2
Indoahn Ngen Joarwi
1 Ne lel rehn in Pentecost ohroj ma pwojonla pokonpene wijahkij oar. 2 Nehn anjoauwohr ngil oau indihdohjang nehnloannge ma doahroar ngilen eng koalik oau ma koaldihdo kadirihla nehn ummwo, wija ma irai pokpokon. 3 Irai widahlihda mehkij ma doahroar umpwul in oai ma jirangrang pohrai, apel kodur emenemen irai ma pokpokon wijahu. 4 Irai ken dirkihla Ngen Joarwi apel sapda lallalki epwi lal sohrohr, in doahroar en Ngen Joarwi kalallalihki irai.
5 Mine mihn Jew pwi ma koaukoaujoan nehn Jerusalem, armaj poadidi pwi ma indoa jang nehn wei ohroj nehn jampah. 6 Nehn anjoauwo ma irai rongda ngilloauwe, armaj dir ken pokonpene. Irai ohroj ken pwuriamweikihla arai rongda pein arai lal jang in lalin ihr ok ma ne pwojonla. 7 Irai ohroj ken pwuriamwei apel pwonpwonki, irai ken pwa, “Armaj pwiai ma lallalki lal pwiai, jaudi irai mihn Galilee‑pwi! 8 Imdoahr, asai rongrongrong irai lallallalki lalin japwasai kan? 9 Kisai injang Parthia, Media, Elam, apel armaj jang Mesopotamia, Judea, Cappadocia, Pontus, Asia, 10 Phrygia, Pamphylia, Egypt, japwen Libya kan ma koaroannoang Cyrene, apel epwi kisai jang Rome, 11 mihn Jew apel mihn likin ohroj ma wiklahng lamlam in mihn Jew apel epwi kisai jang Crete apel Arabia — Kisai ohroj rongrongrong pein asai lal kan irai siksikoa joangoan manman kapwuriamwei kan ma Koahs ne wiahda!” 12 Pwa jang arai pwuriamwei apel ne pwonpwonda, irai ken peipeidekpene nehn pwungarai, pwahpwahpwa, “Ia woahwoahn me?”
13 Epwi irai kapkapiski ihr ma ne pwojonla kan, irai kin sikoa, “Armaj pwiai jakaula!”
En Peter ah Padahk
14 Peter uhda pwilihkihla woaroak eijek emenno, kakoalikihla ngiloa apel sapiahda padahk oang pokonno, “Rioai mihn Jew kan apel kamwai ohroj ma koaukoaujoan nehn Jerusalem, kamwai rong ngoahi apel soahk mwehu da ma ngoahi pirin sikoa. 15 Woal pwiai johpwa jakau, in doahroar da ma kamwai lemlemehki; kapwehsene kiloak duwoau inminjoang. 16 A ioar doahroar mehwa joukohp Joel ne pwa:
17 ‘Koahs pwa, ioar me ngoahi pirin wia in imwin rehn kan;
Ngoahi pirin kamwroahdi Ngenihoa pohn armaj ohroj.
Nihmwai jermwein kan apel jerpein kan pirin kalohkihjili oai lal,
apel nihmwai mwahnkapw kan pirin kapang kaudiahl kan,
apel armaj mah kan pirin oarmoan.
18 Apel pohn oai lidu kan, woal apel li kan,
Ngoahi pirin kamwroahdi Ngenihoa pohrai nehn rehnnok,
irai pirin pwili kalohkihjili oai lal.
19 Ngoahi pirin wiahda manman pwi nehnloannge,
apel kilel kapwuriamwei pwi nehn jampah.
Pirin mine insa, oai apel kalahs in oai koalik;
20 joauwo pirin rosla apel maram pirin wahssahla doahroarla insa,
mwohn Rehn Laplap apel lingin indoahn Rehn in Koaunno.
21 Ohroj ma kin pangin oadoan Koaunno pirin mourla.’
22 “Kamwai armaj in Israel kan, kamwai rong lal pwiai; Jesus mihn Nazareth, ioar ih woal wa ma ah doadoahk joarwi inenin janjal mwehu oang kamwai jang in manman kan, me kapwuriamwei kan, apel kilel kan ma Koahs kioang nehn poah en wiahda, in doahroar amwai ne pein woahwoahki pwa mehpwiai ne wiawihda nehn pwungamwai. 23 A jang in pein en Koahs koajoandi, Jesus pirin liklikwehng kamwai. A kamwai kojukdi Ih nehn amwai mweidoahng armaj dipan kan en kalohpwuhla Ih. 24 A Koahs ne kaiejda Ih jang mehdi, apel ne kajaledekla Ih jang manman in mehdi, pwa mehdi ne johla kak kalwehdi. 25 Pwa ioar mehwa David pwahkihla Jesus Christ,
‘Ngoahi ne kapangda Koaunno Ah minmine mwohn ngoahi anjoau ohroj,
Ih kin minmine ipoai, ioar kahrehda ngoahi johkak lel apwal.
