisa phooneliye ntakhwani wiira eetthucihe opatiso wo urukunusa nrima wiira itaampi cileveleliye. 5 Yaanamwikamela atthu othene olapo ya Yutteya, na atthu ankhala uYerusalemu, ni yaanapatisiya ni ule umooloko Yorttani, alaphaka itaampi caya. 6 Yohani awara ikuwo yo mapururu onkamira, eethukelaka nyununi mo nrapala, yoolya awe yari mattettentte ni urawo wo ntakhwani. 7 Ni wowaalaka anaahimya coo: Uttuli waka mi nawa nkinaku rina ikuru impwaha yawaka, ni mi akimphwanela wooroma wiira kitthukule miripwe cokwakwatta cawe. 8 Mi kinawuupatisani ni maasi, nanso Ule naahala wuupatisani muNnepa Nttakattifu.
Yesu napatisiya ni nathokociya
Mt 3.13-17; 4.1-11; Lk 3.21-22; 4.1-13; Yohani 1.32-34
9 Waheranyaa, mahuku ale, Yesu awaaka ukhuma uNasaree yo Kalileya, mpaka upatisiya ni Yohani umooloko Yorttani. 10 Wakhumawe mmaasini mmo, ahoona irimu ihulyaka, ni Nnepa, woonnya toko ikhuntta inkhuruwelaka. 11 Ni ukhuma wirimu nineewiya ncu nnohimya: We uri Mwanaka oofentiya, nokiphela nrima. 12 Wahoolo Nnepa Nttakattifu wahoonrweha utakhwani, ni 13 ahokhala wonwo mahuku arupayini, ni ahothokociya ni Sotwani; ni cahawo wonwo inama cowoopiha, ni ancelo yahonkavihera.
Owiitthuca oopacera a Yesu
Mt 4.12-22; Lk 4.14-15; Lk 5.1-11
14 Utthukiya wawe Yohani, Yesu akenle uKalileya, wahimerya atthu Nhupi Wooreera wa Nluku, eeraka: 15 Ukati uhophiya ni ciicammo Omwene wa Nluku uhophiya. Nrukunuseke nrima, nkupalelaka Nhupi Wooreera. 16 Aviraka nceresere ntthiya no Kalileya, ahomoona Simoni ni nhimaawe Anteree avonyeraka matthavi aya mpaharini mmo, nlattu yaari mayototha ihopa. 17 Yesu aheerela: Nkitthare Mi, ni Mi kimmowupankani mayowatotha atthu. 18 Ahiyaka nanaanoru matthavi aya, yahontthara Yesu. 19 Napwahile vakani, ahomoona Yakopu, mwana a Sepeteu ni nhimaawe Yohani, alokihaka nkalawani matthavi aya pweehanaka nananoru. 20 Ni ale yahonhiya Sepeteu athumwanaya ni mayanteko aya, yahontthara.
Nlopwana o nnepa woonanara
Lk 4.31-37
21 Yaanarwa uKafarnaum. Nihuku no Ntivela ahokela nnsinakokani, ni aheetthuciha atthu. 22 Na atthu othene yaanawumiya mwaano ni miitthuciho cawe, nlattu aheetthuciha toko ntthu nolamula ni khari toko mayowantikha. 23 Ahaawo nnsinakokani mmo ntthu arina nnepa woonanara, apacile ukhuwa: 24 We urinani ni hi, Yesu o Nasaree? Wawenle unikwanyulaca? Mi kihocuwela wiira uri Nttakattifu a Nluku. 25 Yesu ahonkuphula, eeraka: Omaale we, ni ukhume wantthu ula. 26 Vano, nnepa woonanara, unantathile ni ikuru, ukhuwacaka, wahokhuma wantthu ule. 27 Othene yahotikhinaca, mpaka ukohana ayayoru: Isiyani ila? Moone meetthuciho oonaanano, uromoliya ni nlamulo mpaka ulamulela minepa coonanara ni nnya cinamwiiwelela. 28 Ni ncina nawe nahorumannya nttetthe wothene, ilapo yo Kalileya.
Yesu nawavoniha aretta enci
Mt 8.14-17; Lk 4.38-41
29 Akhumaka unsinakoka ahokela mpani mwa Simoni ni Anteree, wamoca ni Yakopu ni Yohani. 30 Amaathyawe Simoni yaanawerenya wakorini, awerenyaka irutthu yothene, ni nananoru yahonhimerya ca iretta ila. 31 Attameryaka, Yesu ahaavarela ntata mpaka waawusa. Iretta yahaahiya, na ale yahopacera wakaavihera. 32 Ucoocilo, ncuwa ninakwattuwile, yahomwiihera aretta na ale yahoosiya ni nnepa woonanara, 33 na atthu othene owatthokoni yahothukumana wankhora. 34 Ahaavoniha aretta enci, yahoosiye ni coowerya, ni ahoomola minepa coonanara cinci; nanso khahiya wuulumaca minepa nlattu yaanancuwela.
Yesu nahimyaca Nhupi Wooreera
Lk 4.42-44
35 Wicisuru, uhinasa ahoonwa ni ahokhuma; phurwaka ntakhwani wiira aswali. 36 Simoni, na ale yaari ni Yesu yahontthara. 37 Umphwanya waya, yahomwiirela: Atthu othene anawuphavelani. 38 Nanso ahaakhula: Nirwe ncoko nkina, itthoko co vakhiviru, neetthucihe wonwo, nlattu wo yela phikumenlyaka. 39 Ni ahorwaa ilapo yothene yo Kalileya, eetthucihaka mmasinakokani, ni oomolaka minepa coonanara.
Yesu ahonvoniha ntthu o makuttula
Mt 8.1-4; Lk 5.12-16
40 Ntthu o makuttula ahonrwela Yesu ni ankhoromelaka ahonlepela: Watthunaka vale unawoorya ukivoniha. 41 Amoonelaka ikiriri, Yesu ahonthatela ntata mpaka unkwanya, eeraka: Kinatthuna, uvone. 42 Nananoru, makuttula yahonhiya, ni irutthu yahokhala toko khalayi. 43 Ni Yesu ahonleeha phunlakaka, ni moolumo ala: 44 Ukiiwe ahinhimerye ntthu itthu ila. Nanso upacera urwaa wamayasataka ni uvelelihe itthu ilamuliye ni Musa; nlattu wa atthu anhapihiya makuttula, wiira akhale saahiti aa. 45 Ule, mweeco, urwaa wawe ahopacera ulattula ni uhimya itthu yeeranele, mpaka Yesu uhoorya ukela ooniyaka mmawaani phukhalaka ntakhwani; na atthu olapo ile yaananrwela.