26 Doari, ngoahi kin dirkihla injenmwahu.
Oai lal kan dirki malau.
Mihnda ma ngoahi pirin mehdi,
a ngoahi pirin pwen moaloailoai pwa jang in oai koapwoarpwoar;
27 pwa Koawoa en johpwa pirin moalkoahla ngoahi nehn wijahn ihr ma ne mehdi kan;
Koawoa jehpirin mweidoahng nihmw jounpapah joarwiho poadidi pwa palwoaroa en mwoarpijoang nehn joaujoau.
28 Koawoa ne kajalehioang ngoahi allok ma aluhwoang nehn mour,
apel oamw minmine ipoai pirin kadirihkihla ngoahi malau.’
29 “Rioai kan, ngoahi pirin sikoahng kamwai in janjal doahroar jamasai David. Ih ne mehdi joajjoardi, apel ah joaujoau minminehr ipasai lel rehn oauwe. 30 David pwen joukohp men, ih pel woahwoahki doahroar en Koahs inoau oang ih, pwa ih pirin kajapwilda emen kadaudokoa pwa en wiahla nahmwarki, ma pirin doahroar ih. 31 Doari, nehn en David ne widahlihda dahkij ma Koahs pirin wia, ih sikoa doahroar iejdahn Messiah, nehn ah pwahla:
‘Ih jehpirin mine nehn wijahn armaj mehdi kan,
palwoaroa jehpirin mwoarpijoang nehn joaujoau.’
32 “A Koahs ne kaiejda Jesus mene jang mehdi, apel kisai ohroj ma wia jounkadehdehn mehlel oauwe. 33 Ih ne kajapwildahng loap moaunin Koahs apel ne oaloa Ngen Joarwi jang ipoa, in doahroar en Jamah Koahs ne inoaukihdi. Doari, dahkij kamwai widahli apel rong apkas, ioar kijehn Ah kalahngan ma Ih ne widekihdi oang kisai. 34 Pwa pein David joah indahla nehnloannge, a ih pwahla,
‘Koaunno pwehng oai Koaun:
Koawoa en mwindi in loap moaun in Ngoahi,
35 Oaroh Ngoahi en wiahkihla Oamw imwinsihsi kan loangin pehn pwoalkoamwen kan.’
36 “Armaj in Israel kan ohroj en uhdahn kidalla mehlel pwa Jesus ma kamwai poanihdahng in lohpwuhwo, ioar ih ma Koahs kajapwilda pwa en Koaun apel Messiah!”
37 Doari, nehn en armaj kan ahr rongda me, irai ken inenin injinjuwed kihla apel idoak oang Peter apel woaroakkok, “Riamai, da kamai en wia?”
38 Peter japoang, “Emenemen kamwai en koaluhla, wiliakapwla, apel poapdaijla in oadoan Jesus Christ, pwa dipamwai kan en lapwda; kamwai pirin oaloa Ngen Joarwi, ioar kalahngan oauwe jang ipen Koahs. 39 Pwa en Koahs inoau ne wiawihoang kamwai apel nihmwai jerihkan, apel oang irai kan ma dohjang kamwai — irai ohroj ma Koaunno, asai Koahs kin pangin.”
40 Peter ken poanoauwi irai apel kangoangehki irai padahk dir: “Kamwai doaroahjang kamwai koaloklok kan ma pirin lelloang armaj nauna kan!” 41 Doari, armaj dihrdir ken pwojonla ah padahk apel poapdaijla, nimennoar armaj jilkid ma pwilihla pwihnno nehn rehnno. 42 Irai kin poadidihoang oaloa padahk jang ipen woaroakkok apel minminoang irai ma pwojonla kan; irai kin pel pwili ihr mwingehpene nehn ahr kin pwili kapkap.
Mourin Joauloang
43 Kilel kapwuriamwei apel manman inenin dir ma woaroakkok kin wiahda, ma kahrehioang emenemen ihr kin mijikda. 44 Irai ok ma ne pwojonla enngengdehn nehn arai kin minminpene apel kin jauwaj kihpene arai koapwoa kan. 45 Ihr kin noaskihla japwarai apel koapwoahkan, nehkpijoang mwani kan nehn pwungarai oang in anahn ma emenemen kin anahne. 46 Rehn ohroj ihr kin suhpene nehn Umw Joarwiho, apel kin oaupene nehn umwarai kan nehn ahr kin mwingehpene in peren mehlel. 47 Ihr kin kapkapnga Koahs apel kenkenla ipen armaj ohroj. Rehn ohroj Koaunno kin kapsahng pwihn oauwe irai kan ma ne koamoaurla.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.